Kitabı oku: «Տաղեր», sayfa 6

[ՀԹ]
ՏԱՂ ՀԱՄԱՒՐԷՆ ՍՈՒՐԲ ՀԱՅՐԱՊԵՏԱՑՆ, Ի ՆԵՐՍԷՍ ԿԱԹՈՂԻԿՈՍԷ ՀԱՅՈՑ

 
Այսաւր մայր Սիոն ցընծայ տաւնելով,
Բանայ զառագաստ, զարդարի փառաւք,
Գոչէ խընդութեամբ յաւր յիշատակի
Դասուց ընտրելոց սուրբ հայրապետաց,
Երջանիկ խըմբից սուրբ վարդապետաց:
Զաւրք երկնից ընդ մեզ տաւնակից լինին,
Էրկիրս երեւի երկնից վեհագոյն,
Ընդ իննեակ պարուց աստ պարագայից:
Թագաւորն երկնից փոխան իւր կարգեաց
Ժառանգս աթոռոց զքահանայապետս.
Ի Հոգւոյն Սըրբոյ լըցեալք գիտութեամբ
Լուսաւորեցին սուրբ զեկեղեցի,
Խորհըրդով ծանեան ըզխորս Աստուծոյ,
Ծանուցին բանիւ բանաւոր հաւտից.
 
 
Կենացըն հացի քաղցելոց բաշխողք,
Համեղաճաշակ գինւոյն մատըռուակք,
 
 
Ձայնիւ կոչեցին առ ի ճաշակել.
Ղաւղեաց յաշխարհէ մէգ տըգիտութեան:
Ճառագայթ լուսոյ յերկիր ծագեցէք,
Միածնին քարոզք ճըշմարիտ բանիւք
Յանմահ աղբիւրէն ըզմեզ արբուցէք,
Նոր նորոգելով հոգւով գիտութեամբ.
 
 
Շարժմամբ վըտակաց ի յորովայնից
Ուրախ արարէք զքաղաքս Աստուծոյ :
Չարին արմատոց տապալիչ տապարք,
Պարուց ոչխարաց հովիւք եւ տածողք,
Ջրով կենարարաւ սնուցողք ըզգառինս,
Ռահիւք ի յերկինս առաջնորդեցէք`
Սըրբելով զոգիս սուրբ աւազանաւն:
Վարդապետք բարիք բանիւ եւ գործով,
Տան եկեղեցւոյ տընտեսք իմաստունք,
Րաբունք կատարեալք տղայոց ի Քրիստոս,
Ցաւղեցէ'ք ստեամբ կաթն խառնեալ ընդ մեղու,
Ւիւթիւ Սուրբ Հոգւոյն ըզհինն եւ ըզնորս,
Փութացեալ ելէ'ք առ հովիւըն քաջ,
Քաւիչ մեզ լերուք բարեխաւսելով:
 

[Ձ]
ՓՈԽ

 
Նորոյ գինւոյն իմաստութեան
Յոգիս նորոգ արկող Յիսուս.
 
 
Երրախումբ միակին խորհուրդ
Անհաս ի հնումն նորոց պարգեւ:
 
 
Րենական լոյս յարփւոյն ծագեալ
Ի րաբունից փայլեալ յաշխարհս:
 
 
Սապէս ծով ու երկիր լըրիւ
Սոքաւք լըցեալ գիտութեամբ Տեառն:
 
 
Երգէ Դաւիթ` գետք Աստուծոյ
Ջրովք պարարին բըղխմամբ Հոգւոյն:
 
 
Սըմին նըման համբարձան գետք
Ի ջուրց բազմաց ձայն քարոզչաց:
 
 
Իմանալի գետոցս այս գնացք
Ուրախ առնեն զքաղաքըն սուրբ:
 
 
Եկայք, տածեալք ի ջրոյն կենաց,
Տընկեալք ի գաւիթս Աստուծոյ:
 
 
Րամեալք ի մի զմեզ տընկողացւ
Զտաւնս կատարեմք ի տանըն Տեառն:
 
 
Գոչեմք ընդ հարցն համաձայնեալ,
Զփառս համագոյ Երրորդութեանն:
 

