Kitabı oku: «Տաղեր», sayfa 3

Yazı tipi:

[ԼԶ]
ՏԱՂ ՄԵԾԻ ՈՒՐԲԱԹԻՆ

Անեղ Որդին Հաւր միածին բազկատարած
Այսաւր եկաց ի յատենին տիեզերաց:
Բարձեալ մարմնով ի խաչն անճառ խոնարհութեամբ,
Բերեալ բազկաւ ըզհեռացեալ ազգըս մարդկան:
Գառն անարատ, ածեալ ի սպանդ պատարագի,
Գայ հաշտութեամբ Հաւր` ի բառնալ զմեղս աշխարհի:
Դատափետք եղեն դըպիրքն առ Պիղատոս,
Դատաստանաւ բառնալ ի խաչ բողոքէին:
Եկն եհաս վախճան ամաց ÿստ նախատեսիցն,
Եւ ցուրտ եւ պարզ աւր մի յայտնի Տեառն Աստուծոյ
Զէլի էլին Տէր գըթութեանց տայր ի բարձունս`
Զխաղաղութիւն խաչահանուացն աղաւթելով:
Էնն է ինքն ընդ մեզ Աստուած յաւիտենից,
Էրեւեցաւ մեզ ի վախճան ժամանակի:
Ընդ մեզ Աստուած յայտնեալ, բարձեալ մարմնով ի խաչ`
Ընդդէմ լուսոյ արեգականըն կընքելով:
Թողեալ լըքաւ լոյսն ի ծոցոյ արեգականն,
Թաքոյց յինքեան ըզճառագայթս ի միջաւրեայ:
Ժամուն ոչ տիւ եւ ոչ գիշեր ՚ստ մարգարէին,
Ժամանեալ գայ Տէր զաւրութեանց ի պատերազմ:
Իշխանութեամբ առ Հայր զհոգին աւանդելով`
Ինքն ի հանդէս մարտի ընդդէմ մահու իջեալ:
Լըւեալ իշխանք չարին` պակեան ահիւ մեծաւ,
Լըւեալ մահու եւ դըժոխոց` սասանեցան:
Խոր խաւարին սաստէր Յիսուս լուսով խաչին,
Խընդիր առնէր իւր ծառայիցն անդ գերելոցն:
Ծանեաւ Ադամ զնըշան գալոյ Տեառն ի դըժոխս,
Ծանր ամաւթով կայր հիացեալ երկիւղագին:

[ԼԷ]
ՈՂԲՔ ՄԵԾԻ ՈՒՐԲԱԹԻՆ, Ի ՆԵՐՍԻՍԷ ԿԱԹՈՂԻԿՈՍԷ ՀԱՅՈՑ

Կայր մայր Տեառն առ խաչին`
Կոյսըն Մարիամ,
Ողբալով զայս ասէր
Առ միածին Որդին.
_ Ո'վ անմեղ գառն Աստուծոյ,
Ընդ ո՞ր մեղաց պատժիս.
Ես սրբութեամբ զքեզ յղացայ,
Մաքուր կուսութեամբ ծնայ:
Կոյս յետ ծնընդեան քո մնացի`
Ծնելոյդ զաւրութեամբ.
Ամբիծ շըրջեցար յերկրի,
Անփորձ ի մեղաց:
Մեղս ոչ արարեր մարմնով
Ըստ նախաձայն Բանին,
Եւ ոչ նենգութիւն գըտաւ
Ի բերան քո բարի:
Իշխանն աշխարհի ի քեզ
Ոչ եգիտ յիւրոցն,
Արդ, զի՞ մատնեցար, որդե'ակ,
Խաչի եւ մահու:
Ո՞ւր հրեշտակին բանն ըզքէն`
Թագաւորել անվախճան.
Ահա զձեռսդ, որ զերկինս ձգեցին,
Տարածեցին ի փայտին:
Զմատունսդ, որ զաւրէնս գրեցին,
Բեւեռեցին ի խաչիդ.
Զոտսդ, որ ի ծովուն գնացին,
Հեղուսեալ կապեցին:
Յայտնեա' ինձ, Յիսո'ւս, զխորհուրդ
Քո կամաւոր մահուանդ,
Զի հաստատեսցի սիրտ իմ
Ի մարդկեղէն կարծեաց:

