Çərxi-Fələk

Füsünkar təbiətli doğma elim – Lecbədin! Lecbədin kəndi qədim İpək Yolu ilə elimizin vətənpərvər oğlu – şair İlyas Əfəndi demişkən, onun keşiyini çəkən Ləlvər və Babakər dağları arasında yerləşir. Kəndin laylasını isə Ehram çayı çalır. Hündür ərazidən dağlara, çaya, tarixi yerlərə bağlanan Lecbədin kəndi qoçaq oğlanları, adlı- sanlı nəsilləri, dəyərli ziyalıları, qəhrəmanları ilə məşhurdur. Bu kəndin fəxr ediləsi oğullarından birisi də Lətif İbrahimxəlildir. Lətif İbrahimxəlil oğlu müəllim ailəsində, sakit bir ailədə dünyaya göz açmışdır. Atası şair İbrahimxəlil, kasıb bir ailədə doğulmuş olsada, ibtidai sinif müəllimi kimi öz halal zəhməti ilə yetim bacı-qardaşlarını və ailəsini dolandırırdı. Lətif müəllimin atası İbrahimxəlil Alı oğlu həqiqətən söz ustası – şair idi. Daim ağzından şeir süzülərdi. Onun gözəl qəzəlləri, oxşamları, deyişmələri vardır. Görkəmli maarif xadimi, şair, publisist Yusif Yusifli 3 cildlik “Gürcüstan azərbaycanlılarının ədəbiyyat tarixi” adlı ensiklopediyanın I cildinin 436-444-cü səhifələrində İbrahimxəlil Alı oğlu haqqında materialları dərc etmişdir. Onun haqqında digər məlumat mənbəyi, eyni adlı müəllifin “Şəmsi” poemasında və adı gedən ensiklopediyanın III cildində – dövrünün “Zərdabisi” adlandırılan şair, publisist Şəmsi Əlizadə haqqında yazılarda əks olunmuşdur.