[ՁԱ]
ՏԱՂ ՀԱՄԱՒՐԷՆ ՄԱՐՏԻՐՈՍԱՑ, ՏԵԱՌՆ ՆԵՐՍԷՍԻ

 
Արեգակն արդար ըզհուր սիրոյ ծագեալ,
Զանհաւատութեան սառըն հոգւոց հալեաց.
Բանաւոր ծառոց երեւեցան ծաղիկք,
Երփնազարդ գունով, անուշահոտ բուրմամբ:
 
 
Գարուն հոգեւոր դալարացոյց զոգիս,
Գաւսացեալ տընկոց կանաչացան սաղարթք,
Դրախտին Ադենայ ծառք բազմացան յերկրի,
Ի տանն Աստուծոյ արմաւենիք տընկեալք:
 
 
Երկնից լուսաւորքն իջեալ շըրջին ընդ մեզ,
Եւ աստեղք պայծառք` համաբնակից մարդկան,
Զաւրք անմարմնականք զըւարճացեալ տաւնեն,
Մարմնաւոր զա րաց համադասեալ նոցունց:
 
 
Էրեւեալ սըրբոցն ի հանդիսի ճըգանց
Զաւրացուցանել ի հոգեւոր մարտին,
Ըզհրաւէրս ետուն ի հարսանիսն երկնից,
Ընդ որս եւ մըտին արեաներանգ զգեստիւք:
 
 
Թագաւորն անմահ ի յաշխարհէ մահու
Առեալ իւր զինուորս, անմահացոյց բնութեամբ
Ժողով զինուորաց թագաւորին երկնից
Գրեցան` ժառանգել զԵրուսաղէմ վերինն:
 
 
Ի յերկրի ճըգնեալ չարչարանաւք մարմնոյ`
Ի յերկինս ելին գերապայծառ լուսով,
Լըւան զկենարար հովուապետին բարբառ,
Ընթացան ի յաղըն բանաւոր զենմունքն:
 
 
Խաչի եւ մահու ճանապարհի հովուին
Եղեն հետեւեալ ողջակիզեալ գառինքն,
Ծընան վերըստին աւազանաւ նորով,
Մըկըրտեալք արեամբ զբաժակ մահու արբին:
 
 
Կոյսք, իմաստութեամբ զլապտերս հոգւոց լուցեալք,
Կանացի բնութեամբ մահու եղեն յաղթողք,
Հուր սիրոյ յինքեան սուրբ փեսային վառեալք
Զհուր մեղաց բոցոյ զայն շիջուցին արեամբ:
 
 
Ձիւնափայլ զոգւոց ըզպատմուճանս լուացեալ,
Գոյն արեան մարմնոյ պըսակ փառաց ներկեալ,
Ղամբարմամբ լուսոյ ի յառագաստ մըտին,
Մաքուր հարսանեաւքն ուրախացան յաւէժ:
 
 
Ճըշմարիտ վըկայք Աստուածորդւոյն եղէք,
Վըկայեցելոյն Հաւր կամաւոր մահուամբ,
Միածնի Բանին մարմնով վասն իմ մահու
Մահակից գոլով չարչարանաց կըցորդ:
 
 
Յամենայն ազանց ընծայեցայք պըտուղ,
Մեծ քահանային երախայրեաց նըւէրք,
Նըռնենեաց նըման յետ գարնայնոյ ծաղկեալք,
 
 
Ծաղկեալ նըշենեաց ի յերկրորդին սկըզբանց:
 
 
Շարադրին շինուածք անդամըք ձեր հատեալ,
Աստիճանք ելից յերկրէ յերկինըս մեզ,
Ոտից ձեր հատմամբ մեզ ուղղեցէք շաւիղս,
Ձեռաց եւ մատանց ըզմեզ գրեցէք ի կեանս:
 
 
Չարաչար կիզմամբ ողջակիզեալ մարմնոյդ,
Ըզմեզ փըրկեցէք ի կիզանող բոցոյն,
Պատուական գըլուխք յաւդեալ ի գլուխն Յիսուս,
Ըզմեզ յաւդեցէք ընդ նոյն հիւսմամբ սիրոյ:
 
 
Ջախմամբ անդամոց ձեր ընդ սիրոյ նորին
Զհոգիս մեր յախտից բըժըշկեցէք ցաւոց
Ռահիւք յաշխարհէ հալածանաւքն ըզձեզ
Յաշխարհըն վերին բարձրացուցէք ըզմեզ:
 
 
Սոսկալի ճըգամբք սուրբ վըկայից քոց, Տէ'ր,
Ի հնութեան մեղաց վերնորոգեա' ըզմեզ.
Վիրաւք քերանաց եւ գազանաց քանցիւք
Ի թունից վիրաց չար վիշապին` փըրկեա':
 
 
Տարախիլ ունկամբքն եւ կուրութեամբ աչացն
Լո'յս ծագեա յոգիս եւ զլըսելիս մաքրեա'.
Րախճանից անձանց տըրտմականաց կըրիւք
Զմեզ ի սգոյ մեղաց յուրախութի'ւն դարձո:
 
 
Ցաւալից սըրտիւքն եւ խաւարին բանտիւքն
Ի լոյսն ընդ նոսին շնորհեա' եւ մեզ լինել,
Ւիւծմամբ անդամոցն ի կիզանող տապակս
Զբոց տապոյ մեղաց շիջո յոգւոյս մասանց:
 
 
Փառացն անճառից ընդ երջանիկ վըկայսն
Հաղորդ զմեզ ընկալ աղաչանաւք սոցա.
Քե'զ, ընդ երանեալ մարտիրոսաց դասուցն,
Փառաց թագաւո'ր, մատուցանեմք ըզփառս:
 

[ՁԲ]
ՓՈԽ

 
Բանիւ աւետաւոր բարառնաբար բարբառեսցուք
Առ քեզ, եկեղեցի', դուստըր վերինըն Սիոնի.
Աստեղս անթիւ ծընար գերապայծառս եւ երկնաճեմս,
Ձագս աղաւնակերպս թաթաւելով արեամբն իւրեանց:
 
 
Նըստիս յառագաստի սպիտակափայլ բոցոյ նըման,
Զոր կազմեցին քեզ քո որդիքն չարչարանաւք եւ սուրբ արեամբ,
Ի պարզ եւ գերազանց բնակես ի լոյս դու անմատոյց,
Փոխան խաւարային բանտից նոցա եւ կապանաց:
 
 
Վանել զքո զաւրութիւնդ ոչ կարացին դրունք դըժոխոց,
Զի փեսայն ընդ քո խաչեալ եւ հարսնորդիքն են խողխողեալ.
 
 
Կենացըն կերակրով եւ բաժակաւըն զուարճանաս,
Փոխան ժուժկալութեան նոցին քաղցի եւ ծարաւոյ:
 
 
Անմահ ունիս փեսայ, թէեւ սիրով քոյին մեռաւ,
Ի կեանս են եւ որդիք, թէեւ ետուր գերեզմանի,
Յանեղծ յաւիտենին բերկրեալ խընդաս երբեմն ամուլ,
Յորժամ բնակես ի տան մայր` քո որդւովք ուրախամիտ:
 
 
Սիրով անճառ կապիս ի սէր անմահ քո փեսային
Եւ զորդիս քո ընդգըրկես խանդակարաւտ սուրբ համբուրիւ,
Նորոգ նորափետուր լուսապայծառ յորժամ ծագիս,
Արեգական նըման յարքայութեան ըստ հրամանին:
 
 
Ի մի յարմարութիւն զոգդիս ընտրեալ քոց անդրանկաց,
Ժողովեա' բարեխաւսել ընդ կենդանեացըս փըրկութեան,
Նոյնաբար, որպէս ծընար լուսազարդեալ աւազանաւն,
Վերըստին զմեզ նորոգել ի հնութենէ մեղաց մերոց:
 
 
Երրեակ յաւիտենիւք շնորհել առատ զողորմութիւն
Յայժմուս եւ յապագայն ի յանըսպառ յաւիտենին,
Րամել ի մի լրութիւն կաթողիկէ վերնում Սիոն`
Ըզմեզ զամենեսեան ընդ երանեալ սուրբ վըկայիցն:
 
 
Սըրբել սպիտակափայլ ըզպատմուճան հոգւոց մերոց
Արեան նոցա հեղմամբ եւ հոտ անոյշ պատարագաւք,
Ի գլուխըն վերըստին ըզմեզ սիրով նորին յաւդել,
Զայրի եղեալ հոգիս ընդ փեսային միաւորել:
 
 
Սըրբել զարիւն գառանցս, նաեւ զաճիւն ողջակիզացս,
Երկրորդ տալ աւազան ի մաքրութիւն մեղաց մերոց.
Էին երրեակ միոյ պըսակելոց պըսակողին,
Որդւոյ ընդ Հաւր Հոգւով փառք ի յայժմուս եւ յապագայն:
 

[ՁԳ]
ՏԱՂ ԱՆՏՈՆԻ, ՏԵԱՌՆ ՆԵՐՍԻՍԻ ԱՍԱՑԵԱԼ

 
Անտոն սկիզբն երկնաւոր ճանապարհին,
Բիւրք առաջնորդեալք նովաւ առ Աստըւած`
Գանձին յագարակի ծածկելոյ գըտողք,
Դըռնապանք արթունք ի բախել փեսային:
Երջանիկ աղքատք հոգւովք եւ սգաւորք մարմնով,
Զոր ոչ արժէ աշխարհ հալածեալք յաշխարհէ,
Էրանեալ քաղցեալք ծարաւիք արդարութեան,
Ընդ նեղ մըտէք դուռն անձուկ ճանապարհաւս:
Թագաւորին Քրիստոսի զինուորք արիք,
Ժուժկալք ի պատերազմի թըշնամւոյն:
Ի յերկրի աղ անհամից նեխելոց մեղաւք,
Լոյսք աշխարհի խաւարելոց.
Խաչին Տեառըն բարձողք չարչարանաւք,
Ծառայք մըտերիմք կոչեցեալ բարիք,
Կըցորդք տըրտմականացըն կըրից փըրկչին,
Հաղորդք ուրախութեանց նորա.
Ձայնի սուրբ փեսային գալոյ սպասողք`
Ղամբարափայլ լապտերաւք հաւատոյ:
Ճարակողք զարաւտ կենաց ընտրեալ հաւտ փոքրիկ,
Մեռեալք աշխարհի եւ խաչեալք ընդ Տեառն.
Յայգի պատուիրանացըն մըտէք գործաւնեայք,
Նոյնք յուղղակի ակաւսոյն ոչ դարձեալք.
Շինողք աշտարակի աւրինացն ի կատարումն,
Ուռք ողկուզաբերք ճըշմարիտ որթոյն:
Չարչարանաւք ստացայք զանչարչարութիւն,
Պահեցէք նորոգ ըզպատկեր սկըզբնատըպին.
Ջըրով արտասուաց զանդըս մըտաց առոգելով`
Ռահիւք լուսոյ ի յերկինս ելէք.
Սըրբոցս քոց ընտրելոցս, Յիսո~ւս, մաղթանաւք
Վերելս ի սըրտի դընել ընդ սոսա տուր մեզ
Տիրական քոց ոտից հետեւել շաւղաց
Րաբունեաց մերոց ճանապարհաւ յերկինս:
Ցընծասցուք յիշատակաւ արդարոցս այսաւր,
Ւիւսեսցուք յոգիս զաւրինակ սոցա.
Փութասցուք ի յաւթեվանս ելանել սըրբոցս,
Քրիստոսի երգել ընդ նոսին միշտ ըզփառս:
 

[ՁԴ]
ՓՈԽ

 
Նոր դրախտին քո, Տէ'ր, զոր տընկեցեր յերկրի,
Վարդ անուշահոտ եւ մանիշակ քըրքում
Առեալ ընծայեմք քեզ, թագաւո'ր փառաց,
Գերապանծ ըզվարս աստուածայնոց արանց:
Բանաւոր ծառոց զերախայրեաց պըտուղս,
Անցեալ ընդ երկինս, քահանայիդ նուիրեմք,
Նոյն խունկ բուրուառաւք զաղաւթըս սուրբ սոցա
Ի հոտ անուշից մատուցանեմք քեզ, Տէ'ր:
Սոցին մաղթանաւք եւ մաքրական վարուք
Նորոգեա' զմեզ ի հնութենէ մեղաց,
Երանականացս արժանացո' դասուց,
Րամեա' ընդ նոսին զմեզ ի լուսոյ խորանսդ:
Սըրբեա' զխաւարին ի մէնջ զխորհուրդ մըտաց
Եւ լուսաւորեա' խընդըրուածաւք սոցա'
Սոցին հետեւել լուսաշաւիղ գնացից,
Ի յանճառելւոյդ արփիանալ լուսով,
Երգել ընդ նոսին Երրորդութեանդ ըզփառս:
 

[ՁԵ]
ՏԱՂ ՅՈՎՀԱՆՆՈՒ ՄԿՐՏՉԻՆ, Ի ՆԵՐՍԻՍԷ ԿԱԹՈՂԻԿՈՍԷ

 
Անմարմնոցըն հրեղինաց
Մարմնով հաղորդ սուրբ Յովհաննէս,
Բանին Հաւր բանիւ քարոզ,
Մեծի լուսոյն նախատեսող:
 
 
Գարնան գուշակ երկրի մերում,
Քաղցրախաւսիկ ձայն տատրակի,
Դրախտին հոգւոց աստուածատունկ
Առոգանող ջուր մաքրութեան:
 
 
Երկնաւորին ճանապարհի
Յառաջընթաց աւետաւոր,
Զաւրական թագաւորին
Նախամարտիկ յասպարիսին:
 
 
Էրեւմամբ Գաբրիելին
Զաքարիայ ի տաճարին,
Ընկալար ծնունդ աւետեաւք
Անուանագրեալ ի տախտակին:
 
 
Թափեցելոյն յանճառ փառաց,
Պարագրելոյն յարգանդ Կուսին,
Ժամանեցեր յողջոյն կենաց
Յամուլ ծերոյն յորովայնէ:
 
 
Ի բերանոյն բարբառելով
Զաւրհներգութիւն պըտղոյ Կուսին,
Լըցար Հոգւով Սուրբ անդըստին,
Ըստ աւետեացըն հրեշտակին:
 
 
Խայտալով յարգանդ ծընար,
Կաքաւելով կատարեցար,
Ծագեցար նախ արուսեակ
Արեգականն արդարութեան:
 
 
Կարապետ մեծ արքային
Եւ փեսաւէր սուրբ փեսային,
Հրաւիրող յառագաստին
Մաքուր զարդիւք պըճնեալ հարսին:
 
 
Ձայն բարբառոյ յանապատէ
Ի դադարել մարգարէիցն,
Ղեւտական քահանայիցն
Լըրումն եղեր ստուերականացն:
 
 
Ճրագդ աւրինացըն Մովսեսի,
Նըսեմացեալն Իսրայելի,
Մարգարէ եւ առաքեալ
Եւ մեծ ի ծնունդըս վըկայեալ:
 
 
Յանապատի վայրաբնակեալ,
Անմարմնական վարուք մաքրեալ,
Նոր Հեղիաս Հոգւով լըցեալ,
Կըրկին ազանց արձան կանգնեալ:
 
 
Շնորհաց նորոց ի քէն սկըսեալ,
Հին աւրինաց քեւ կատարեալ,
Որ ոչ լուծեր ըզխրացս ոտից
Տնաւրէնութեան սուրբ միածնին:
 
 
Չընաշխարհիկ մարդկան ցուցար,
Կոչմամբ Հոգւոյն երեւեցար,
Պապանձեալ լեզուին լուծող,
Եւ ամլութեան մաւրն արձակող:
 
 
Ջահըն լուսոյ յերկնից ծագեալ,
Երեսնամեայ յերկրի շըրջեալ,
Ռահ գործեալ ի Յորդանան`
Ի քէն հայցէր ջուր մաքրական:
 
 
Սոսկալի հոգեղինաց
Հուրն ի հողոյդ մաքրիւր ձեռաց,
Վըկայելով Բանին կենաց`
Լըւար ձայնին Հաւր ի բարձանց:
 
 
Տեսեր զՀոգին աղաւնակերպ
Յերկնից իջեալ առ զուգականն,
Րաբունւոյն աւանդեցեր
Վարդապետել զաշակերտեալսն:
 
 
Ցընծայ այսաւր եկեղեցի
Ի յիշատակ քո պանծալի,
Ւիւսէ պըսակ զարմանալի
Յոգնանըկար քեզ գովեստի:
 
 
Փա~ռք ամենայն առաքինեաց,
Նախապըսակ մարտիրոսաց,
Քահանայ բազմանըւէր,
Քաւիչ մեզ լեր հայցմամբ առ Տէր:
 

[ՁԶ]
ՓՈԽ

 
Բարբառոյն յանապատէ ձայնիւ տացուք նըւէր,
Արուսեկին արեւուն նախընթաց ծագողին:
 
 
Նոր հարսին հրաւիրողի առ երկնաւոր փեսայն,
Սա որ յարգանդէ ընտրեալ խայտաց ընդ առաջ Տեառն:
 
 
Այն որ մեծ ի ծնունդս կանանց Տէրըն վըկայեաց,
Յանաւրէն գինարբուսն խորհին մահ նըմա:
 
 
Սաւս երփնազարդ պըճնիւք կաքաւէր աղջիկն,
Նըւէր խընճոյից խընդրէր զարիւն արդարոյն:
 
 
Վարձ կաքաւելոյն առեալ ըզգլուխ քարոզչին,
Առ գլուխըն Քրիստոս յաւդեալ գըլուխ Մըկըրտչին:
 
 
Գերեալ ի դըժոխս հոգւոցն աւետէր Հոգւովն.
_ Ե'ս մըկըրտեցի զաւծեալն, որում սպասէիք:
 
 
Ադամ նախաստեղծ, զարթի'ր, արի, որ նընջեսդ,
Լուսատու լիցի Քրիստոս քեզ ի խաւարիդ:
 
 
Ի յամլորդւոյս ընկա'լ, Եւա, զաւետիս`
Նոր Ադամ ծընաւ քո դուստրն` կոյսըն Մարիամ:
 
 
Ես յառաջընթաց նըմին յաշխարհ կենդանեաց
Րահիս ի ստորին վայրիս նոյն կարապետեմ:
 
 
Սա խաչիւ մահու գայ աստ, ազատէ զգերեալսն,
Ի սոյն ցընծասցուք եւ մեք աւետեաց յուսով:
 
 
Սուրբ յիշատակաւ սըրբոյս փա~ռք երրեակ անձանց,
Երիցն ի միում բնութեան այժմ եւ յաւիտեանս:
 

[ՁԷ]
ՏԱՂ ՈՐԴՒՈՑՆ ՈՐՈՏՄԱՆ, Ի ՆԵՐՍԷՍ ԿԱԹՈՂԻԿՈՍԷ ԱՍԱՑԵԱԼ

 
Որդիքն Որոտման, որք ի վերուստ որոտացին,
Յամպոց հրեղինաց հողմով Հոգւոյն հընչեալ յաշխարհս:
 
 
Յաշխարհ ծարաւուտ զանձրեւ կենաց հոսեալ յերկնից,
Զերկիր բանաւոր առոգելով առատապէս:
 
 
Առատավըտակ գետոց բըղխումն ի յԱդենայ,
Չորրորդն Եփրատէս նըշանակէր ըզՅովհաննէս:
 
 
Յովհաննէս` սիրող սիրեցելոյն առ ի Հաւրէ,
Անկեալ ըզլանջաւքն եւ ոչ կիզաւ յահեղ բոցոյն:
 
 
Բոցով բորբոքեալ անձկակարաւտ տարփմամբ սիրոյ,
Ճեպիւր փոյթընթաց ի գերեզման յարուցելոյն:
 
 
Յարուցեալն յայտնիւր առ ծովակին Տիբերական,
Ծանեաւ սիրեցեալն, աղաղակէր, թէ` այն է Տէրն:
 
 
Տէրըն հրաւիրէր զՊետրոս ըզկնի իւր հետեւել,
ԶՅովհաննու ասէր. «Զի թէ կամիմ` կեցցէ ի սպառե:
 
 
Ի սպառ սիրեաց զսէրն եւ սիրեցաւ անզուգապէս,
Զոյգ եւ հարազատըն Յակոբոս մաքրեալ անձամբ:
 
 
Յանձն առին ըմպել զբաժակ մահու կենարարին,
Մըկըրտեալ արեամբ, զոր ընկալաւ Տէրն ի խաչին:
 
 
Ի խաչին ըզմայրըն սիրելւոյն իւր աւանդէր,
Շնորհիւ դաւանէր ըզնա Որդի սըրբոյ Կուսին:
 
 
Զկոյսըն Մարիամ առեալ յինքեան սպասաւորէր,
Մինչեւ ի Փոխումն յիմանալեացըն կայարանս:
 
 
Կացեալ յաշխարհի քարոզ բանին ճըշմարտութեան,
Աւետեաց ձայնիւ գոչէր ըզկենդանի ըզԲանն:
 
 
Բանն որ էր Աստուած ի սկըզբանէ առ Աստուած Հայր,
Ծընունդ միշտ Էին, որով եղեն գոյք յանգոյից:
 
 
Գոչումն որոտմանցն յետ հոսելոյն զանձրեւ կենաց,
Ամփոփեալ յերկինս առ առաքողն անդրէն դարձան:
 
 
Յակոբոս վըկայ վաղահասուկ տընկոյն պըտուղ,
Ի Հերովդիայ զբաժակ մահու արեան արբեալ:
 
 
Արբ եւ Յովհաննէս` թէ ոչ զարեանն, այլ ըզսիրոյ,
Որով հետեւեաց իշխանաբար առ բաղձալին:
 
 
Ի բաղձալին լոյս արփիական փափագեցին,
Զոր տեսին աչաւք ի սուրբ լերինն Թաբաւրական:
 
 
Ի լեառըն սիոն վերասլացեալ ելին փառաւք,
Յանդրանկաց կայանս, ուր անդրանիկն է մեռելոց:
 
 
Մեռելոց լերուք եւ կենդանեաց միշտ բարեխաւս`
Տալ ըզքաւութիւն եւ ըզպարգեւս ողորմութեան:
 
 
Որ ողորմութեամբ շինեաց զաշխարհս բանն Աստըւած,
Տացուք նմա ընդ Հաւր եւ Սուրբ Հոգւոյն զփառս յաւիտեան:
 

[ՁԸ]
ՓՈԽ

 
Նոր լոյս յարփենւոյն առեալ Որդիքն Որոտման,
Որդւոց Սիոնի ծագեն Աւետարանաւն:
 
 
Եդեմեան վըտակ բըղխեն յերկիր ծարաւուտ,
Ծառքըն Տեառն ըմպեն յամպոց զանձրեւըն կենաց:
 
 
Րաբունն երկնաւոր յաւտեալ զորթըն հոգեւոր,
Զուռս ի նոյն հաստեալ սըրբեաց լինել պըտղաբեր:
 
 
Սիրելիք սիրոյն զբաժակն ըմպել խոստացան,
Մըկըրտել արեամբ ընդ նոյն կամաւ յանձն առին:
 
 
Էն ի միշտ Էէն ծընեալն մարմնով ծընանի,
Զոր քարոզք Բանին տեսին եւ շաւշափեցին:
 
 
Սիրատարփ զլանջաւքն անկեալ կիզանող բոցոյն,
Զոր եւ ի լերինն Թաբաւր տեսեալ թըմբրեցան:
 
 
Ի մակադրութիւն անուանց վերապատուեցան,
Յորդւոց Զեբեդեայ փոխեալ յՈրդիսն Որոտման:
 
 
Եւս ի բարձրագոյն ելեալ որդի կուսական,
Էութեան Բանին պատմող գոլ աստուածաբան:
 
 
Րենական լուսով լըցին զաշխարհս ամենայն,
Անձկալի հոգւով առ նոյն վերափոխեցան:
 
 
Գովել զըստեղծողն էից զԲանըն ծանուցին,
Որում եւ տացուք ըզփառս ընդ Հաւր եւ Հոգւոյն:
 

[ՁԹ]
ՏԱՂ ՍՐԲՈՅՆ ՍՏԵՓԱՆՈՍԻ ՆԱԽԱՎԿԱՅԻ, ՏԵԱՌՆ ՆԵՐՍԷՍԻ ԿԱԹՈՂԻԿՈՍԻ

 
Ի խաչին տընկեալ որթոյն
Ողկոյզ վաղահաս խայծեալ,
Քարամբըք ճըմլեալ գինի
Ուրախարար սիրով:
 
 
Սէր սիրոյ սերման ծընունդ,
Սիրաբողբոջ բուսոյ ծաղիկ,
Պըտուղ քաղցրահամ ճաշակ
Հրեշտակատիպ տեսիլ:
 
 
Տեսանող Էին լուսոյ
Անտեսին Հաւր ի բարձունս.
Այլեւ ծոցածին Բանին
Անեղին եղեալ երբին:
 
 
Երբեմն անեղին առեալ
Սկիզբն եղականի բնութեանս,
Զոր եւ տեսեալ վըկայն
Յերկինըս բազմեալ փառաւք:
 
 
Փառաց թագաւորն երկնից
Յայտնեալ զինուորին յերկրի.
_ Ի յասպարիսիդ վասն իմ
Դու մի' երկընչիր,_ ասէ:
 
 
Ասէր աղաղակելով
Առ տիրասպանիցն հանդէս.
_ Ահա տեսանեմ զՅիսուս
Հաւր ընդ աջմէ նըստեալ:
 
 
Նըստեալն յառնէր ցուցանել
Վերին հրեղինաց դասուցն.
_ Տեսէ'ք զհողեղէն բնութիւնն
Վասն իմ չարչարեալ նըման:
 
 
Նըման խաչելոյն հայցէր
Թողութիւն ըսպանողացն,
Որով կոչեցեալ Սաւղոս
Սորին հետեւեալ ոտից:
 
 
Ոտիւք սըլացեալ յերկինս
Ի ձեռըս քո, ասէ,
Յիսո'ւս, աւանդեմ զհոգիս
Մինչեւ ի գալուստ քո սուրբ:
 
 
Սուրբըդ Ստեփանոս պըսակ
Եւ նախամարտիկ վըկայ,
Վասըն տաւնողացըս քո
Լեր միշտ բարեխաւս առ Տէր:
 

[Ղ]
ՓՈԽ

 
Նոր ծառոյն կենաց աստուածատունկ դրախտին,
Ծաղիկ նախածին փըթթեալ բուրմամբ անուշից,
Պըտղաբերելով զսուրբն Ստեփանոս:
 
 
Արեւն ամփոփեալ ի ծոց ծագողին զարեւ,
Աստղ համապայծառ ծագեալ փոխան լուսատու,
Յարփենւոյն կենաց, սուրբըն Ստեփանոս:
 
 
Խաչին խաղողոյ զիմաստութեան բաժակն
Մանկանց Սիոնի նորոյ ի յուրախութիւն
Մատըռուակելով, սուրբըն Ստեփանոս:
 
 
Անմահին մահու նոյն մահակից գոլով,
Ըզմահ մեռուցեալ մահուամբ ըստ կենարարին
Քարկոծ խողխողմամբ, սուրբըն Ստեփանոս:
 
 
Վըկայ խաչելոյն անմահութեան կենաց,
ԶՈրդի տեսանեմ մարմնով ընդ աջմէ բարձրելոյն,
Աղաղակելով գոչէր, սուրբըն Ստեփանոս:
 
 
Կացեալ յատենի վասն ոչխարին իւր, գառն
Որոջ վայելուչ կըտրեալ գեղմըն լուսակիզն
Հրէական ձեռաւք, սուրբըն Ստեփանոս:
 
 
Առ Տէրըն փառաց աղաւթելով նըման
Ծունըր մաղթանաւք նուիրէր չհամարել ըզմեղս
Ապերախտ ազգին, սուրբըն Ստեփանոս:
 
 
Յաւանդ առ Յիսուս զհոգին տըւեալ նորուն,
Փառաց ընկալեալ պըսակ ըզյաղթանակաց,
Յաղթողն ի մարտի, սուրբըն Ստեփանոս:
 
 
Նախասարկաւագ եւ առաջին վըկայ
Ստեփանո'ս, պըսակ շնորհաց զքեզ պըսակողին,
Լեր միշտ բարեխաւս զմեզ կեցուցանել:
 
 
Էին միայնոյ երրակ եւ մի լուսոյն
Մատուսցուք յաւէտ ըզփառս ի յիշատակի
Նախավըկային, յաւէտ յաւիտեանս, ամէն: