Kitabı oku: «Profesionisti I Tregtisë Së Kriptomonedhave»
Profesionisti i tregtisë së kriptomonedhave
Tregti për të siguruar jetesën me strategji të testuara në kohë, mjete dhe teknika të menaxhimit të rrezikut. Një udhëzues bashkëkohor nga fillestari tek profesionisti
Alan T. Norman
Përkthyesi: Aurel Manushi
Merrni librin tuaj falas Balenat Bitcoin
(E gjeni në fund të një libri)
E drejta e autorit 2018 © Të gjitha të drejtat e rezervuara.
Asnjë pjesë e këtij botimi nuk mund të riprodhohet, shpërndahet, ose transmetohet në ndonjë formë ose me ndonjë mjet, duke përfshirë fotokopjimin, regjistrimin, ose metoda të tjera elektronike ose mekanike, ose me ndonjë sistem të ruajtjes dhe rikuperimit të informacionit pa lejen paraprake me shkrim të botuesit, përveç në rastin e citateve shumë të shkurtra të mishëruara në rishikime kritike dhe përdorime të tjera jo-tregtare të lejuara nga ligji për të drejtat e autorit.
Parathënie
Kapitulli 1. Kuptimi i tregut të kriptomonedhës dhe Psikologjia e lojës
Detyrë shtëpie
Kapitulli 2. Zgjedhja e bursës dhe platforma e analizës teksnike
10 bursat kryesore
Tradingview - Platforma e analizave teknike në internet
Detyrë shtëpie
Kapitulli 3. Zhvillimi i algoritmit tregtar
Kapitulli 4. Analiza teknike
Çfarë është analiza teknike?
KAPITULLI 5. Vizatimi i niveleve të mbështetjes dhe rezistencës
Vija e prirjes
Ndërprerja e vijës teknike
Përshpejtimi i një prirjeje
Vizatimi i një kanali
Detyrë shtëpie
Kapitulli 6. Analiza grafike
Modele përmbysëse
Modeli i kokës dhe supeve
Kokë dhe supe të përmbysura
Maja e Dyfishtë
Fundi i Dyfishtë
Maja e Trefishtë
Fundi i trefishtë
Modelet e vazhdimit të prirjes
Flamuri
Flamurth sinjalizimi
Pyka
Detyrë shtëpie
Kapitulli 7. Analiza kompjuterike
Treguesit e prirjes
Mesatarja Lëvizëse
Reja Ichimoku
Aligator
Oshilatorët
Detyrë shtëpie
Kapitulli 8. Vijat Fibonacci
Detyrë shtëpie
Kapitulli 9. Shandanët e Japonisë dhe kombinimet e tyre
Modelet e shandanit të vetëm
Modele të shandanit të dyfishtë
Detyrë shtëpie
Kapitulli 10. Teoria e valës Eliot ose Tregtia e Valës
Detyrë shtëpie
Kapitulli 11. Tregtimi për shpërthimet e majave lokale dhe niveleve të rëndësishme
Detyrë shtëpie
Kapitulli 12. Zbatimi i kombinuar i teknikave të analizs teknike
Detyrë shtëpie
Kapitulli 13. Zhvillimi i sistemeve tregtare
Komponentët kryesorë për marrjen e një vendimi tregtar
Detyrë shtëpie
Kapitulli 14. Thellësia e tregut ose strategjia e tregtimit e bazuar në thellësinë e tregut
Kapitulli15. Analiza themelore
Treguesit themelorë për analizën e monedhës
Anët e mira dhe të këqija të analizës themelore
Rregullimi i tregut të kriptomonedhave: të mirat dhe të këqijat
Detyrë shtëpie
Kapitulli 16. Menaxhimi i rrezikut dhe parave
Faktorët që rrisin rreziqet tuaja tregtare
Përdorni porositë mbrojtëse të ndalimit
Tregtoni duke përdorur disa strategji për një monedhë
Si të kapërcejmë uljen
Kapitulli 17. Ditari i tregtarit
Si të organizoni ditën tuaj të punës
Kapitulli 18. Psikologjia e tregtisë
Pra, cilat cilësi duhet të ketë tregtari për të qenë i suksesshëm?
Fuqia e mendimit dhe pohimet
Përfundim
Fjalor i Termave të Kriptomonedhave
Rreth autorit
Libri falas “Balenat e Bitcoin”
Libra të tjerë nga autori
Diçka të fundit...
Parathënie
N
ë epokën e depërtimit të plotë të internetit në çdo sferë të jetës sonë, ka një shumicë në rritje të njerëzve që nuk pranojnë më të punojnë në zyrë nga ora nëntë në orën gjashtë. Brezi i ri nuk është i gatshëm të ndjekë rrugën e rrahur nga gjyshërit dhe stërgjyshërit e tyre, të cilët u diplomuan në universitete, zgjodhën një punë dhe punuan atje derisa të mbushnin moshën e pensionit. Për më tepër, jemi të lodhur nga afatet e vazhdueshme në punë, shefat me tekat e tyre që ndryshojnë përjetësisht dhe, më fyese, mungesa e karrierës dhe rritjes financiare.
Interneti u dha njerëzve një mundësi për të prishur këtë rreth vicioz. Njerëzit kanë një alternativë që mund t’u sigurojë shpërblime financiare dhe liri nga puna në zyrë, kryemenaxherët dhe afatet kohore.
Pra, cila është kjo alternativë përrallore që ju jep lirinë e dëshiruar për të menaxhuar kohën tuaj dhe madje tërë jetën tuaj?
Shumica e njerëzve ëndërrojnë të mos bëjnë asgjë (ose pothuajse asgjë) dhe të paguhen për të, apo jo? Po sikur t’ju thoja që kjo ëndërr është bërë pothuajse realitet?
Në një mënyrë apo në një tjetër, Interneti i ka ofruar njerëzimit një larmi alternativash për fitime pasive. Ndërsa rrini ulur në divan, ju mund të shisni diçka, të mbani shënime të kontabilitetit për dikë, të bëni postime për blogun tuaj ose të jetoni me interes investimi. Prandaj, në ditët e sotme, ju i keni të gjitha mundësitë për të pasur të ardhura të mira në të ardhmen, duke investuar qoftë edhe një pjesë të vogël të aftësive, kohës dhe kapitalit tuaj në biznesin “pasiv”, ku nuk ka zyra dhe bosë!
Më parë, njerëzit fitonin të ardhura pasive nga investimet në depozitat bankare, unionet e kreditit, fonde të ndryshme dhe pasuritë e patundshme. Sidoqoftë, ata dividentë vinin ngadalë ose me shumë punë.
Tashmë ka “profesione” të reja për marrjen e të ardhurave pasive, përfshirë tregtinë. Sado e vështirë të duket në shikim të parë, pothuajse çdokush mund ta përvetësojë këtë “shkencë”. Sidoqoftë, për dekadën e fundit, qindra mijëra tregtarë në të gjithë botën i janë kushtuar vetes për të punuar në një shumëllojshmëri bursash, duke u përpjekur të bëhen milionerë. Ata ulen para kompjuterëve 24 orë në ditë/7 ditë të javës, duke sulmuar bursat dhe duke u përpjekur të rrisin kapitalin e tyre. Fatkeqësisht, jo të gjithë kanë sukses.
Me shfaqjen e kriptomonedhës disa vjet më parë, një nëngrup krejt i ri tregtarësh – kripto tregtarësh – u shfaq në treg. Në përgjithësi, tregtia e kriptomonedhës nuk ndryshon shumë nga tregtia tipike. Parimi themelor është i njëjtë: “Blini me çmim të ulët, shisni me çmim të lartë”. Pavarësisht se çfarë produkti keni – aksione, naftë, ar ose kriptomonedha – ky parim mbetet i pandryshuar.
Pra, kush janë këta kripto tregtarë “misteriozë” dhe çfarë ju nevojitet personalisht për të zotëruar këtë profesion? Për të qenë të suksesshëm në tregtinë e kriptomonedhës, si dhe në tregtimin e aktivit tjetër, do t’ju duhet:
Koha e lirë
Kapitali
Ndërgjegjësimi themelor i koncepteve ekonomike
Dëshira për të mësuar dhe provuar vazhdimisht strategji të reja;
Stabiliteti mendor
Megjithëse tregtia tradicionale dhe tregtia e kriptomonedhës kanë shumë të përbashkëta, ato ende kanë dallimet e tyre. Le t’i shqyrtojmë.
Nëse jeni një tregtar i zakonshëm (JO një tregtar i kriptomonedhës), atëherë e dini me siguri që përfitimi në këmbimet tuaja të mund të arrihet vetëm përmes një ndërmjetësi. Një ndërmjetës siguron softuer për ndërveprim me bursën dhe ofron mbështetje teknike për punë të tillë. Këto shërbime vijnë me një çmim, por ju nuk keni zgjidhje, pasi nuk mund të bëni pa ndërmjetës në bursë. Sidoqoftë, nëse tregtoni kriptomonedhë, keni qasje në çdo bursë. Pavarësisht moshës, statusit shoqëror, profesionit ose madhësisë së kapitalit tuaj, ju mund të plotësoni një formular regjistrimi në faqen e internetit të një burse (më mirë ta bëni në disa bursa), të depozitoni fonde për tregti dhe të filloni rrugën tuaj të një tregtari kriptomonedhash pa ndihmë nga kalimtarët e rastit.
Duhet të mos harroni se tregu i kriptomonedhës funksionon 24 orë në ditë/7 ditë të javës. Nuk mbyllet dhe as nuk hapet në një kohë të caktuar, si tregjet e zakonshme të aksioneve. Domethënë, çdo bursë e kriptomonedhës është “aktive” dhe funksionon pa gjumë e pushim.
Një nga përparësitë dhe sfidat kryesore të tregtisë së kriptomonedhës është paqëndrueshmëria. Ky tregues tregon intervalin e luhatjeve në vlerën e një aktivi për një periudhë të caktuar kohe. Mund të quhet një parakusht për tregtimin pasi një tregtar fiton nga diferenca midis çmimit të blerjes dhe çmimit të shitjes së një aktivi.
Sidoqoftë, kini parasysh se paqëndrueshmëria nuk është një vlerë konstante. Kjo varet nga shumë faktorë dhe nuk mund të parashikohet saktësisht (ndonjëherë paqëndrueshmëria madje krijohet artificialisht për të rritur çmimin për një monedhë të caktuar). Tregtarët bëjnë llogaritjet mbi të dhënat historike, të cilat janë formuar në kushte të vështira të tregut dhe që nuk do të përsëriten më kurrë. Prandaj, vlen të trajtohen treguesit si një pikë referimi e përafërt.
Por është paqëndrueshmëria ajo që e bën kriptomonedhën kaq tërheqëse për tregti. Të dhënat historike ende nuk janë grumbulluar (pasi kriptomonedha u shfaq vetëm disa vjet më parë dhe tregtia profesionale e kriptomonedhës është edhe më e re), dhe kushtet komplekse të tregut ndodhin pikërisht para syve tuaj.
Këtu dua t’ju paralajmëroj se paqëndrueshmëria mund të luajë në duart e një tregtari të suksesshëm, por gjithashtu mund të luajë hile të ndyra për një të sapoardhur.
Le të përmbledhim anët e mira dhe argumentet kryesore në favor të tregtisë së kriptomonedhës:
Qasje në bursë pa përfshirjen e ndërmjetësve
Bursat punojnë 24 orë në ditë/7 ditë të javës
Paqëndrueshmëria
Mendoj se e keni kuptuar që tregtia e kriptomonedhës nuk është vetëm një ide e modës e të ardhurave passive, që kërkon shtypjen e butonave “nis” dhe “ndalo”. Është një brez i vazhdueshëm i ideve dhe strategjive të reja që do t’ju ndihmojnë të fitoni para.
Shpresoj që ky libër të vendosë një gur themeli për tregtinë tuaj të suksesshme të kriptos. Në mënyrë që t’ju ndihmoj të shtrydhni sa më shumë nga këto faqe, zhvillova detyra praktike të shtëpisë, që mund t’i gjeni pas secilës pjesë të librit. Mund t'i bëni në çdo kohë që ju përshtatet, por ju kërkoj të mos vazhdoni në pjesën tjetër përpara se të përfundoni detyrën për pjesën e mëparshme.
Pse? Do ta përsëris (nëse nuk e keni kuptuar akoma): tregtia nuk ka të bëjë me teori, ka të bëjë me praktikë. Prandaj, nëse jeni dembel të praktikoni çdo instrument për të cilin keni lexuar, atëherë pasi të lexoni librin, do t’ia ngulësh sytë grafikut duke mos qenë në gjendje të kuptosh gjësend. Nga ana tjetër, kjo do të çojë menjëherë në vendime të pasakta tregtare dhe, si rrjedhojë, në humbje financiare. Çfarë priren të bëjnë njerëzit në raste të tilla? Ashtu është, kërkojnë fajtorin. Bëni detyrat e shtëpisë, mësoni praktikat tuaja më të mira dhe mos u përpiqni të më fajësoni mua për fatkeqësitë tuaja, nëse merrni vendime të gabuara, sepse nuk keni bërë praktikë.
Nuk mund ta kryej rolin e trajnerit personal dhe nuk e ndjek këtë qëllim. Nuk mund të qëndroj pranë shtratit tuaj, duke treguar me gisht tregues librin, duke ju nxitur të bëni detyrat e shtëpisë. Varet nga ju që të vendosni nëse do të bëni detyrat, ndaj edhe rezultatet varen nga ju.
Për ta përmbledhur, shpresoj që lexuesit e mi të jenë tregtarë të suksesshëm në të ardhmen; prandaj, ata janë gati të studiojnë dhe punojnë shumë sot për përfitime në të ardhmen.
Kështu që nuk do të vonoj fillimin e trajnimit tuaj, por dua të vë në dukje se ky proces nuk duhet të jetë i njëanshëm. Prandaj, nëse keni përfituar nga libri im, do t’ju jem mirënjohës për reagimet tuaja të sinqerta në Amazon. Nëse gjeni ndonjë pyetje ose nuk gjeni shpjegime të mjaftueshme në disa pjesë, mos ngurroni të më dërgoni mesazh me postë elektronike. Asistenti im do të strukturojë të gjitha pyetjet kurse unë do të përpiqem të zbuloj më shumë detaje në botimin tjetër.
A jeni gati të filloni trajnimin? Atëherë le t’ia nisim punës!
P.S. Të gjitha fotografitë në libër mund t’i shihni me cilësi të lartë këtu – bit.ly/pics-cpro
Kapitulli 1. Kuptimi i tregut të kriptomonedhës dhe Psikologjia e lojës
N
ë mënyrë që të kuptojmë natyrën e tregtisë në përgjithësi dhe tregtinë e kriptomonedhave në veçanti, duhet të zhytemi në disa procese financiare, pjesë e të cilave jemi të gjithë.
Meqenëse të gjithë ne përdorim shërbimet e sektorit bankar dhe, jo vetëm shpenzojmë ose vendosim paratë tona të merituara plotësisht në depozitë, por, duke ëndërruar për një të ardhme të kthjellët në fund të jetës, transferojmë edhe një pjesë të të ardhurave te fondet e pensionit, sigurimet shoqërore dhe pensionet, ne automatikisht bëhemi pjesëmarrës të sistemit bankar dhe tregut të aksioneve. Paguajmë kontribute pensioni gjatë gjithë jetës, por pak prej nesh mendojnë për vetë strukturën e industrisë financiare dhe se si e përdor shteti pensionin tonë të ardhshëm.
Fatkeqësisht, sistemi financiar në çdo vend është ndërtuar në mënyrë të tillë që ne të mos e zotërojmë kapitalin tonë. Lëvizja rrethore e huave dhe kontributeve të pensioneve i bën paratë disi virtuale pasi ato rrëshqasin vazhdimisht nëpër gishtat e shtetit, menaxherëve të fondeve dhe korporatave private. Në të njëjtën kohë, bankat qendrore në çdo shtet ushtrojnë monopol të emetimeve në lidhje me monedhën, dhe ky funksion u është caktuar atyre nga shteti. Nga ana teorike, monedha sigurohet me mallra ose produkte të prodhuara në territorin e një vendi. Kështu formohet GDP e saj. Në të njëjtën kohë, bankat qendrore angazhohen për të ruajtur besueshmërinë dhe stabilitetin e monedhës kombëtare.
Duket se gjithçka është e qartë dhe e sigurtë, por problemi është se kjo është thjesht një pamje ideale. Për fat të keq, realiteti është disi ndryshe. Shteti dhe bankat qendrore nuk arrijnë të përmbushin detyrimet e tyre për të siguruar stabilitetin e monedhës dhe vetë vlera e parave zhduket për shkak të inflacionit dhe lehtësimit sasior. “Si u zhduk? Nuk na informuan për këtë!” mund të përmendni me të drejtë. Do të përpiqem të mbështes deklaratën time.
Vlera e parave, përfshirë kursimet e pensioneve, dhe, për këtë arsye, qëndrueshmëria e së ardhmes sonë, dukej më optimiste para vitit 1976. Deri në atë kohë, sistemi i pensioneve funksiononte si më poshtë: njerëzit depozitonin para në Fondin e Pensionit, interesi grumbullohej në depozita, dhe shteti i përdorte ato fonde për të bërë pagesa. Por të ashtuquajturat Marrëveshjet e Xhamajkës2 e ndryshuan disi rrjedhën e historisë.
U vendos që të zhvlerësohej ari dhe ari u shndërrua në një mall këmbimi të zakonshëm. Kështu, të gjitha marrëveshjet e miratuara brenda kornizës së Marrëveshjeve të Xhamajkës lejuan që çmimi i arit të hidhej në bursë në lidhje me dollarin amerikan dhe monedhat e tjera. Ishte një lloj thirrjeje për shumë vende që të hiqnin qafe arin. Vendet nuk e vonuan vendimin përkatës. Një seri vendesh botërore vendosën ta braktisin këtë metal të çmuar dhe të mos e lidhin monedhën e tyre kombëtare me rezervën e arit të vendit.
Ju kërkoj të përqendroheni në këtë çast sepse, që nga viti 1976, sistemi i kredive të secilit vend është rritur qindra mijëra herë!
Marrëveshjet e Xhamajkës i kthyen paratë në shifra. Sistemi filloi të unifikohej pasi ari u braktis, duke marrë formën e llogarive bankare të mëdha të unifikuara, që nuk janë të rezervuara ose të garantuara. Sa i përket Fondit të Pensionit, ai nuk është më një lloj kasaforte për kursimet tuaja. Është një lloj fondi mbrojtës3, që mbledh aktivin nga ju si investitor dhe më pas e përdor atë sipas dëshirës. Fondet tona të pensionit u bënë pjesë e buxhetit të shtetit dhe filluan të përdoren për nevoja të tjera të qeverisë. Tani Fondi i Pensionit është një lloj llogarie bankare. Nëse analizoni sistemin e pensioneve të vendeve më të zhvilluara të botës, do të zbuloni se fondet e pensioneve shpenzohen për nevoja të tjera shoqërore. Kjo është arsyeja pse depozitat e pensioneve nuk ekzistojnë diku në një llogari.
Pavarësisht nga të gjithë këta faktorë, klasa e mesme ka mbetur forca lëvizëse e sistemit të pensioneve, i cili nuk mbështetet më nga asgjë. Shumica e njerëzve nuk shqetësohen se si i përdor paratë fondi i pensioneve, kështu që ata vazhdojnë të rimbushin rezervat e tij. Ashtu si bletët në një zgjua, ata sjellin rregullisht mjaltë në sistem, por nuk arrijnë ta përdorin këtë mjaltë.
A nuk ju kujton kjo një piramidë? Dhe nuk po flas për piramidat në Egjipt!
Më lejoni të përmend që jo vetëm sistemi i pensioneve por sistemi bankar në tërësi, ka shenjat e kësaj skeme piramidale. Të gjithë pjesëmarrësit në këtë sistem marrin të ardhura vetëm në kurriz të prurjes së “gjakut të ri”, d.m.th., marrjes së investimeve të reja nga pjesëmarrësit e rinj.
___________________________________
2 Marrëveshjet e Xhamajkës ishin një sërë marrëveshjesh ndërkombëtare që ratifikuan fundin e sistemit monetar të Breton Udsit
3 Është një fond investimesh që mbledh kapital nga individë të akredituar ose investitorë institucionalë dhe investon në një larmi aktivi, shpesh me teknika komplekse të ndërtimit të portofolit dhe administrimit të rrezikut. Administrohet nga një firmë profesionale e menaxhimit të investimeve dhe shpesh strukturohet si një ortakëri e kufizuar, kompani me përgjegjësi të kufizuar, ose mjete komunikimi të ngjashme.
Meqë ra fjala, ne kemi diskutuar krizën e sistemit financiar, por duhet të theksohet se tregtia gjithashtu përjetoi periudhën e saj të kushtëzuar. Ajo nuk shoqërohet me Marrëveshjet e Xhamajkës në 1976, por me krizën globale financiare të vitit 2008. Kriza, si dhe disponueshmëria e sistemeve të lëvizshme dhe mbizotërimi i vetë tregtisë, i ndaloi tregtarët profesionistë të fitonin shuma të tepruara parash.
Është interesant fakti që kriza dhe revolucioni në tregti u organizuan nga bankat më të mëdha në botë të investimeve. Në përpjekje për të mashtruar njëra-tjetrën, ato luajtën një lojë të pandershme, duke shpikur derivate të ndryshme (dëftesa garancie, bono, etj.). Produkte të tilla, të shpikura nga bankat, filluan të ngatërrojnë situatën në treg. Vala e parë e rënies u shfaq në treg në vitin 1998, por më pas situata u rregullua. Sidoqoftë, në vitin 2008, edhe reputacioni i një tregtari, i cili i sjell të gjithë sistemit shuma të mëdha parash, nuk mund të parandalonte përmbysjen e tregut dhe fillimin e një krize ekonomike globale.
Kështu, besoj se të gjitha bankat e investimeve kanë diskredituar veten e tyre si institucione profesionale, që mund të besohen për të menaxhuar financat. Kjo situatë përfundoi me tregtarët e vërtetë profesionistë, që u shpërngulën në fonde mbrojtëse.
Besoj se ka ardhur koha për të bërë paralelen e parë midis parave tradicionale (të pashkëmbyeshme) dhe kriptomonedhës. Siç e kujtojmë, vendimet e marra brenda kornizës së Marrëveshjeve të Xhamajkës bënë që vlera e parave të ulej ndjeshëm, sepse i tërë cikli i monedhës filloi të ndërtohej vetëm mbi bazën e borxheve. Përkundrazi, vlera e kriptomonedhës vazhdon të rritet. Për më tepër, kriptomonedha nuk i nënshtrohet inflacionit, pasi krijimi i monedhave të reja vjen nga një algoritëm i parashikueshëm, jo nga një bankë qendrore.
Kështu, nëse mendojmë për çështjen e pensionit në kontekstin e informacionit të sipërpërmendur, mund të nxjerrim përfundimet e mëposhtme:
Ju duhet të “ndreqni velat tuaja ndërsa moti është i mirë”, d.m.th., të mendoni për të ardhura të mira në pleqëri pikërisht tani
Ju duhet të kërkoni një alternativë për një pension
Tregtimi mund të jetë një nga alternativat e tilla për një pension. Sidoqoftë, shumica dërrmuese e njerëzve e anashkalojnë këtë mundësi të fitimeve, sepse ata besojnë se ky lloj aktiviteti kërkon të jesh një gjeni financiar dhe të kesh një talent të lindur për tregti. Njerëzit mbushin kokën me përkufizime të tilla si “modeli”, “analiza”, “modelimi teknik”, “konfigurimet e shandanëve” dhe, për këtë arsye, ata zgjedhin mundësi të tjera, më të thjeshta, kështu mendojnë ata, për të fituar.
Por dua t’ju gëzoj: të jeni në marrëdhënie të mira me të gjitha konceptet e lartpërmendura është një mit. Në mënyrë që të jeni të suksesshëm në tregti, duhet të zotëroni konceptet themelore të tregtisë dhe parimet e punës në bursa. Ju duhet vetëm të kuptoni mekanikën kryesore të tregut: kush shet dhe si dhe kush blen dhe si. Por nuk keni nevojë të rishpikni rrotën. Gjithçka e nevojshme dihet tashmë.
Prandaj, fillimi i “profesionit” të një tregtari kërkon zotërimin e parimeve themelore të tregut, gjetjen e mënyrës së analizimit (d.m.th., vlerësimin e situatës aktuale) dhe, si rezultat, marrjen e vendimeve tregtare.
Në të njëjtën kohë, dua të shpërndaj shpresat e atyre të sapoardhurve që i kanë përgatitur tashmë portofolet e tyre për super fitime, por do t’i kushtojnë disa orë në javë kësaj çështjeje. Për t’u bërë të suksesshëm, që do të thotë të fitoni të ardhura të mira, do t’ju duhet të përditësoni vazhdimisht veten, të ecni krah për krah me metodat e reja, të ndiqni tregtarë me përvojë, të lexoni lajmet e tregut, etj. Prandaj, fitimi pa mundim nuk do t’ju bëjë punë këtu, miq!
Në të njëjtën kohë, tregtarët duhet të qëndrojnë të qetë dhe të përqendruar. Më lejoni t’ju kujtoj se tregu i kriptomonedhës është shumë i paqëndrueshëm, por përkundër kësaj, tregtarët duhet të bëjnë parashikime për kohën më të mirë për hyrjen dhe daljen nga tregu. Dhe të gjitha këto operacione të rrezikshme duhet të përsëriten here pas here. Prandaj, ekuilibri emocional është një nga miqtë më të mirë të tregtarit. Do të kthehemi edhe disa herë në psikologjinë e një tregtari të suksesshëm.
Tani le të prekim shkurtimisht aktorët e tregut të kriptomonedhës. Është e nevojshme të bëhet dallimi midis dy llojeve të tregtarëve: tregtarët profesionistë dhe tregtarët me pakicë. Grupi i parë përfshin ata që i janë nënshtruar trajnimit dhe çertifikimit të veçantë. Si rregull, njerëz të tillë punojnë në kompani të mëdha investimesh dhe spekulojnë në treg me shuma “të rregullta” parash. Një tregtar me pakicë kryen veprime tregtare në treg pa pasur një licencë të veçantë. Njerëz të tillë punojnë për veten e tyre dhe, si rregull, administrojnë shuma shumë më të vogla.
E keqja e punës së tregtarëve profesionistë është se ata nuk zotërojnë fondet që administrojnë. Në të njëjtën kohë, tregtarët profesionistë punojnë me kartelë që regjistron orët e tyre të punës, duke u përpjekur të mbijetojnë në një konkurrencë të ashpër. Përkundrazi, tregtarët me pakicë mund të marrin vendime sipas dëshirës.
Meqenëse e konsideroj si detyrën time jo vetëm t’ju mësoj, por edhe t’ju paralajmëroj, dua të vë në dukje se tregtarët me pakicë duhet të jenë gjithmonë të gatshëm të humbin kapitalin e tyre pasi ekziston një rregull i pathënë në treg, i quajtur “90.90.90” që do të thotë se 90% e tregtarëve humbin 90% të kapitalit të tyre në 90 ditët e para të punës. Të gjitha këto fonde të humbura nuk shpërndahen. Ato qëndrojnë në treg.
Kuptimi i tregut të kriptomonedhës
Pasi të jemi marrë me të gjitha grackat e sistemit bankar dhe të pensioneve, le të përcaktojmë: ÇFARË ËSHTË TREGTIA E KRIPTOMONEDHËS? Kam tre përgjigje për këtë pyetje për ju:
1 Është një mundësi për të filluar të fitosh para duke investuar në një kriptomonedhë
2 Është një mundësi për të bërë një pasuri në një periudhë të shkurtër kohe
3 Është një instrument fitimprurës me pak rrezik nëse tregtohet si duhet
Duke e ditur për përvojën time të pasur në këtë fushë, lexuesit e mi shpesh më bëjnë edhe pyetjet e mëposhtme:
A ia vlen të investosh në kriptomonedhë tani?
A ia vlen të tregtohet në tërësi?
Pse duhet të analizojmë kriptomonedhën?
Si mund të investoj pa pasur përvojë?
A është më mirë të investoni vetë apo t’ia besoni këtë profesionistëve?
Jam i sigurt që të gjitha këto pyetje ju kanë kaluar në mendje, por le të fillojmë së pari me parimet themelore.
Kriptomonedha4 është një lloj monedhe digjitale, krijimi dhe kontrolli mbi të cilën bazohet në metodat kriptografike. Si rregull, kriptomonedha përdor kontroll të decentralizuar, d.m.th., nuk ka organe rregullatore në këtë fushë. Kontrolli i decentralizuar i secilës kriptomonedhë funksionon përmes teknologjisë së regjistrit të shpërndarë, në mënyrë tipike një bllok zinxhir5. Informacioni në lidhje me transaksionet zakonisht nuk është i koduar dhe është i disponueshëm në domenin publik. Për të siguruar vazhdimësinë e zinxhirit të blloqeve të transaksionit, përdoren elementet e kriptografisë (nënshkrimi digjital i bazuar në një sistem të çelësit publik).
Tani më lejoni t’i përgjigjem pyetjes, pse kriptomonedha është kaq e rëndësishme për mua.
Kriptomonedha ka mbetur aktivi më fitimprurës në vitet e fundit, si dhe aktivi i vetëm që një investitor joprofesionist mund të përdorë për të rritur disa herë kapitalin e vet. Nuk keni nevojë për njohuri të jashtëzakonshme, kontakte të dobishme sociale ose investime të mëdha fillestare.
_____________________________
4 Një kriptomonedhë (ose monedhë kripto) është një aktiv digjital i krijuar për të punuar si një mjet këmbimi që përdor kriptografi të fortë për të siguruar transaksione financiare, për të kontrolluar krijimin e njësive shtesë dhe për të verifikuar transferimin e aktivit. Kriptomonedha është një lloj monedhe alternative dhe monedhe digjitale (nga e cila monedha virtuale është një nëngrup).
5 Një bllokzinxhir, fillimisht bllok zinxhir, është një listë në rritje e të dhënave, të quajtura blloqe, të cilat lidhen duke përdorur kriptografinë. Secili bllok përmban një hash kriptografik të bllokut të mëparshëm, një vulë kohore dhe të dhëna të transaksionit (zakonisht i paraqitur si një kompilim i rrënjës së pemës merkle).
Është një aktiv liberal dhe demokratik, i cili mund të rrisë kapitalin tuaj në mënyrë eksponenciale. Kjo është pika më tërheqëse e kriptomonedhës për mua. Mendoj se do të jeni dakord.
Por, pyetja më e shpeshtë është: si mund të përdorim mundësitë që kriptomonedha hap para nesh? Në vitin 2017, ishte pak më e lehtë për të përfituar nga këto mundësi. Shumë njerëz dhanë rezultate të mëdha vetëm duke investuar në monedha të ndryshme. Por viti 2018 filloi me rënien e madhe të kriptomonedhës. Njerëzit filluan të kërkonin mënyra të tjera për të përfituar nga kriptomonedha. Tregtimi është një mënyrë e tillë.
Nga njëra anë, përparësitë e tij janë pavarësia nga tregu dhe përfitimi i lartë. Për shembull, shumë kompani tregtare treguan rezultate interesante financiare deri në fund të vitit 2017. Por mos shpresoni se rruga e tregtimit është e lehtë (siç mund t’i duket dikujt), gjithashtu nuk është e shpejtë. Prandaj, duhet ta kuptoni se ekziston një numër i madh i mangësive dhe rreziqeve në tregtim. Dhe rreziku më i madh për një investitor të papërvojë është se rezultati i tregtisë varet nga një analizë cilësore e situatës së tregut dhe aktivit që do të blini. Është e vështirë për një fillestar. Megjithëse në vitin 2017 tregu ende mund të analizohej, tani ai është pothuajse plotësisht manipulues.
Disa prej jush mund të pyesin pse analiza është kaq e rëndësishme në tregtinë e kriptomonedhës. Analiza e kriptomonedhës është e nevojshme për të parashikuar sjelljen e një çmimi të monedhës në treg. Është analiza cilësore që rrit mundësinë e parashikimit të rezultatit të saktë të transaksionit. Nëse do të supozonit se, le të themi në dy ditët e ardhshme, Bitcoin do të ngrihej ose ulej duke hedhur një monedhë, do të hamendësonit rezultatin e duhur vetëm në 50% të rasteve. Është e pamundur të bësh një pasuri në këtë mënyrë. Analiza është e nevojshme për të përmirësuar cilësinë e supozimeve tona.
Çfarë duam të supozojmë?
1 Pika e hyrjes
2 Merrni fitim
3 Ndaloni humbjen (një kufizues i humbjeve që lejon minimizimin e humbjeve tuaja dhe pozicionin e mbylljes nëse diçka shkon keq).
Tani le ta diskutojmë atë në më shumë detaje.
Çfarë është një pikë hyrëse? Është një çmim i kriptomonedhës me të cilin ne hapim një pozicion. Në këtë pikë ka mundësi që çmimi të lëvizë në drejtim të parashikimit.
Merrni fitimin është çmimi me të cilin ne e mbyllim pozicionin me një fitim. Nëse gjithçka shkon sipas planit, jemi gati të themi “Mjaft” në këtë pikë.
Ndaloni humbjen është niveli i “ndërprerjes” së humbjeve, është çmimi me të cilin ne do të likuidojmë pozicionin me humbje në rast të një ndryshimi të pafavorshëm të çmimit. Për shembull, ne presim që një çmim të rritet nga 100 në 200, por ai rritet në 105 dhe pastaj bie. Për të shmangur situata të tilla, vendosim një çmim me të cilin duam të likuidojmë pozicionin nëse parashikimi ynë ndodh të jetë i gabuar.
Për të “hamendur” saktë më shpesh, aplikojmë tre lloje të analizave:
1 Thelbësore
2 Teknike
3 Kompjuter
Sidoqoftë, llojet e analizave janë një hallkë në një zinxhir. Ekziston nevoja për të kuptuar parimet themelore të funksionimit të tregut. Mbi të gjitha, nëse nuk keni asnjë ide për mekanizmin e brendshëm të një makine, nuk do të mësoni se si të ngani makinën siç duhet.
Prandaj, për të kuptuar tregun e kriptomonedhës, duhet të dini:
Parimet e monitorimit të tregut të kriptomonedhës
Shfaqja e tregut të kriptomonedhës, arsyet e suksesit të tij
Parashikimet dhe perspektivat e zhvillimit
Shërbime dhe faqe për tregtarët
Bursa për tregtim
Algoritmi i plotë i tregtisë
Ne do të merremi me të gjitha këto çështje në këtë libër.
Psikologjia e lojës
Jam gati t’ju shfaq përsëri diçka të papritur (imagjinoni këtu një të qeshur vesh më vesh si në filmat horror:)
Pra, nëse mendoni se, pasi të keni studiuar tregun, parimet e analizës themelore dhe teknike, do të bëheni një tregtar i suksesshëm, do t’ju zhgënjej – nuk është e mjaftueshme.
Keni harruar një aspekt shumë të rëndësishëm. Për të pasur sukses në tregti, gjithashtu duhet të kuptoni psikologjinë e lojës në tregun e kriptomonedhës. Për më tepër, është e nevojshme të bëhet dallimi midis psikologjisë së lojës së turmës dhe psikologjisë së lojës së pjesëmarrësve të tregut me kapital të madh.
Kur punon në tregje masivë spekulativë, një tregtar individual përballet me rreziqet e mëposhtme:
Vendimet e turmës bëhen në nivelin e anëtarit të saj më budalla. Pra, vendimet e marra nga turma nuk janë të mençura
Thashethemet shpesh kontrollojnë turmën dhe thashethemet nuk priren të justifikohen
Një person ka prirjen të ndikohet nga turma dhe të marrë vendime kolektive, jo individuale.
Prandaj, për të shmangur rreziqe të tilla, duhet të mësoni se si të dalloni transaksionet tuaja individuale nga transaksionet që bëni duke ndjekur shembullin e turmës. Ju duhet të përpiqeni të bëheni një lloj psikologu dhe të ndjeni momentin kur emocionet tuaja mund të dëmtojnë tregtinë.
Për cilat emocione po flas?
Emocioni i parë është lakmia.
Lakmia ndjek zakonisht një ndjenjë euforie. Vjen si pasojë e një përvoje të caktuar. Le të themi, ju keni një interes shumë të mirë në depozitën tuaj për herë të parë, kështu që i turreni një pasioni. Më pas, vini një bast tjetër – dhe jeni përsëri me fat. Pas kësaj, ju jap fjalën, nuk do të dëgjoni askënd. Do t’i kushtoni vëmendje çdo ideje të shëndoshë në mjedisin tuaj në lidhje me nevojën për të ndaluar një delir absolut. Po pse? Sepse keni filluar të ndiheni lakmitar!
Po si shfaqet lakmia në tregun e kriptomonedhës? Shumë tregtarë shpresojnë të blejnë monedhë me çmimin më të ulët dhe të shesin në çmimin më të lartë, d.m.th., ata nuk kërkojnë një pikë për të bllokuar fitimet e tyre, por mbajnë një monedhë, duke shpresuar se çmimi i saj do të rritet pafund.
Këshillë: nëse keni një mundësi për të mbyllur një marrëveshje dhe për të marrë një përfitim tani, më mirë ta bëni sesa të shpresoni për fat dhe të vazhdoni të prisni.
Emocioni i dytë është shpresa dhe pritja.
Pasi të bini në një kurth të lakmisë, filloni të ndjeni shpresë dhe pritje.
Në veçanti, ata njerëz që kanë ardhur në treg, me besimin se këtu do të fitojnë miliona dollarë, shpresojnë se gjërat do të punojnë për ta në afat të gjatë me pak përpjekje. Për fat të keq, nuk është aq e thjeshtë sa duket në shikim të parë. Për të fituar para këtu, do të duhet të punosh shumë.
Kur shfaqen shpresat dhe pritjet në tregun e kriptomonedhave? Kur shpresoni pa ndonjë arsye dhe prisni një çmim të kundërt.
Këshillë: duhet të kuptoni pse çmimi duhet të ndryshojë (duke përdorur të gjitha llojet e analizave), në vend që të shpresoni dhe të prisni.
Emocioni i tretë është frika.
Në shumicën e rasteve, ky emocion lind nga mosnjohja ose keqkuptimi se çfarë duhet të pritet. Për shembull, keni frikë nga errësira, por nëse thuhet e vërteta, keni frikë se nuk dini se çfarë mund të fshihet në errësirë. Prandaj, frika lind kur nuk keni përgjigje për disa pyetje.
Kur shfaqet frika në tregun e kriptomonedhës? Duket kur çmimi i monedhës fillon të bjerë. Dhe sa më ulët të bjerë çmimi, aq më e madhe është frika që ndjeni.
Çfarë bëjnë tregtarët kur i zë frika? Disa vazhdojnë të bëjnë blerje të reja, duke përdorur strategjinë e lëvizjes mesatare, ndërsa të tjerët mbyllin pozicionet pas rënies së parë. Sidoqoftë, ekziston një kategori e tretë e njerëzve: ata nuk bëjnë asgjë përveçse shikojnë si të dalldisur në grafik.
Këshillë: nuk ka asgjë më të keqe sesa të shikosh çmimin në rënie. Nëse filloni të ndjeni frikë në një moment të caktuar të tregtisë dhe bëni lëvizje të paplanifikuara, përcaktoni shkakun e frikës dhe ndërpriteni atë.
Për të hapur dhe mbyllur të gjitha pozicionet “sipas planit”, sigurohuni që të mbani ditarin e një tregtari. Nëse mendoni se është e lehtë të mbani mend të gjitha transaksionet dhe nuk keni nevojë për ditarin e një tregtari, keni zgjedhur të largoheni nga qasja profesionale drejt tregtimit, që ju çon në gabime të përsëritura.
Prandaj, gjatë tregtimit, duhet të largoni emocionet tuaja pasi ato do të kenë ndikim në grafikun tuaj (analiza teknike), në një mënyrë apo në një tjetër. Mendoni jo vetëm si analist, por edhe si psikolog. Identifikoni emocionet në fazat e hershme dhe ndërpritini ato në kohë.
Për të kuptuar psikologjinë e tregut, do t’ju duhet gjithashtu të studioni disa nga ligjet e tij, një listë të caktuar të rregullave të zbuluara në treg.
Ligji i fatit. Asnjëherë nuk e dini se çfarë mund të ndodhë në çastin tjetër, kështu që gjithmonë jini gati për gjithçka – si për kthime të mëdha ashtu edhe për humbje. Prandaj, merrni parasysh aksidentet e mundshme kur bëni llogaritjet e tregut.
Ligji i Sodit. Mund të bëni llogaritje dhe parashikime të përsosura dhe të merrni konfirmim në dukje 100%, por dikush ndryshon rregullat e lojës kur bëni një marrëveshje. Mos harroni kurrë për një gjasë të tillë. Jini të gatshëm të ndryshoni rregullat e lojës.
Ligji i optimizmit. Njerëzit janë të prirur t’i ekzagjerojnë shanset për të fituar. Ky ekzagjerim mund t’ju bëjë që të bëni marrëveshje me çmimet më të paimagjinueshme dhe çmimet e para të ofruara. Ndonjëherë armiku juaj më i keq është vetvetja!
Ligji i shkakut dhe pasojës. Nëse vëzhgoni ndonjë lëvizje, atëherë përpiquni të gjeni arsyen që e ka shkaktuar atë. Ju rekomandoj së tepërmi të mos bëni ndonjë marrëveshje pa e kuptuar se çfarë e bën çmimin të lëvizë në një drejtim ose në një tjetër. Nuk ka lëvizje pa ndonjë arsye.
Balenat në botën e kriptos
Ju ndoshta keni dëgjuar që tregu i kriptomonedhës është “i banuar” me brejtës, balena dhe shumë specie të tjera të kafshëve. Kjo mund të tingëllojë qesharake, por është e vërtetë. Imagjinoni që tregu i kriptomonedhës është oqeani. Si pasojë, tregtarët e zakonshëm janë peshq të vegjël në të, grupet e pompimit janë peshkaqenë dhe pronarët më të mëdhenj të aktivit janë balena. Balenat besohet se kontrollojnë tregun e kriptomonedhës dhe janë në gjendje ta ulin shumë atë në çdo moment. Por a është kështu, dhe a mund të përfitojnë investitorët e zakonshëm (si ne) nga veprimet e balenave? Le të shohim!
Kush janë balenat në tregun e kriptomonedhës?
Balenat janë lojtarë të mëdhenj, që zotërojnë sasi të mëdha të kriptomonedhës dhe mund të menaxhojnë tregun, duke blerë dhe shitur aktivin.
Të tilla balena strehohen edhe në tregun e zakonshëm të aksioneve, por ato kanë shumë më tepër mundësi në tregun e kriptomonedhës:
Sasia e kapitalit në tregun e kriptomonedhave (rreth 300 miliardë dollarë) është shumë më e vogël, kështu që është shumë më e lehtë të grumbulloni një numër të madh monedhash në duart tuaja sesa të përpiqeni të bëheni një balenë në një treg tradicional (me një sasi kapitali prej 65 trilionë dollarësh)
Balenat mund të menaxhojnë shuma të mëdha pa ndjerë ndonjë presion nga bankat dhe rregullatorët financiarë, pasi nuk ka ndonjë rregullim në shkallë të gjerë, pavarësisht nga realitetet e shtrëngimit të kontrollit të shtetit mbi kriptomonedhën
Tregu i kriptomonedhës është akoma shumë i ri dhe funksionon sipas ligjeve jo tipike në tregun tradicional. Çmimi i një kriptomonedhe përcaktohet nga kërkesa dhe mbajtësit e aktivit të madh mund ta manipulojnë atë.
Karakteristika kryesore e balenave është se ato zotërojnë sasi të mëdha të kriptomonedhës dhe qëllimi i tyre kryesor është të menaxhojnë çmimin e kësaj kriptomonedhe, për hir të përfitimit të tyre. Për këtë qëllim, një monedhë duhet të jetë shumë e popullarizuar dhe e kërkuar.
Çdo ditë, mijëra peshq të vegjël (investitorë të zakonshëm) derdhin paratë e tyre në oqeanin e përbashkët, ndërkohë që balenat po korrin përfitimet e tyre. Kjo është arsyeja pse tregu Bitcoin është me interes të veçantë për balena të tilla.
Le të shqyrtojmë tani se çfarë lloj balenash jetojnë në tregun e kriptomonedhës:
Adoptuesit e hershëm të Bitcoin, të cilët ishin të parët që verifikuan ose blenë sasi të mëdha monedhash, dhe tani kanë mijëra apo edhe dhjetëra mijëra Bitcoin në llogaritë e tyre
Investitorë të pasur, të cilët arritën të blinin sasi të mëdha Bitcoin në ditët e para të popullaritetit të kësaj monedhe
Investime të mëdha dhe fonde mbrojtëse
Ndërmarrjet e mëdha, që mund të blejnë ose verifikojnë një numër të madh monedhash për përfitimet e tyre (për shembull, bursat e kriptomonedhës ose prodhuesit e pajisjeve verifikuese).
Sipas të dhënave më të fundit, në kohën e shkrimit të këtij libri, rreth 80% e të gjithë Bitcoin të verifikuar u përkiste 110 personave. Ata janë balenat, që kanë leva reale të ndikimit në çmimin e tregut të Bitcoin.
Këtu është një listë e vogël e balenave më të famshme Bitcoin:
Roger Ver (150,000 BTC)
Bursa Binance (160,000 BTC)
Bursa Bitfinex (190,000 BTC)
Kompania Bitmain (350,000 BTC)
Binjakët Winklevoss (450,000 BTC)
Krijuesi i Bitcoin, Satoshi Nakamoto (thuhet se zotëron një milion monedha).
Nëse mendoni se vetëm Bitcoin është përqendruar në duart e një rrethi të ngushtë balenash, gaboheni. E njëjta gjë vlen për llojet e tjera të kriptomonedhës. Për shembull, 40% e të gjitha monedhave Ethereum janë të vendosura në 100 portofolet kryesore të kësaj monedhe. Me kriptomonedhat Qtum, Gnosis dhe Storj, kjo shifër arrin 90%.
Balenat Bitcoin janë më me ndikim në treg sepse bitcoin ka sasinë e kapitalit dhe vlerën më të lartë të tregut nga çdo monedhë.
Pavarësisht nga të gjitha këto fakte, dëgjoj pothuajse çdo ditë thirrjet e skeptikëve, që nuk ekzistojnë balena dhe se një grup i vogël njerëzish nuk mund të menaxhojnë çmimin e monedhës së kriptuar. Por faktet mbeten fakte dhe flasin vetë. Njerëzit me një sasi kolosale të kriptomonedhës në portofolet e tyre mund të menaxhojnë të gjithë tregun.
Pra, cilat strategji përdorin balenat në tregun e kriptomonedhës?
Do të nxjerr në pah disa strategji që përdorin balenat në tregun e kriptomonedhës.
Shpëlaj dhe përsërit. Truku kryesor i kësaj strategjie është ulja e çmimit për një kriptomonedhë të veçantë sa më shumë që të jeni në gjendje ta blini atë me çmimin më të ulët pak më vonë. Zbatimi i kësaj strategjie është njësoj si marrja e ëmbëlsirave nga një foshnjë: balena shet aktivin e saj në një shkallë të gjerë me një çmim poshtë atij të tregut kurse peshqit e vegjël e të zakonshëm, të frikësuar nga një kolaps i kriptomonedhës, gjithashtu fillojnë të shesin aktivin e tyre. Si rezultat, çmimi i kriptomonedhës bie edhe më poshtë dhe më pas balena blen monedha me këtë çmim të rënë. Blerja në shkallë të gjerë bën që çmimi të rritet përsëri, dhe balena përsërit ciklin e saj.
Ja ku kemi një shembull. Një balenë ka 10,000 BTC. Çmimi aktual është 6,000 dollarë, dhe balena vendos urdhra për të shitur Bitcoin për 5800 dollarë. Supozoni se ajo “hedh” 6,000 BTC në treg. Pasi e kanë vërejtur këtë, tregtarët e zakonshëm përcaktojnë që Bitcoin ndjek prirjen e rënies ose uljes së tregut. Prandaj, ata fillojnë të heqin qafe aktivin e tyre. Nëse kjo bëhet masive (kjo është ajo që balenat po përpiqen të arrijnë), çmimi i Bitcoin mund të bjerë në 5,000 dollarë ose edhe më ulët. Në këtë rast, balena do të fitojë sërish 6,000 BTC e saj, të cilat ajo i kishte shitur më parë, dhe do të blinte më shumë monedha me një çmim të reduktuar.
Dhe tani le të numërojmë. Balena shiti 6,000 BTC për 34 milion dollarë. Nëse çmimi bie në 5,000 dollarë, ai do të jetë në gjendje të blejë 7,000 BTC me këto para. Domethënë, fitimi i tij i ndyrë do të arrijë në 5 milion dollarë. Ky është vetëm një raund “shpëlarjeje” dhe balena është e interesuar të “shpëlajë” sa më shumë monedha nga tregtarët e zakonshëm.
Mashtrimi. Qëllimi kryesor i një balene në këtë strategji është të bëjë lojtarët e tjerë të besojnë në një ulje çmimi ose rritje të një kriptomonedhe të veçantë. Për ta bërë këtë, balena nuk ka nevojë as të hedhë aktivin e saj në treg pasi mjafton të bëjë porosi të mëdha në bursë dhe t’i anulojë ato para se të ekzekutohen. Për më tepër, kjo strategji përfshin porosi të blerjes dhe shitjes.
Në rastin e parë, balena bën një porosi për të blerë një sasi të madhe të kriptomonedhës (për shembull, Bitcoin), duke e rritur kështu murin e shitjes. Tregtarët e tjerë e shohin këtë dhe fillojnë të blejnë në masë Bitcoin, duke pritur një rritje të çmimit. Balena pret derisa çmimi të arrijë kulmin, anulon porosinë dhe shet një pjesë të aktivit të saj me një çmim të mbivlerësuar.
Në rastin e dytë, balena bën një porosi për të shitur një sasi të madhe të Bitcoin me një çmim nën vlerën e tregut. Tregtarët e zakonshëm godasin butonin e panikut dhe hedhin aktivin e tyre. Balena pret rënien maksimale të çmimit, anulon porosinë e vet dhe blen Bitcoin.
Pika kryesore e kësaj strategjie është vendosja e porosive që nuk mund të ekzekutohen.
Për shembull, nëse një balenë shet 10,000 BTC me një çmim të ulët dhe pjesa tjetër e tregtarëve kanë para të mjaftueshme për t’i blerë, balena thjesht do të humbasë aktivin e vet. Nëse tregtarët nuk arrijnë të blejnë të gjithë shumën, pjesa tjetër e lojtarëve, ose do t’u duhet të presin derisa të ekzekutohet porosia ose të ulin vetë çmimin e shitjes. Dhe kjo luhet për interesin e balenës.
Lojë jashtë bursës. Disa ekspertë besojnë se shumë balena në tregun e kriptomonedhës tregtojnë aktiv në tregun jashtë bursës (OTC). Është një lloj tregu i zi ku balenat mund të blejnë një sasi të madhe monedhash, pa praninë e publikut. Tregtimi jopublik kryhet në grupe të mbyllura, përmes ndërmjetësuesve kryesorë OTC ose në bursat që ofrojnë të ashtuquajturat “tarifa private”. Ndërmjetësit, të cilët u ofrojnë klientëve të tyre çmime më të ulëta dhe punojnë vetëm me lojtarët më të mëdhenj, janë me interes të veçantë për balenat.
Për shembull, ndërmjetësit e mirënjohur jashtë bursës, Circle and Cumberland, e kanë kufizuar hyrjen për anëtarët e rinj: 100,000 dollarë është tarifa për hyrjen në rrethin e të preferuarve, 250,000 dollarë – për tregtinë e kriptomonedhës.
Duke punuar përmes ndërmjetësuesve të tillë, balenat mund të blejnë kriptomonedhë nga njëra-tjetra dhe madje të koordinojnë veprimet e tyre. Pasi të kenë blerë një numër të madh monedhash, ato shkojnë në bursa të zakonshme dhe ndikojnë në çmimin e kriptomonedhës, sipas nevojës.
Mund të duket se balenat janë pompistë të rangut të lartë. Sidoqoftë, nuk është kështu. Pompistët rrisin çmimin altcoin, të përshtatshëm për Pompo & Zbraz6. Ata bëjnë një rrëmujë në komunitetin e kriptomonedhës, manipulojnë hallkat e lajmeve, mbledhin grupe pompistësh për të blerë monedha, e kështu me radhë. Megjithatë, balenat lëkundin tregun drejt çmimit preferencial të një aktivi që ato mbajnë. Gjithashtu ato veprojnë shpesh së bashku dhe objektivi kryesor i shumicës së balenave është Bitcoin. Altcoins pak të njohur nuk u interesojnë atyre.
Si ndikojnë balenat në tregun e kriptomonedhës?
Shumë investitorë besojnë se balenat kanë një ndikim negativ në tregun e kriptomonedhës, duke privuar lojtarët e vegjël nga fitimet e tyre. Për më tepër, komuniteti i kriptomonedhës ka diskutuar prej kohësh teoritë e konspiracionit duke thënë se balenat duan ose të përmbysin të gjithë tregun, ose të sigurojnë kontrollin e tyre të plotë mbi të. Le të përpiqemi t’i përgjigjemi kësaj pyetjeje duke analizuar argumentet e teoricienëve të konspiracionit.
____________________________________
6 Pompo dhe zbraz (P&Z) është një formë e mashtrimit të letrave me vlerë që përfshin fryrjen artificiale të çmimit të një aksioni në pronësi përmes deklaratave pozitive false dhe mashtruese, në mënyrë që të shesë aksionet e blera lirë me çmim më të lartë. Pasi operatorët e skemës “zbraz” shesin aksionet e tyre të mbivlerësuara, çmimi bie dhe investitorët humbasin paratë e tyre. Kjo është më e zakonshme me kriptomonedhat me kapital të vogël dhe korporatat shumë të vogla.
Për shembull, ja ku kemi një teori: balenat po grumbullojnë Bitcoin për të kontrolluar tregun pasi të mbarojë epoka e verifikimit. Sipas llogaritjeve, të gjitha Bitcoin do të verifikohen brenda 5-6 viteve dhe përftuesit do t’u duhet të transferojnë rrjetin në verifikimin-PeS7, që do të thotë se mbajtësit më të mëdhenj të monedhave – balenat – do të përfitojnë më shumë nga shpërblimet PeS. Në ditët e sotme, shumë njerëz pretendojnë se përmbysja e Bitcoin, e cila filloi në dimrin e vitit 2018, u shkaktua nga balenat. Ato po përgatiten tashmë për verifikimet e PeS dhe po bëjnë gjithçka që munden për të blerë sa më shumë monedha. Sidoqoftë, për shkak të rënies së çmimit Bitcoin, një numër i madh i përdoruesve u larguan, ndërsa shumë investitorë të mundshëm nuk kanë hyrë në të, duke pritur vjeshtën e ardhshme. Bitcoin filloi të ndiqte një prirje në rënie, dhe kjo nuk ndikoi vetëm në xhepin e tregtarit të zakonshëm.
Në fakt, balenat kanë nevojë për kriptomonedhë, që të jenë të njohura dhe të kërkuara me numrin më të madh të mundshëm të lojtarëve. Në fund të fundit, kur aktivi i balenave bie në çmim, portofolet e tyre gjithashtu bëhen më të lira. Në planin afatgjatë, është e padobishme për to që të përmbysin monedhën e kriptuar.
_____________________________
7 Prova e rrezikut (PeS) është një lloj algoritmi me të cilin një rrjet i zinxhirit bllok të kriptomonedhave synon të arrijë konsensusin e shpërndarë. Në kriptomonedhat e bazuara në PeS, krijuesi i bllokut tjetër zgjidhet përmes kombinimeve të ndryshme të zgjedhjes së rastit dhe pasurisë ose moshës (d.m.th., rrezikun).
Sidoqoftë, ka mendime të tjera rreth balenave në tregun e kriptomonedhës. Disa thonë se nuk janë një fenomen negativ. Lojtarë të tillë ekzistojnë në çdo treg. Ata gjithmonë vendosin vektorin e zhvillimit dhe bashkohen për të udhëhequr tregun. Prandaj, balenat, në një farë mase, ushtrojnë edhe një ndikim pozitiv në treg. Mbi të gjitha, ndërkohë që janë të interesuara për kriptomonedhën që mbajnë, ato janë të interesuara edhe për të parandaluar përmbysjen.
Për më tepër, shumë balena (përfshirë Nakamoto) nuk e përdorin as aktivin e tyre për të ulur ose rritur çmimin e kriptomonedhës. Ata mbajnë monedha në portofolet e tyre, duke ruajtur një ekuilibër në treg.
Duhet të përmendet se edhe ato balena që luajnë me muret e shitjes dhe shpëlajnë Bitcoin mund të jenë të dobishme për një investitor të zakonshëm. Për t’i përdorur për përfitimin tuaj, duhet të kapni valën që ato krijuan.
Si mund të përfitojë një investitor i zakonshëm nga veprimet e balenave?
Po, e keni kuptuar mirë. Ju mund të përfitoni nga balenat. Një valë e krijuar nga një balenë është një mundësi ideale për të hyrë në treg. Për shembull, kur një balenë bëhet prurëse dhe bën porosi për të shitur sasi të mëdha të kriptomonedhës, me një çmim më të ulët se tregu, çmimi bie natyrshëm. Shumica e tregtarëve fillojnë të shesin aktivin e tyre, por do të ishte shumë më e mençur të fillonin t’i blinin ato siç bën një balenë. Kur një balenë rrit murin e blerjes dhe tregtarët e tjerë fillojnë të blejnë kriptomonedhë, duke rritur çmimin, është koha për të shitur aktivin tuaj.
Këtu, nuanca më e rëndësishme është të qenit në gjendje të vëreni prirjen e një balene në kohë. Ka dy mënyra për ta bërë këtë:
Të monitoroni lëvizjen e fondeve (në veçanti, Bitcoin) në kuletat më të mëdha të kriptomonedhës. Këtë mund ta bëni në www.bitinfocharts.com. Një transferim i madh nga portofoli tregon se një balenë po hedh aktivin e saj në treg, që do të thotë se duhet të presim ndryshimet e çmimit. Nëse bie shpejt, ka kuptim të blini shpejt kriptomonedhën, nëse ngrihen befasisht – ta shisni shpejt. Sinjali më i qartë është kur transferimet bëhen nga disa portofole kryesore.
Të ndiqni rendin e porosive në këmbimet e nivelit të lartë të kriptomonedhës. Vendosja e porosive për të blerë ose shitur sasi të mëdha të kriptomonedhës lidhet kryesisht me lojërat e balenave. Nëse shihni një mur të mbivlerësuar të blerjes, mos nxitoni të blini monedha. Më mirë të prisni kulmin dhe të shisni aktivin tuaj me një çmim të dobishëm. Nëse një balenë ruan një pamje të ngjashme me atë të përmbysjes (duke mbivlerësuar murin e shitjes), prisni për një ulje të madhe dhe blini monedha. Mbi të gjitha, së shpejti një balenë do t’i blejë ato lirë dhe do të rrisë çmimin.
Do t’ju jap një këshillë: nëse jeni një tregtar i papërvojë, mos ndiqni prirjet e balenave. Për të luajtur si ato, duhet të mendoni si ato. Duhet të jeni në gjendje të përcaktoni muret e mbivlerësuara të blerjes dhe shitjes, të analizoni situatën e përgjithshme në treg dhe të vlerësoni saktë situatën në bursa. Nëse keni aftësi të tilla, do të jeni në gjendje të gjeneroni fitime.
Perspektivat për zhvillimin e tregut të kriptomonedhës
A keni menduar ndonjëherë pse kriptomonedha po bëhet gjithnjë e më e popullarizuar? Kjo ndodh kryesisht sepse fuqia blerëse e parave të pashkëmbyeshme vazhdon të bjerë. Ky proces drejtohet nga dy faktorë kryesorë:
Një numër në rritje i njerëzve mësojnë rreth Bitcoin dhe vijnë në përfundim se ajo është monedha më premtuese
Rritet aftësia paguese. Blerja e Bitcoin sot kërkon shumë më pak para dhe përpjekje sesa një vit më parë.
Sipas mendimit tim, këta faktorë madje mund të provokojnë hiperbitcoinizimin.
Hiperbitcoinizimi mund të ndodhë nëse qeveritë botërore vendosin të shtrëngojnë vidat në tregun e kriptomonedhës dhe të përpiqen të kontrollojnë kapitalin. Bitcoin do të ketë një shans të bëhet monedha Nr.1. Mbi të gjitha, ajo nuk ka kufij, dhe nuk varet nga patriotizmi ose përkatësia etnike e një personi. Edhe pse përdorimi i Bitcoin nuk bazohet në vetitë fizike, si ari dhe argjendi, por në vetitë matematikore, ajo i ka të gjitha karakteristikat e parave (qëndrueshmëri, lëvizshmëri, pjesëtueshmëri) dhe mund të kryejë plotësisht funksionet e saj (mjetet e grumbullimit, pagesës, etj.). Çmimi real për Bitcoin përcaktohet nga ekuilibri midis kërkesës së njerëzve që kanë nevojë për të dhe furnizimit të njerëzve që e kanë atë.
Për të përfunduar këtë pjesë, dua të them sa vijon: nëse vendimi juaj për të zotëruar tregtinë e kriptomonedhës është i vendosur dhe i pakthyeshëm, atëherë nuk ju rekomandoj që të kërkoni ndihmën e tregtarëve profesionistë. Natyrisht, secili prej tyre mund të premtojë të shpjegojë strategji të thjeshta dhe efektive të tregtisë. Sidoqoftë, duhet të kuptoni që një tregtar profesionist nuk do të tregojë metodat e tyre të analizës, grafikët ose të zbulojë sekretet personale ndaj një të panjohuri. Prandaj, rruga e një tregtari me pakicë është shumë më e shkurtër dhe më fitimprurëse me anë të mënyrave praktike. Ju tashmë e keni përfunduar hapin e parë kur të keni blerë librin tim.😊
Detyrë shtëpie
Zgjidhni 5 kriptomonedha që dëshironi të tregtoni, studiojini ato dhe shkruani tiparet e tyre:
● Sasia e kapitalit
● Bursat në të cilat tregtohen
● Vëllimi i tregtisë
● Zgjidhje teknologjike të një monedhe
● Llogaritë Twitter të krijuesve të monedhave
● Vendndodhja e zyrës qendrore
Kapitulli 2. Zgjedhja e bursës dhe platforma e analizës teksnike
P
as një njohurie bazë lidhur me thelbin e tregut të kriptomonedhave dhe psikologjinë e lojës së pjesëmarrësve të saj, hapi tjetër në rrugën e afrimit tuaj me tregtinë do të jetë regjistrimi në një bursë. Bursa është mbreti në tregti. Ne i besojmë asaj paratë tona. E vizitojmë atë ditë e natë për të kontrolluar thellësinë e tregut dhe ekzekutimin e porosive, etj.
Mos u frikësoni me rëndësinë e zgjedhjes së një burse të përsosur. Po ju paralajmëroj: ajo nuk ekziston. Çdo bursë që vepron tashmë në tregun e kriptomonedhave ka anët e saj të mira dhe të këqija. Pra, mos kërkoni një bursë ideale, kërkoni atë që do të plotësojë kërkesat tuaja: thjeshtësinë dhe ndërfaqen e lehtë për përdoruesit, një numër të madh të çifteve tregtare, mbështetjen e shpejtë teknike etj. Do t’ju jap dy këshilla:
1 Zgjidhni midis 10 bursave më të mira
2 Regjistroni llogari në të paktën dy bursa për të investuar në fusha të ndryshme për të ulur rreziqet tuaja.
Është mjaft e lehtë të regjistrohesh në një bursë. Por, megjithatë, më lejoni t’ju kaloj nëpër të gjitha fazat e regjistrimit dhe depozitimit të fondeve në një nga bursat. Ky proces është pothuajse i njëjtë për të gjitha bursat, kështu që mund të përsërisni veprime të ngjashme në çdo bursë tjetër.
Le të marrim si shembull bursën Binance (www.binance.com).
Nëse dëshironi të ndiqni vetëm situatën e tregut në Binance, nuk keni nevojë të regjistroheni. Sidoqoftë, nëse synoni të bëni transaksione, duhet të krijoni një llogari dhe të kryeni një numër veprimesh të thjeshta.
Shkoni në faqen zyrtare të internetit www.binance.com, zgjidhni gjuhën e ndërfaqes dhe klikoni “Regjistrohu”.
Kur të regjistroheni, përdorni një fjalëkalim të fortë unik.
Pasi të keni futur të dhënat, seleksiononi kutinë që tregon se jeni dakord me kushtet e përdorimit dhe vazhdoni në hapin tjetër. Do t’ju duhet të tërhiqni rrëshqitësin për të përputhur një pjesë të enigmës.
Më pas, hapni mesazhin e verifikimit në postën elektronike dhe klikoni në lidhje. Tani mund të hyni në llogarinë Binance duke përdorur postën elektronike dhe fjalëkalimin tuaj.
Regjistrimi ynë është pothuajse i plotë. Por, ju rekomandoj që të mundësoni edhe vërtetimin me dy faktorë.
Kështu që, herën e parë kur të filloni, duhet të konfirmoni se jeni njohur me rekomandimet e sigurisë. Thjesht duhet të seleksiononi secilën kuti për aktivizimin e butonit “Unë kuptoj, vazhdo”.
Më pas, do t’ju rekomandohet të aktivizoni vërtetimin me dy faktorë duke përdorur çelësin e Google Authenticator ose konfirmimet përmes SMS. Vërtetimi me dy faktorë është një mënyrë e thjeshtë dhe efektive për të parandaluar hyrjen e paautorizuar. Ju mund ta shtyni këtë procedurë duke shtypur “Anashkalojeni për momentin”, por ju rekomandoj që ta aktivizoni menjëherë.
Ju mund ta përdorni llogarinë tuaj për të:
1 Ndryshuar fjalëkalimin për të hyrë në bursë
2 Aktivizuar vërtetimin me dy faktorë dhe verifikimin e plotë
3 Marrë çelësin API për automatizimin e tregtimit me ndihmën e botëve
4 Shikuar historinë e transaksioneve dhe listën e adresave IP të përdorura së fundi për të hyrë në bursë.
Ju lutemi vini re se nuk kërkohet asnjë verifikim për tregtimin në bursë ose depozitimin dhe tërheqjen e parave. Megjithatë, do të jeni në gjendje të rrisni kufirin e tërheqjes nga 2 BTC në 100 BTC në ditë vetëm pasi të keni mundësuar vërtetimin me dy faktorë dhe verifikimin e të dhënave të përdoruesit (duhet të plotësoni formularin: emrin, adresën, etj., si dhe të bashkëngjitni skanimet e një pasaporte dhe një fotografie tuajën duke mbajtur pasaportën tuaj).
Konfirmimi dhe verifikimi i SMS janë sa të thjeshta aq edhe intuitive, kështu që nuk do t’jua shpjegoj në detaje.
Më pas, do të dëshironi të depozitoni fonde në llogarinë tuaj në bursë. Depozitimi është i mundur vetëm me kriptomonedhë - nuk mund të futni ose të tërhiqni para të pashkëmbyeshme, si në shumë bursa të tjera të mëdha. Për këtë arsye, verifikimi nuk është një parakusht i domosdoshëm për tregtimin në bursë. Në fazën e bërjes së depozitës së parë, do të merrni një adresë depozite për kriptomonedhën e zgjedhur. (1) Kopjoje atë për të shmangur gabimet kur shtypni (2) ose skanojeni me një telefon kur depozitoni përmes një aplikacioni celular (3). Numri i konfirmimeve të nevojshme të rrjetit për depozitimin e kriptomonedhës në llogari tregohet më poshtë. (4) Për shembull, për të depozituar BTC ju duhen dy konfirmime.
Bëni kujdes: kriptomonedha e zgjedhur për depozitimin në llogarinë e tregtisë duhet të përkojë me atë që dërgoni në bursë. Depozitimi i një lloji kriptomonedhe në portofolin e një kriptomonedhe tjetër mund të çojë në humbje të fondeve tuaja. Për herë të parë, ju rekomandoj të përdorni një sasi të vogël për t’u siguruar që gjithçka funksionon mirë!
Pasi të jeni regjistruar, të keni depozituar fonde në llogarinë tuaj dhe të jeni njohur me ndërfaqen e bursës, mos ngurroni të filloni të tregtoni. Procesi i tregtimit në bursën Binance është në thelb i njëjtë me atë të bursave të tjera. Pasi të keni kuptuar parimet në punë me porositë në këtë shkëmbim, ju mund të tregtoni në çdo shkëmbim tjetër.
Tre lloje të porosive janë në dispozicion për blerjen ose shitjen e kriptomonedhës: Kufi, Tregu dhe Ndalim-Kufi. Të gjitha llojet e porosive ofrojnë mundësinë e një caktimi të shpejtë të shumës së kriptomonedhës së blerë ose të shitur: 25-100% të të gjitha aktivëve të disponueshëm për çiftin e zgjedhur të kriptomonedhës. Për shembull, nëse zgjidhni “25%” për “Porosi Blerjeje” në çiftin AION/BTC, do të blini AION në masën 25% të BTC që keni. Nëse zgjidhni 25% për “Porosi Shitjeje”, do të shisni 25% të monedhave AION në aksion.
Të sapoardhurit shpesh nuk e kuptojnë: pse na duhen dy lloje porosish kufi? Përgjigja qëndron në specifikat e ekzekutimit të tyre. Në fund të fundit, për shkak të specifikave të kriptomonedhës, nuk mund të vendosni Merr Fitim (çmimi i saktë me të cilin duhet të mbyllni një pozicion të hapur për një fitim) ose Ndalo Humbjen (i krijuar për të kufizuar humbjen e një investitori në një pozicion) me një porosi.
Të gjithë këto terma të rinj mund të jenë të paqartë për një fillestar, prandaj le të shohim një shembull të thjeshtë.
Porosia e Tregut
Për ta bërë më të thjeshtë, le të fillojmë me një porosi të tregut, e cila është një kërkesë për të blerë ose shitur një letër me vlerë me çmimin më të mirë të disponueshëm në tregun aktual. Në këtë rast, duhet të zgjidhni të blini ose shisni, të futni sasinë e kriptomonedhës së nevojshme për ekzekutim dhe të klikoni butonin “Bli” ose “Shit”. Pas hapjes së një porosie, sistemi automatikisht do të përpiqet të ekzekutojë një porosi me çmimin më të favorshëm për një tregtar. Le të shohim se si ekzekutohen porositë me një çmim tregu.
Për shembull, ne hapëm një porosi për të blerë 1.000 njësi të kriptomonedhës. Në kohën kur hapëm porosinë për të blerë, dikush tjetër tashmë kishte vendosur një porosi për të shitur kriptomonedhë me çmimin që ne e konsideronim të pranueshëm për blerje. Meqenëse është çmimi më i ulët në treg, bursa do të blejë automatikisht të gjithë AION-et e disponueshme me atë çmim për ne, deri në 1000 AION (porosia jonë totale).
Por nëse vëllimi i porosisë me çmimin më të ulët është më i vogël se porosia jonë, sistemi do të ekzekutojë vetëm pjesërisht porosinë me çmimin Nr.1, dhe pjesa tjetër e porosisë do të ekzekutohet me çmimin pak më të lartë Nr.2 porosisë tjetër të shitjes në treg. Ky çmim i dytë është pak më i keq për ne sesa ai fillestar.
Nëse vëllimi i kësaj porosie për të shitur me çmimin nr. 2 nuk është gjithashtu i mjaftueshëm për të ekzekutuar plotësisht porosinë tonë, pjesa tjetër e porosisë do të ekzekutohet me çmimin nr. 3 të porosisë së shitjes në thellësinë e tregut, i cili është përsëri pak më keq për ne se ai i mëparshmi. Kjo do të përsëritet derisa porosia të ekzekutohet plotësisht (p.sh. 1000 AION).
Sa më i madh të jetë vëllimi i porosisë, sa më i ulët të jetë vëllimi i tregtimit për palën e zgjedhur të monedhës dhe sa më e fortë të jetë luhatja e kursit, aq më i madh do të jetë ndryshimi midis çmimit përfundimtar të goditjes dhe atij fillestar.
Çfarë do të thotë kjo? Kjo do të thotë që një porosi tregu duhet të përdoret kur shpejtësia e ekzekutimit të porosisë është më e rëndësishme se çmimi. Për shembull, kur ka një luhatje të madhe dhe të konsiderueshme të normës dhe lëvizja besohet të vazhdojë.
Porosia Kufi
Po nëse ka një ndryshim të çmimit, dhe ju doni të shisni ose blini një monedhë me çmimin më të mirë dhe në të njëjtën kohë të minimizoni humbjet sa më shumë që të jetë e mundur? Porositë kufi ju lejojnë të bëni një veprim tregtimi me ekzekutim me çmimin fillestar ose edhe me çmimin që është më i mirë se sa tregoni. Më lejoni të shpjegoj duke përdorur shembullin.
Supozoni se çmimi aktual për një monedhë AION është 0.0003815 BTC. Ne parashikojmë një korrigjim - rënie të çmimit me rifillimin pasues të rritjes. Duam të blejmë 1.000 AION kur çmimi të bjerë në 0.0003500. Zgjedhim një porosi kufi dhe fusim të dhënat për porosinë: (1) çmimin me të cilin do të blejmë (0.00035) dhe numrin e monedhave që duam të blejmë (1,000 AION). Paneli i tregtimit automatikisht do të llogarisë numrin e nevojshëm të Bitcoin në llogari - 0.35 BTC - për të ekzekutuar porosinë (2). Nëse tregu arrin çmimin e caktuar dhe nuk do të ketë shumë të mjaftueshme në bilanc, porosia nuk do të ekzekutohet.
Çfarë ndodh më pas?
Nëse tregu nuk arrin çmimin e caktuar, për shembull, çmimi kthehet në 0.0003550, porosia do të mbetet joaktive dhe, më pas, do të duhet ta fshijmë atë. Por nëse tregu ende arrin çmimin e caktuar, ekzistojnë tre skenarë të mundshëm të rastit:
1) Tregu arrin çmimin dhe madje e kalon atë. Do të thotë se ka vëllim të mjaftueshëm për të mbyllur porosinë tonë. Në këtë rast, porosia plotësohet dhe ne marrim 1,000 AION-in e dëshiruar në 0.00035 ose, ndoshta, edhe për një çmim më të mirë. Në këtë rast, ju mund të vendosni një porosi kufi për të shitur AION me një fitim;
2) Tregu arrin çmimin, aktivizon porosinë tonë, por vëllimi është shumë i vogël dhe porosia jonë ekzekutohet pjesërisht. Pas kësaj, çmimi ndryshon dhe shkon shumë më lart se 0.00035. Kjo do të thotë që porosia mbetet të jetë e hapur; ne marrim vetëm një pjesë të sasisë së caktuar në porosi, por për një çmim jo më keq që kemi caktuar. Më pas, ose duhet të presim për ekzekutimin e plotë të porosisë ose ta mbyllim atë, duke qenë të kënaqur me atë që kemi blerë tashmë;
3) Tregu arrin çmimin, e kalon atë, porosia jonë është e plotësuar. Sidoqoftë, në vend të rritjes së pritshme të çmimit, ajo vazhdon të bjerë, dhe në një moment, bëhet e qartë se e kemi dreqosur. Si rregull, e kuptojmë se është më mirë të shesësh kriptomonedhën e blerë me një humbje të vogël sesa të presësh për ulje të madhe kur është tashmë tepër vonë për të korrigjuar diçka. Për të shmangur këtë, me të vërtetë duhet të vendosim Ndalim Humbje për të minimizuar humbjet e mundshme.
Shembulli i mësipërm tregon se duhet të kufizojmë porositë për të maksimizuar fitimet. Sidoqoftë, porosi të tilla në pritje mund të shkaktojnë humbje nëse parashikimet rezultojnë të gabuara. Një nga ndryshimet midis tregtimit në tregun e kriptomonedhave dhe tregtimit në tregjet klasike financiare është pamundësia e vendosjes së njëkohshme të Marrjes së Fitimit dhe Ndalimit të Humbjes në një porosi. Prandaj, porositë ndalim kufi vijnë në ndihmë.
Ndalim Kufi në cilësinë e Marr Fitim
Porositë Ndalim-Kufi funksionojnë në mënyrë të ngjashme me porositë tradicionale kufi, por me një kusht shtesë. Duke vendosur një porosi Ndalim-Kufi në pritje, një tregtar specifikon çmimin shtesë të ndalimit, të cilin çmimi i tregut duhet të godasë për aktivizimin e një çmimi kufi në pritje dhe ta shtojë atë në thellësinë e përbashkët të tregut. Porosia Ndalim-Kufi plotësohet si një porosi kufi, brenda intervalit të caktuar të çmimit, të caktuar nga çmimi ndalim dhe çmimi kufi. Porosia ekzekutohet vetëm midis çmimit ndalim dhe çmimit kufi nëse ka porosi të përshtatshme në thellësinë e tregut. Nëse çmimi i tregut kalon çmimin kufi para ekzekutimit të plotë të porosisë, ajo nuk mund të plotësohet.
Për ta bërë të qartë, le të marrim një tabelë me luhatje të forta, për shembull, një çift XRP/dollar amerikan.
Ne qëndrojmë në nivelin aktual të çmimeve, të shënuar në №1. Ekziston një kthim mbrapsht në grafik, i përcaktuar nga modeli i kreut dhe supeve, por ne vendosim të presim për konfirmimin e prirjes rritëse në një nivel që ne e caktojmë si çmim ndalimi. Nëse çmimi i tregut godet çmimin tonë ndalim, parashikimi ynë do të konfirmohet dhe porosia jonë do të aktivizohet. Në të njëjtën kohë, ne e kuptojmë se çmimi mund të tërhiqet nga çmimi ndalim i caktuar dhe të shkojë në drejtim të kundërt. Mbi të gjitha, çmimi i tregut mund të kalojë ose të tërhiqet nga çmimi që kemi caktuar.
Nëse çmimi i tregut godet çmimin ndalim, porosia aktivizohet dhe ne blejmë kriptomonedhë brenda korridorit të kufizuar nga çmimi ndalim dhe çmimi kufi. Në të njëjtën kohë, nëse çmimi i tregut përkohësisht bie, duke testuar nivelin e rezistencës, lejon blerjen me çmime më të favorshme. Por nëse çmimi i tregut godet çmimin kufi dhe vazhdon të bjerë, blerja e kriptomonedhës ndalet. Kështu, porositë Ndalim-Kufi lejojnë një tregtar të blejë vetëm kriptomonedhën, vlera e së cilës po rritet.
Ndalim Kufi në cilësinë e Ndalim Humbje
Përveç arsyeve të sigurisë, porositë Ndalim-Kufi përdoren si ndalim humbjesh. Le të marrim të njëjtin grafik. Tani kemi ndërmend të presim për rënien e çmimit dhe të blejmë kriptomonedhë me çmimin më të favorshëm përpara një rritje tjetër.
Ne vendosim një porosi kufi për të blerë nën çmimin e tregut. Por si të mbrohemi nga humbjet nëse çmimi papritmas vazhdon të bjerë pasi të shkaktohet porosia jonë kufi? Një porosi standarde kufi nuk mund të kryejë funksionin e nivelit të Ndalim Humbjes, pasi vendosja e një porosie shitjeje me një çmim nën çmimin e tregut do të rezultojë në shitjen e aktivëve të disponueshëm me një çmim tregu pasi sistemi e percepton atë si më fitimprurës për shitje. Mos harroni? Blini me çmim të ulët, shisni me çmim të lartë...
Prandaj, ne vendosim një porosi Ndalim-Kufi në një nivel Ndalim Humbje si në figurën e mëparshme, dhe tani detyra e saj nuk do të jetë maksimizimi i fitimeve, por minimizimi i humbjeve. Në përputhje me rrethanat, ne vendosëm çmimin kufi në nivelin Ndalim Humbje, ndërsa e vendosëm pak më të ulët çmimin ndalim, i cili e aktivizon këtë porosi. Pse duhet ta bëjmë këtë?
Porosia nuk do të ekzekutohet derisa çmimi i tregut të arrijë çmimin ndalim dhe, kur ta arrijë atë, çmimi kufi i porosisë së shitjes (“shit me këtë çmim ose më të ulët”) nuk do të lejojë shitjen e kriptomonedhës, nëse çmimi shkon papritmas lart në drejtimin që na duhet. Për më tepër, kjo nuk do të na ndalojë të shesim aktivin kur çmimi lëviz poshtë, duke vepruar si Ndalim Humbje dhe duke minimizuar humbjet.
Shpresoj që ky udhëzues t’ju ndihmojë të kuptoni se si të regjistroni dhe depozitoni para për tregtim në bursën Binance. Më lejoni t’ju kujtoj se tregu i kriptomonedhave po ndryshon shpejt dhe disa artikuj mund të ndryshojnë në kohën që lexoni librin. Në çdo rast, ju i kuptoni parimet themelore dhe do të jeni në gjendje t’i zbatoni ato në bursa të tjera.
10 bursat kryesore
Tani do të përpiqem t’jua thjeshtoj pak duke ngushtuar listën e bursave që mund të bëhen platforma juaj tregtare. Do të identifikoj 10 bursat më të mira, duke treguar pikat e tyre të forta dhe të dobëta. Këto dhjetë bursa janë më të mirat në kohën kur po shkruaj këtë libër për shkak të numrit më të madh të çifteve të paraqitura të kriptomonedhave. Nëse statistikat në këto bursa ndryshojnë me kohën, thelbi do të mbetet i njëjtë.
1 HitBTC (Estoni)
2 Bittrex (Shtetet e Bashkuara)
3 Binance (Japoni)
4 Poloniex (Shtetet e Bashkuara)
5 OKEx (Kinë)
6 Huobi (Kinë)
7 Bitfinex (Honk Kong)
8 Kraken (Shtetet e Bashkuara)
9 Bitstamp (Luksemburg)
10 Bithumb (Koreja e Jugut).
Kur zgjidhni një bursë, peshoni të gjitha të mirat dhe të këqijat, mos u tregoni dembel t’i kushtoni kohë kësaj pasi bëhet fjalë për paratë tuaja. Le të nxjerrim në pah anët e mira dhe të këqija të disa bursave.
Bithumb
Anët e mira:
1 Tarifa relativisht të ulëta (0.15%)
2 Likuiditet i lartë
3 Mundësi unike për të blerë çertifikata/kupona dhuratë
Anët e këqija:
1 Ndërfaqja
2 Iu nënshtrua sulmeve kibernetike
3 Gjuha koreane kryesisht, vetëm pak informacion është në dispozicion në anglisht
4 Të gjitha çiftet e monedhës janë të lidhura vetëm me won-in e Koresë së Jugut. Prandaj, nëse keni vetëm Bitcoin dhe doni të blini, për shembull, Ethereum, do t’ju duhet të blini won
5 Tarifat fikse, jo të lidhura me vëllimin e tregtisë
6 Vetëm disa çifte tregtare janë në dispozicion
Poloniex
Anët e mira:
1 Krijimi i shpejtë i llogarisë
2 Funksionaliteti i shumë detyrave (tregtimi i marzhit me huazim 2.5 herë, mundësia për të siguruar dhe marrë kredi)
3 Likuiditet i lartë
4 Ndërfaqja e lehtë për përdoruesit (navigimi, klasifikimi, kërkimi i shpejtë, funksioni i shikimit gjatë natës, etj.)
5 Tarifa relativisht të ulëta
6 Ndërfaqja e programimit të aplikacioneve, vërtetimi me dy faktorë 2FA;
7 Mjetet e analizës teknike (nivelet e Fibonacit, mesataret lëvizëse, brezat Bollinger)
Anët e këqija:
1 Shërbim i ngadalshëm ndaj klientit
2 Asnjë aplikim celular
3 Asnjë mbështetje e monedhës së pashkë,byeshme. Kursi i këmbimit të dollarit është i lidhur me altcoin Tether (USDT), i cili kushton saktësisht $1, por në kohë krize kursi i tij nuk korrespondon gjithmonë me dollarin
Bitfinex
Anët e mira:
1 Funksionaliteti i shumë detyrave (tregtimi i marzheve deri në huazim 3.3 herë, mundësia për të siguruar dhe marrë kredi)
2 Likuiditet i lartë
3 Tarifa të ndryshme: për një prodhues të tregut -0,1% dhe më të ulët me një rritje të xhiros; për një marrës të tregut -0.2% ose më të ulët
4 Ndërfaqja e programimit të aplikacioneve, vërtetimi me dy faktorë 2FA, mjete të përparuara të verifikimit për të monitoruar integritetin e kontabilitetit
5 Ndërfaqe e personalizuar (përzgjedhja e temës, klasifikimi)
6 Mjetet e analizës teknike të ngulitura në TradingView
7 Aplikacione për celularë për iOS dhe Android
8 Një numër i madh i porosive (ndalim humbje, marrje fitim dhe të tjerë).
Anët e këqija:
1 Kur depozitoni fonde në portofol ose tërhiqni fonde përmes transfertës bankare në USD, bursa ngarkon tarifa prej 0,1%, por jo më pak se 20 dollarë. Prandaj është më mirë të bëni depozita kriptomonedhe
2 Verifikimi i ndërlikuar
Kraken
Anët e mira:
1 Reputacion i mirë, likuiditet i lartë
2 Për klientët e korporatave. Përveç kësaj, një program i korporatave u ofrohet klientëve, të cilët kryejnë transaksione me një sasi të madhe parash
3 Mundësia për të depozituar lloje të ndryshme të monedhës fiat dhe kriptomonedhës në portofol
4 Ndërfaqja e programimit të aplikacioneve, vërtetimi me dy faktorë, mundësia për të aplikuar cilësime të përparuara të sigurisë
5 Mundësia e tregtimit të marzhit, disa lloje të porosive
6 Tarifa relativisht të ulëta të transaksionit
7 Aplikim për iOS
8 Ndihmesë e shkëlqyer për klientët
Anët e këqija:
1 Mungesa e ndërfaqes intuitive të përdoruesit
2 Tarifa të larta për depozitimin e një portofoli dhe tërheqjen e fondeve
3 Më e përshtatshme për tregtarët e përparuar
Ücretsiz ön izlemeyi tamamladınız.