ՓՈԽ

_ Ո~վ Մարիամ, կոյս եւ մայր,
Տաճար լուսոյ իմոյ.
Մի' տկարանար դու հոգով
Յիմ ծածկեալ խորհըրդոյս:
Ես մարգարէիւք իմովք
Յառաջ զայս ցուցի.
Աբրահամ կախեալ ետես զիս
Խոյ ընդ Սահակայ:
Մովսէս գուշակեաց տեսանել
Ըզկեանս ի փայտի,
Ըստ Դաւթայ ծակեցին զձեռս իմ
Եւ զոտս` ի փայտիս:
Ըստ Սողոմոնի եդին ինձ
Պըսակ ի փըշոց,
Ըստ Եսայեայ` իբրեւ զոչխար
Ի սպանդ վարեցայ:
Ըստ Դանիելի սպանին
Զաւծեալ Տեառն այսաւր,
Ըստ Երեմիայ արկին
Փայտ` ի հաց մարմնոյս:
Ըստ Զաքարիայ` հայեսցին
Յորս խոցեն տիգաւ:
Զիս Հայր իմ մատնեաց ընդ մեղաց
Որդւոց Ադամայ:
Ես հնազանդ եղէ Հաւր իմոյ
Մինչ ի մահ խաչիս,
Զանէծսն Ադամայ բառնամ
Փշեղէն պըսակաւս:
Զձեռսըն կարկամեալ փայտիւն,
Պարզեմ բեւեռաւքս,
Զոտիցըն կապանս ընդ ծառոյն
Արձակեմ հեղուսիւքս:
Դառնահամ պըտղոյն ճաշակ
Քաղցրանայ լեղեաւս,
Զկողածնին լըւանամ զխայթուած,
Կողիս վըտակաւք:
Մահ իմ տայ ըզկեանս մեռելոց,
Որք ի սկըզբանէ,
Փայտ խաչիս իմոյ` զփայտ մահու
Ի կեանս փոխարկէ:
Նընջեմ ի հող մահուընդ մեռեալս
Զորս ընդ իս յարուցից,
Ի դժոխս իջանեմ առ հոգիսն,
Որք են ի բանտի:
Զկապեալն արձակեմ զԱդամ,
Կապեմ ըզկապողն,
Ի դրախտն ուստի ել` տանիմ,
Ուր եւ զաւազակն:
Արդ, մի' վըհատիր, Մարիամ,
Այլ խընդա' յուսով,
Ես յետ յարութեան իմոյ
Քեզ երեւեցայց.
ԶՀաւր կամս կատարել կամիմ,
Առ նոյն վերանամ:

ՓՈԽ

_ Արդ, ո~վ Տէր եւ Որդի իմ,
Ո՞ւմ յանձն արարեր
Զմայր եւ զաղախին քո:
Դու յերկինս առ Հայր երթաս,
Ո՞վ զկեանս իմ տնաւրինէ
Փոխան քո յերկրի աստ:
Զի թէ հրէական նախանձն
Զլոյսդ հալածեցին,
Ինձ զի՞նչ արասցեն, որդեա'կ:
Ես ակն ունէի` Յիսուս
Թագ ի գլուխ եղեալ,
Եւ այժմ տեսանեմ խաչեալ:
Բան ի հրեշտակէն լըւայ,
_ Ուրախ լե'ր, բերկրեալ, _
Եւ այժըմ հոգւով խոցիմ:
Ի ժամ ծընըդեան քո
Հրեշտակք ցընծացին
Եւ այժմ անարգեն մարդիկ:
Մերկ ըզքեզ տեսի, որդեա'կ,
Պընդեալ ի փայտիդ,
Խաւար իմ աչացս այսաւր:

ՓՈԽ

_ Ո~Վ անմեղ աղաւնի իմ,
Մի' զանգիտեր դու սըրտիւ
Ի յերկիւղէ մարդկային:
Ընդ քեզ եմ յաւիտեան ես,
Որ բառնամ զարարածս իմ
Բանիւ զաւրութեամբ իմով:
Ո~վ սըրտիւ սիրեցեալդ իմ,
Ընդ քո մաքրութեան հոգւոյդ
Տամ մայր քեզ ըզՄարիամ մայր իմ:
Պատուեա' ՚ստ աւրինացն ըզնա,
Որպէս եւ տեսեր դու յիս,
Հնազանդ լինելով նըմա:
Եւ մեզ աղաւթիւք մաւր քո
Եւ Յովհաննու սիրելւոյն
Շնորհեա' զթողութիւն մեղաց:

Եւ քեզ երգեսցուք ընդ Հաւր,
Եւ ընդ Սուրբ Հոգւոյն ըզփառս
Յայժմուս եւ յաւիտենից, ամէն:

[ԼԸ]
ՏԱՂ ԽԱՉԵԼՈՒԹԵԱՆ ՔՐԻՍՏՈՍԻ

Ծարաւեցաւ որպէս ըզմարդ Տէրն ի խաչին,
Այն որ արար զծով եւ զերկինըս ջըրային:
Լեղի խառնեալ ընդ քացախոյ զինաւորին.
Արբուցանէր այն երկնաւոր թագաւորին:
Արեւն յերկինս խաւար դարձաւ մէջաւրէին,
Նըսեմացաւ ընդ անարգանս անմահ Բանին:
Բարձրագոչ ձայնիւ գոչէր Տէրն ի խաչին
Զէլի էլին եւ աւանդէր առ Հայր զհոգին:
Եւ վարագոյր հին աւրինին սուրբ տաճարին
Ընդ չարչարանս կենարարին պատառէին:
Երկիր հիմամբք ի յանդընդոց սասանէին,
Վէմք պատառեալ եւ գերեզմանըք բանային:
Դըժոխք սարսեալ սասանեցաւ բանտն ահագին
Եւ արձակեաց զկապեալ հոգիսն, որ անդ էին:
Յահեղ ձայնէն կենդանատու Տեառն Յիսուսին
Ազատեցան կապեալ հոգիքն, որ ի բանտին:
Յորժամ էջ մեր կենսատուն անդ ի ստորին,
Լուսաւորեաց զորս ի խաւար անդ նըստէին:
Եւ վեր ածեաց անտի զնոսին յերկինս վերին
Եւ դասեցոյց ընդ անմարմին զաւրսն երկնային:
Արժանացոյց պայծառ լուսոյ առագաստին,
Արքայութեանըն հարսանեաց սուրբ փեսային,
Ուր անդրանիկ որդիքըն մաւր սուրբ Սիոնին,
Աբրահամու գոգոյն ժառանգ Հաւրըն վերին,
Ու արդարոց դասք ամենայն սուրբ երամին
Ուրախանան յաջմէ փառաց սուրբ փեսային:
Նըմա երգեմք եւ մեք ընդ Հաւր եւ Սուրբ Հոգւոյն:
Փա~ռք յաւիտեանս խաչեցելոյ անմահ Բանին:

ԼԸա. ՓՈԽ

Ծարաւեցաւ Տէրն ի խաչին որպէս ըզմարդ,
Այն որ արար զովկիանոս ծով գեղեցիկ:
Ի Սամարացւոյն ջուր խընդըրէր յաղբիւրըն Տէրն,
Այն որ արբոյց տիեզերաց զանմահութիւն:
Լեղի խառնեալ ընդ քացախոյն զինաւորին,
Արբուցանէր անմահ Բանին թագաւորին:
Բարձրագոչ ձայնիւ գոչէր Տէրն ի խաչին
Զէլի էլին եւ աւանդէր առ Հայր զհոգին:
Նըմա երգեմք եւ մեք ընդ Հաւր եւ Սուրբ Հոգւոյն,
Խաչեցելոյն անմահ Բանին փա~ռք յաւիտեանս:

[ԼԹ]
ՏԱՂ ՅԱՐՈՒԹԵԱՆ, ՏԵԱՌՆ ՆԵՐՍԻՍԻ ԿԱԹՈՂԻԿՈՍԻ

Առաւաւտին շաւիղին
Շող ծագեալ, արեւ տարածեալ,
Արեւ, ը~, բարձըր իջեալ
Արփենւոյն արփւոյն տարփըմամբ,
Արփւոյն, ը~, տարփըմամբ անդ,
Ը~, քաղցրիկ ցաւղիկ արկանէր,
Ցաւղ ի Հերմոնէ իջեալ
Ի վերայ լերին սիրայնոյ,
Լերին, ը~, սիրայնոյ սէր
Ի սընունդ հովիտ շուշանի,
Հովիտ, ը~, յաւրինեալ, ը~,
Նուսխայնոյ կանայք տարփացեալք,
Կանայք, ը~, տարփացեալ, որ,
Ը~, գայք ի հանդէս գիշերոյ,
Հանդէս, ը~, խաչելոյն լոյս
Զըւարթնոյն զուարթուն հրեշտակին,
Զըւարթուն, ը~, սերովբէն
Ի վերայ վիմին փողերգէր,
Փողէր, ը~, զաւետիս.
_ Տէր յարեաւ, դուք, ը~, զո՞վ խընդրէք,
Յարեաւ անձկալին, ը~,
Սիոնի սիրով սիրեցեալն,
Սէր ողջոյն, ը~, խանդակաթ, ը~,
Սուրբ ոտիցն երկիր պագանեմք:
Փա~ռք նոյն ի նոյն ի նոյն, ը~,
Նըմին յաւիտեանս, ամէն:

[Խ]
ՓՈԽ

Նըստեալ կանայքն ողբային
Առ գերեզմանն անմահին,
Երեւելով հրեշտակին`
Ձայն աւետեաց լըսէին.

_ Րամից մաքրից անձկալին,
Զոր տապանաւ ծածկէին,
Սիրով յարեաւ սիրելին,
Զբնութիւն յարոյց զԱդամին:

Երկիւղալից լինէին
Պահապանաց խումբ դասին,
Սաւառնացեալ սերովբէն
Հոլաթեւէր ի վիմին:

Ի բաց լինել երկիւղին
Փողէր կանանց տարփալին,
Երթեալ պատմէր զաւետիս
Երամ դասուց Պետրոսին:

_ Րաբունից տէր վարդապետն
Այսաւր յարեաւ բաղձալին:
Գոչեմք եւ մեք ընդ նոսին.
_ Փա~ռք յարութեան փըրկողին:

[ԽԱ]
ՏԱՂ ՅԱՐՈՒԹԵԱՆ

Այսաւր լոյս ծագեաց յաւուրս առաջին,
Արեգակն արդար փայլեաց յարարածս
Եւ լուսաւորեաց` որք ի խաւարի:

Արեւմուտ տապանն եղեւ արեւելք,
Եւ գերութեան վայրն` դարձող գերելոց,
Ի խաւարէ լոյս մեզ ճառագայթեաց:

Զգլուխ անկեան ըզվէմն չարգել կափարիչն.
Եւ ոչ մատանին` զանպարագրելին,
Փառաւք յարուցեալ վէմն անխախտելի:

Բացան դրունք երկնից բարձմամբ սուրբ վիմին,
Եւ Ադամ եմուտ ի դրախտն Ադենայ
Եւ շաւիղ գործեաց որդւոցս ի յերկինս:

Մի զինուոր վերին պակոյց զըստորինսն,
Փողէր սուրբ կանանցն զաւետիս կենաց.
_ Մի' այլ արտասուէք զբարձողն արտասուաց.

Ցընծացէ'ք, յարեաւ անմահ կենդանին.
Նըմա միայնոյ երգեսցուք ըզփառս,
Որ նա յարուցեալ զԱդամ նորոգեաց:

ՓՈԽ

Լըւան զաւետեաց ձայն ուրախութեան,
Երթեալ պատմէին դասուցն ընտրելոց`
Ի Գալիլիայ լերին հետեւեալ:

Ընթացեալ տեսին եւ երկիր պագին,
Հրաման ընկալան զմեզ լուսաւորել.
_ Ընդ ձեզ եմ,_ ասէր,_ մինչ ի կատարած:
Ընդ որս երգեսցուք` փա~ռք յարուցելոյն:

[ԽԲ]
ՏԵԱՌՆ ՆԵՐՍԵՍԻ ԿԱԹՈՂԻԿՈՍԻ, Ի ՆՈՅՆՆ

Այսաւր, ը~, լոյս հաստատի, խաւար, ը~, լուծանի,
Այսաւր, ը~, նոր Իսրայէլ սեամբ, ը~, լուսաւորի.
Այսաւր լուսափայլ հրեշտակն տայր կանանցն զաւետիս.
_ Յարեաւ Աստըւած, ցըրուեցան թըշնամիք նորա:
Եկայք պարեսցուք ընդ հրեշտակս շուրջ զգերեզմանին,
Որով, ը~, մահ մեռաւ, կեանք թագաւորեաց:
Քրիստոսի արարողին զայս` փա~ռք յաւիտեանս, ամէն:

[ԽԳ]
ՓՈԽ

Նոր ծաղիկ պայծառ ցուցաւ
Այսաւր ի նոր բուրաստանին,
Երփնազարդ հոգւոցըն տունկք
Կենդանացան կանաչութեամբ,
Րենական լուսոյ սաղարթք
Ի հոգեւոր գարունս փըթթեալ,
Սիրով մեռեալըն վասըն մեր
Յարոյց ընդ իւր զանկեալ բնութիւնս:
Երեւեցաւ լոյս յարութեան
Ի խաւարէ ստուերաց մահու,
Սաւառնացեալ սերովբէին
Նըստէր փայլեալ վերայ վիմին,
Ի ձայն քաղցրիկ փողէր կանանցն.
_ Յարեաւ խաչեալըն Տէր Յիսուս,
Կենդանարարըն մեռելոց,
Զի՞ զկենդանին ողբայք մեռեալ:
Նա զդըժոխոց դրունս խորտակեաց
Եւ զբռնութիւն մահու ելոյծ,
Զգլուխ վիշապին ջախեաց մահուամբ,
Արբոյց նըմա զճաշակ մահու,
Դարձոյց զգերեալ հոգիսն ի նմա,
Աւար առեալ ել ի բարձունս,
Բաշխէ զպարգեւս որդւոց մարդկան:
Եկայք տեսէ'ք ըզգերեզմանն
Յաստուածային մարմնոյն ունայն,
Պետրեան դասուն պատմող լերուք,
Մահկանացուաց տուք զաւետիս,
Թէ` մահ մեռաւ, կեանքըն յարեաւ:
Ընդ անմահից անմահացեալքդ`
Համաձայնեալ տուք աւրհնութիւն
Յարուցելոյն` փա~ռք յաւիտեանս:

ԽԳա. ՏԱՂ ՅԱՐՈՒԹԵԱՆՆ ՔՐԻՍՏՈՍԻ

Նոր ծաղիկ պայծառ ցուցաւ
Այսաւր ի նոր գերեզմանէն,
Երփնազարդ հոգւոցըն տունկք
Կանաչացան կենդանութեամբ,
Րենական լուսոյ սաղարթք
Ի հոգեւոր գարունս փըթթեալք,
Սիրով մեռեալըն վասըն մեր
Յարոյց ընդ իւր զանկեալ բնութիւնս:
Երեւեցաւ լոյս յարութեան
Ի խաւարի ստուերաց մահու,
Սաւառնացեալ սերովբէին
Նըստէր փայլմամբ վերայ վիմին,
Ի ձայն քաղցրիկ փողէր կանանց.
_ Յարեաւ խաչեալն Յիսուս Աստուած,
Եկայք տեսէ'ք ըզգերեզմանն
Յաստուածային մարմնոյն ունայն:
Բաշխէ պարգեւս որդւոց մարդկան
Մահկանացուաց կենդանական.
Աւար առեալ ել ի բարձունս,
Զմարդիկ դասեաց ընդ զըւարթունս:
Նա զդըժոխոց դրունս խորտակեաց
Եւ զԲելիար դատապարտեաց,
Ստացաւ զԱդամ անդրէն ի կեանս
Յադենական տեղն եւ ի փառս:

[ԽԴ]
ՏԱՂ [ՅԱՐՈՒԹԵԱՆ]

Այսաւր ընդ ծագելն արեւուն
Անմուտ ծագեաց մեզ արեգակն:

Այսաւր խաւարն անգիտութեան
Հալածեցաւ յարարածոց:

Այսաւր լցան գիրք մարգարէիցն
Ի կատարումն եկեալ բանիցն:

Այսաւր յարեաւ Տէրն ի մեռելոց,
Յարոյց զանկեալքս ի գլորմանէ:

Այսաւր լուծան երկունք մահու,
Արձակեցան` որք յԱդամայ:

Այսաւր իջեալ հրեշտակապետն
Տայր աւետիս խընկաբերիցն.

ՓՈԽ

_ Աստուածասէր եւ սուրբ կանայք,
Զի՞ զկենդանին խընդրէք մեռեալ:
Մի' լայք անյոյս, այլ ցընծացէ'ք,
Յարեաւ խաչեալն, անմահըն միշտ:
Քարոզեցէ'ք պետրեան գընդին
Փութալ արագ առ բաղձալին:
Երգեմք եւ մեք ընդ հրեշտակին.
_ Յարուցելոյն փա~ռք յաւիտեանս:

[ԽԵ]
[ՅԱՐՈՒԹԵԱՆ], ՏԵԱՌՆ ՆԵՐՍԻՍԻ ԿԱԹՈՂԻԿՈՍԻ

Նորահրաշ արեգակն այսաւր ծագեցաւ աշխարհի
Ի գբոյ խաւարէ,

Եւ կեանք անվախճան տըւաւ մահացու բընութեանս
Ի ստուերաց մահու:

Րամից մեռելոց այսաւր պըտուղն առաջին յարեաւ
Ի գերեզմանէն,
Սիրով սուրբ կանայքն եկին աւծանել անոյշ իւղովք
Զաւծեալըն Քրիստոս:
Երեւեալ լուսափայլ հրեշտակըն գոչէր` ասելով.
_ Յարեաւ խաչելեալն:
Սարսեալ փախչէին` տըկար բնութեամբ ոչ տանելով
Տեսլեան զըւարթնոյն,

Իսկ Մարիամ ժուժկալեալ արժանի եղեւ տեսանել
Զանձկալին ինքեան,

Եւ գնացելոցն պատահիւր ի ճանապարհի յարուցեալն
Յողջոյն կենդանի:

Րաբունւոյն զողջոյնն այն առեալ տանէին աշակերտացն.
_ Տէրըն մեր յարեաւ:

Գանձին ծածկելոյ, զոր այսաւր գըտեալ մեծացաք,
Տացուք միշտ ըզփառս:

[ԽԶ]
ՓՈԽ

Կեանքն ընդ Հաւր անմահ մարմնով Տէր յարեաւ
Ի գերեզմանէն:

Առաւաւտ լուսոյ ծագեաց մեզ այսաւր
Ի գբոյ խաւարէ:

Թագաւորն, իջեալ ստորին վայր մահու,
Փըրկեաց ըզգերեալսն,

Որով մահ մեռաւ մահուամբ կենդանւոյն,
Կեանք թագաւորեաց:

Ղամբար բոցեղէն փայլեաց յարփենւոյն`
Որք ի խաւարի,

Ի կեանս վերածեաց անմահըն մահուամբ
Զմեռեալ բընութիւնս:

Կամաւ վասըն մեր զանձն իւր եդ ի մահ.
Կամաւ յարուցեալ:

Ողբային կանայքն ողբով արտասուաւք
Զբարձողն արտասուաց:

Սոսկալին փայլակնանըման երեւեալ
Լուսափայլ կերպիւ,

Ի ձայն ցընծութեան փողէր զաւետիս
Սուրբ խընկաբերիցն.

«Հայեցեալ տեսէ'ք զտեղի անմահին
Ունայն ի մարմնոյն:

Այսաւր Տէր յարեաւ, ցընծացէ'ք, ասէ,
Դըստերք Ադամայ:

ՅԵւայի մաւր լըսելիս ձայնեցէ'ք,
Աւձըն պարտեցաւ:

Ուրախ լե'ր, Ադամ, այսաւր Որդին քո
Ըզքեզ նորոգեացե:
Ցընծալով եւ մեք երգեսցուք փրկողին`
Ըզփառս յաւիտեան:

[ԽԷ]
ՏԱՂ [ՅԱՐՈՒԹԵԱՆ]

Այսաւր յարութեան մեզ ծագեցաւ, ը~, լոյս,
Լոյսն որ ի Հաւրէ
Յառաջ քան զարեւ անունն իւր:

Իւրական բանիւ ստեղծողն աւուրց լուսով,
Ի սկըզբանն աւուր հաստատեալ ըզլոյս,
Ելոյծ ըզխաւարն աննիւթ:

Աննիւթ գոյացոյց այսաւր հոգւոց, ը~, լոյս,
Լուծեալ ըզգիշեր մեղաց` ստեղծողն առաջին
Զաշխարհս եստեղծ նորոգ:

Նորոգի ի կեանս Ադամըն հին այսաւր,
Եւ նորափետուր պըճնիւք զարդարի փառաւք
Անիծաբեր երկիր:

Երկիրս երկնայնոցն եղեւ տեղի եւ էջք,
Որ աւետաբեր քարոզ`
Ի յունկն Եւայի դըստերց գոչեն ըզձայն:

Ձայնէր ի վիմին հրեշտակապետն այսաւր,
Տարփողէր կանանցն, ը~, զուարթ.
_ Յարեաւ խաչեալըն Յիսուս, փըրկիչ եւ Տէր:

Տէր գայ զաւրութեամբ յարուցանել ընդ իւր
Պըտուղն առաջին կենաց,
Ի մեռեալս ազատ զմեզ ազատեաց յուսով:

Յուսով յարուցեալքս առ մահացուն մեր գոչեսցուք.
_ Ուր մահ` յաղթութիւն քո,
Ուր դըժոխք խայթոց` կործանեցաւ խաչիւն:

[ԽԸ]
ՓՈԽ

Ցընծան այսաւր երկինք
Եւ երկնային զաւրք անմարմինք:

Ցընծայ լոյս եղանակ
Ընդ անեղին լուսոյ ծագման:

Ցընծայ լուսին ստուերին
Փայլմամբ լուսոյ անըստուերին:

Ցընծան պարք աստեղաց
Ընդ յարութիւն յաւրինողին:

Ցընծան երկիր եւ ծով`
Ի հնութենէ նորոգելով:

Ցընծան ծառք անտառի
Ըստ իսկըզբանըն զարդարին:

Ցընծան բոյսք դալարի
Ի գարնայնոյս իմանալի:

Ցընծան կենդանականք
Ընդ անմահին կենդանութեան:

Ցընծան որդիք մարդկան,
Քանզի յԱդին դրախտըն դարձան:

Ցընծայ եկեղեցի`
Զփեսայն տեսեալ յառագաստի:

Ցընծայ նորով Զատկիս,
Զենմամբ գառինն անարատի:

Ցընծան ըզգայարանքս`
Աւծեալք արեամբ պատարագին:

Ցընծամք այսաւր ի տիպ
Հանդերձելոյ մեր յարութեան:

Ցընծամք եւ անդ փառաւք,
Պարեմք ընդ զաւրս իննեակ դասին:
Ցընծամք փառատրելով,
Միշտ զյարուցեալըն գովելով:

[ԽԹ]
ՏԱՂ Ի ՏԷՐ ՆԵՐՍԻՍԷ, Ի ՅԱՐՈՒԹԻՒՆՆ ՏԵԱՌՆ

Նոր իմն աւետեաց բարբառ նորազուարճ ձայնիւ
Այսաւր գոչէր հրեշտակապետն ի վերայ վիմին:

Եդին զգլուխ անկեան ըզվէմն վիմափոր տապանն,
Զոր ոչ արգել մատանին զանպարագրելին:

Րամից անմահիցըն պետն փողէր սուրբ կանանցն.
_ Յարեաւ խաչելեալն Յիսուս, զի՞ լայք զկենդանին:

Սիրով խընկաբեր կանայքն տային զաւետիս
Դասուն սիմոնեան խըմբին. Տէրըն մեր յարեաւ:

Երեւեալ ունայն բանիցն ոչ հաւատային,
Պետրոս առ անձուկ սիրոյն արագ ընթացեալ:

Սէրըն սիրելւոյն յայտնեալ նախ եւ առանձին,
Յետ լոկ տեսանելոյ կտաւոցն ընդ միտս հիացմանն:

Ի դասս անդամոց դարձեալ` գլուխըն Կեփայեան
Պատմէր զյարութիւն գըլխոյն սուրբ եկեղեցւոյ:

Եկայք ընդ նոսին եւ մեք հոգւով ցընծացեալք,
Յարուցելոյն տացուք զփառս այժմ եւ յաւիտեանս:

[Ծ]
ՓՈԽ

Հաւր կամաւ իջեալ` Որդին մարմին ըզգեցաւ,
Արեամբ եւ մահուամբ իւր գնեաց զորդիս Ադամայ:
Յարեաւ յարութիւն եւ կեանք, յարոյց ըզբնութիւնս,
Որով պարակից եղեաք վերին զըւարթնոցն:
Ցընծալով տաւնեմք այսաւր, առ նոյն պաղատիմք.
_ Կենարար տեսլեան քո, Տէ'ր, ընդ մետասանիցն
Արժանաւորեա ըզմեզ յերկրորդ գալըստեանն.
Թագաւոր փառաց, Քրիստո'ս, յորժամ գաս փառաւք,
Որով զհողացեալ բնութիւնս հրեղէն նորոգես,
Ղամբարափայլեալ փառաւք շնորհեա մեզ յառնել,
Ի դասս աջակողմ աւդեացն կարգեա եւ ըզմեզ:
Կենդանի բարբառ քո, Տէ'ր, ըզմեզ կոչեսցէ,
Որպէս զարդարոցն երամք, ընդ քեզ վերանալ
Սրաթռիչ լուսափայլ ամպաւք յերկնային խորանսդ,
Ի նոյն միանալ սիրով ընդ սուրբ փեսայիդ,
Նոցին համաձայն աւրհնել սուրբ զԵրրորդութիւնդ:

[ԾԱ]
ՏԱՂ [ՅԱՐՈՒԹԵԱՆ]

Նոյնագոյ ընդ Հաւր բանն Աստուած,
Ի սկըզբանն առ Աստուած միշտ Էն:

Էն անմարմին անյեղ եղեալ
Եւ բնակեաց ի մեզ րամաւրէն:

Րամից Տէրն յանձն առեալ ընդ մեր
Մեռանիլ մարմնով սիրաբար:

Սէր անունն դընիւր ի տապան,
Սիրով ողբային իւղաբերքն:

Իւղաբեր կանանցն արտասուք
Դադարեաց տեսլեամբ սիրելւոյն:

Սիրեցեալն տարփմամբ անձկալւոյն
Բարբառէր` մի' յիս մերձենար:

Ի մերձենալ զուարթնոցն առ վիմին
Փողէր խընկաբերիցն` ասելով` ձեզ աւետի~ք:

ՓՈԽ

Յարեաւ փառաց թագաւորն, աւետի~ք,
Զի՞ խընդրէք զանմահն ընդ մեռեալս, մեծ աւետի~ք:

Յարոյց զբնութիւնըն Ադամայ, աւետի~ք,
Կանգնեաց ըզգլորեալ նախամայրն, մեծ աւետի~ք:

Պատմեցէք դասուն պետրոսեան, աւետի~ք,
Յովհաննու սուրբ սիրեցելոյն, մեծ աւետի~ք:

Քրիստոս յարեաւ ընդ նմա արիք, աւետի~ք:
Որդիք մարդկան, այսաւր ցընծացէ'ք, մեծ աւետի~ք:

Քրիստոս ի վեր, ելէք ընդ նմա, աւետի~ք,
Երկրաւորք, լերուք երկնայինք, մեծ աւետի~ք:

Քրիստոս յարեաւ ի մեռելոց, աւետի~ք,
Պըտուղ նընջեցելոց առաջին, մեծ աւետի~ք:
Այսաւր դրունք բացան դըժոխոց, աւետի~ք,
Ելին կապեալ հոգիքն որ ի նմա, մեծ աւետի~ք:

Այսաւր մահ մեռաւ ի կենացն, աւետի~ք,
Խաւար լուծաւ, լոյս հաստատեցաւ, մեծ աւետի~ք:

Այսաւր հինն Ադամ նորոգեալ, աւետի~ք,
Յարութեամբ նորոյ Ադամայ, մեծ աւետի~ք:

Այսաւր նոր արարածք եղեալք ի Քրիստոս,
Նորոգողին երգեմք ընդ հրեշտակս` փա~ռք ի բարձունս: