Kitabı oku: «Wass der Geier, ob des schdimmd!», sayfa 2
Abnehmen
Gans, gans langsam
hobb i edsd
a boor hunderd Gramm
abgnommer.
Iech hobbs ausgrechned:
Wenn i in den Dembo
weider mach,
bin i suh in siebsg Johr
fei dodahl verschwundn.
April 2016
Aggression
Ich hobbs ja
immer nedd glaam wolln,
dass Fleisch essn
aggressiv machd.
Obber dann hobb i
amohl gsehn,
wey a Veganer
suh richdich ausgrasd’ is,
wall sei Sohn
ann Hamburger gessn hodd.
April 2016
Elektrischer Alptraum
Mier hodd draamd,
dass mei Wasserkocher
und mei Migser
midderander a Verhäldnis
ghabbd hamm.
Und wey i es negsde Mohl
hamm kommer bin,
worns durchbrannd,
middernander, alle dswa.
November 2016
Arithmetik
Do hodd neili doch anner
im Fernsehn gsachd:
„Bei uns is
jeder dswode Erwachsene
vill dsu digg.
Und bei die Kinder
is no vill schlimmer!
Do isses scho jeds virdde!”
Oktober 2016
Korrekte Auskunft
Damidd i mi nedd bloß immer
drüber lusdich machen duh:
In Färdd wohner vill
gans nedde, hilfsbereide Menschn.
Wenns’d do vo amm
wos wissn willsd,
grichsd ah a gans a höfliche
und massdns korregde Andword.
Suh hobb i amohl ann Färdder
aff der Schdrass gfroochd
ob er wass,
wo do es Schdaddeoder is.
„Ja, freili“, hodd der Moo gsochd,
und is weider ganger.
Oktober 2016
Ausmisten
Iech hobb dachd,
es wär amohl widder Dseid,
meine Bücher ausdsumisdn.
Walls hald immer mehr wern.
Wall hald welche wech müsserdn.
Hobb i’s alle ausm Regohl ghold,
und aweng abgschdaubd.
Do hobb i welche gfundn,
die i unbedingd scho lang amohl
widder hobb lesn wolln.
Hobb i ann großn Schdabel gmachd.
Dann worn do dadsächlich welche derbei,
die hobb i no goor nie glesn ghabbd.
Hobb i widder ann Schdabel gmachd.
Dann hobb i’s
widder ins Regohl nei gschdelld.
Ah ja, und die villn Bücher
dsum Wechdun –
die dswa hobb i
in die Mandeldaschn gschdeggd,
damidd i’s bein negsdn Mohl
affn Recyclinghuuf miednehmer konn.
Juli 2016
Bauern als Tierschützer
Do hobb i doch
vo ann Bauern gherd,
der bei die Dierschüdser „Peta“
Middglied worn is.
Edsd gibbd der seine Säu
immer suh Wachsdumshemmer
in ihr Fudder nei,
damidd’s nedd suh bald
gschlachd wern müssn.
November 2016
Besuch
Widder wos,
woh’s älder wern
Vuurdeile bringd:
Wemmer freyer
Bsuch grichd hamm,
hammer massdns scho
a boor Dooch vuurher
ongfangd, die Wohnung
gründlich dsu budsn,
damidd’s überohl
ah richdich sauber is.
Müss’mer fei nimmer!
Heidis unser Bsuch
massdns ah aweng älder
und sichd nimmer
suh guhd.
Dezember 2016
Burkaverbot
In London sichd mer scho
immer widder amohl a Fraa
midd anner Burka.
Bei uns do kennerd i mi
goor nedd erinnern,
dass i überhaubds scho amohl
anne hobb rumlaafn sehn.
Drum wass i ah goor nedd,
wem mer bei uns die Burka
verbiedn wollerd.
Außerdem is es Verbiedn
immer suh a Sach.
Villeichd werrerdn
midd ann Burkaverbod
vill Brobleme ah bloß
dodahl verschleierd.
September 2016
Christkindlesmarkt
Iech bin ja scho länger
nimmer aff unserm
Grisdkindlesmargd gwesn.
Desderweng hobb i heier
arch gschdaund,
wos do middlerweiln
alles gibbd!
Ann Dragdor odder
ann Dodnkubf aus Gloos
als Grisdbaamschmugg
find i hald einfach bloß bleyd
odder gscheid gschmagglos.
Obber bei fliegende Elfen
odder Däferla midd seim Schderndseichn,
die mer ann’ Baam hänger soll,
müsserd si a echder Chrisd
doch wergli froong,
wey des dsammbassn soll.
Dezember 2016
Diskriminierung
In ledsder Dseid
brobierd mers ja
bei uns in Deudschland ernsdhafd,
wos gecher Disgriminierung dsu machn,
gecher Digriminierung vo Fraun,
vo Behinderde, vo Alde
und no vill andere Grubbn.
Do bin i ja dodahl derfier!
Bloß wecher mier
werd widder kanner wos machen.
Bald verdsg Johr
hobb i als Beamder gerberd –
und kanner hodd brobierd,
miech dsu beschdechn.
Do fühl i mi nadierli
dodahl disgriminierd!
Oktober 2016
Politischer Dreischritt
Iech wass no guhd,
dass unser hegsder Bersonolrohd
scho vuur vill Johr
immer gsochd hodd,
dass die Regierung in Bayern
in ann Dreischridd
Bollidigg machd:
Beschließn – erschreggn – noochdengn.
Er hädd’s nedd suh laud
und suh ofd soong solln.
Middlerweiln hodd si des Brindsibb
nämli scheinds weldweid durchgseds
vuur allem beim Wähln.
Dengd bloß an den „Brexit“
odder an die Bräsidendnwohl
in Ameriga!
November 2016
Durchschnittsberechnung
Wemmer an ann
– sooch mer amohl –
Löwen erschd knabb lings
und dann knabb rechds
vuurbeischiessd,
dann is des Viech
im Durchschnidd hie.
Des is a Durchschniddsberechnung,
die iech suhgoor im Kubf
no hiegrich.
Edsd wass obber
a jeder Lehrer,
dass heiddsudooch
a jeds Kind
– also wergli hunderd Brodsend -
überdurchschniddlich indelligend is.
Wey mer obber des ausrechner konn –
do bligg i nimmer durch.
Oktober 2016
Einkaufen zwischen den Jahren
Midd die villn Feierdooch
dauerd es Eikaafn vill länger
als sunsd es Johr über.
Wall im Momend vill Männer
nedd in die Erberd müssn
und midd ihre Fraun
in die Subbermärgd kommer.
- Scheinds kommers nedd
allans derhamm lassn –
Die Fraa drüggd’m dann
ann Eikaafswoong in die Hend
und schdelld nern in ann Gang ab,
damidd’s in Ruh ihr Wohr
dsammsuchn konn.
Und die Männer verschberrn
dann alle Gäng
und i komm nimmer durch.
Odder die Männer derfn
suhgoor allans eikaafn gehn,
kenner si obber nedd aus
und sung ewich lang
nooch ihrer Wohr.
Manche wern vo ihre Fraun
suhgoor midd’m Handy
vo derhamm ferngschdeuerd.
Bin iech froh,
wenn edsd die Feierdooch
bald widder rum sinn.
Januar 2017
Ücretsiz ön izlemeyi tamamladınız.
