Kitabı oku: «Assunta Spina: In due atti», sayfa 3
Sgueglia
(che ascolta anche lui)
E ce l'arapette.
Donn'Emilia
'O pate è nu viecchio nzallanuto ca nun è buono manco a ardere. Faceva 'o cuoco int' 'a tratturia d' 'a Bella Napule, e 'o princepale nn' 'avette mannà pe disperazione. St'Assunta 'o vulette essere miso 'a tratturia d' 'o Ribicchino, e stu don Michele, piglie…
Torelli
(che ascolta anche lui)
E ce 'o mettette.
Donn'Emilia
E po', nu' ve dico niente, mo a Pusilleco, mo a Secunnigliano, n'ato juorno addu' Pallino, campagnate 'a ccà, rivertimente 'a llà, gelate, zeppule a San Giuseppe… Ah!.. E che ne vulite sapé? (Rompe un altro pezzetto di cioccolatte) Sta ciucculata 'a essa ll'aggio avuta… (mangia).
Federigo
E tutto questo amore è finito con una tagliata di faccia!
Donn'Emilia
Amore? Eh!.. (ironica. Mette in bocca un altro pezzo di cioccolatte) Amore! (si leva).
Federigo
No?
Donn'Emilia
Cioè, isso sì, isso ll'ha sempe vuluto bbene.
Federigo
E lei?
Donn'Emilia
E lei… Lei… Vulite sapé 'a verità? Io st'Assunta nun ll'aggio pututa maie capì! Chesta ogne tanto lle vota 'a capo pe quaccheduno, e, ogne tanto, pe ccausa soia, quacche povero figlio 'e mamma passa nu guaio.
Federigo
Ah? È pericolosa?
Donn'Emilia
È strambalata, 'on Federì. È na femmena curiosa assaie. Vo' bene, nun vo' bene, s'appiccia, se stuta, mo v' 'a strignite int'a na mano, mo ve sfuie comm'a n'anguilla… Ah!..
Federigo
È interessante.
Donn'Emilia
È cevetta.
Federigo
Già… Ma un certo genere di civetteria…
Donn'Emilia
Sicuro: avite raggione. Tuttuquante 'a vanno appriesso. E pur io, 'a voglio bene. Neh, comme se spieca?..
Federigo
Ma pecché ll'ha tagliata 'a faccia?
Donn'Emilia
Comme! Chella s'era misa a fa 'a cummedia cu na guardia 'e pubblica sicurezza! Int' 'o stesso quartiere! Ma sta bene?
(La porta della 5.ª Sezione si schiude. Qualcuno esce. Esce Tina seguita da Pesce che le fa l'asino… Si ode, appena s'apre la porta, la voce dell'avvocato)
La voce dell'avvocato
Sì, o signori! Lo scoppio della passione in una anima ribelle, ma sincera!..
(La porta vien chiusa. Non si ode più la voce)
Donn'Emilia
Chi sta parlanno?
Federigo
L'avvocato.
Donn'Emilia
E Tina addo' sta? Tina!.. Tina!..
Sgueglia
(seccato)
Tina Ti'!.. (si rimette a scrivere).
Tina
(dal fondo, seguita da Epaminonda)
Mammà?..
Donn'Emilia
E statte ccà! Lèvete 'a miezo 'a folla!
Tina
Mammà, sta parlanno ll'avvocato! Io 'o voglio sentì! (riapre la porta e rientra nella 5.ª Sezione, seguita da Pesce: si ode daccapo la voce dell'avvocato).
Donn'Emilia
(a Tina)
Viene ccà!..
La voce dell'Avvocato
E non a caso, o signori, ho citato il verso di quel poeta che, inneggiando al ribollente Vesuvio…
(La porta si chiude. Non s'ode più la voce)
Donn'Emilia
(ascoltando)
Che dice? 'O Vesuvio? E che ce trase 'o Vesuvio?
Federigo
Eh, va buono! Chillo è paglietta, vo vencere 'a causa e ce fa trasí 'o Vesuvio, Pumpei, 'a Grotta 'e Pezzule… Eh! 'A quanto tiempo avarranno fatto pure 'a sentenza!
Donn'Emilia
Ah, forze vurrà ntennere ca stu don Michele è comme 'o Vesuvio, ca votte fuoco…
Federigo
Pecchè, 'on Michele pure votte fuoco?
Donn'Emilia
Mena 'e curtellate, 'on Federì!
Federigo
Meglio, meglio!
(Campanello dalla 5.ª Sezione. Mormorio là dentro. La porta si apre)
Donn'Emilia
È buono cumm' 'o ppane, ma quanno ll'è scesa 'a benda nnanz 'a ll'uocchie è n'animale!
Federigo
Meglio, meglio!
Donn'Emilia
Eh, meglio, meglio! E tene già n'ati dduie ferimente ncuollo!
Federigo
Recidivo? Meglio!
Donn'Emilia
(volendo entrare nella 5.ª)
Scusate, voglio vedé Tina addo' sta…
Federigo
(trattenendola)
Aspettate… sentite…
Voce di usciere
(dalla 5.ª Sezione)
La Corte!
(Mormorio, poi silenzio profondo)
Federigo
(di fretta, sottovoce a donn'Emilia)
Sentite buono… 'onn'Emì… Vuie, a me…
Donn'Emilia
(sorpresa)
Ched'è, neh, 'on Federì?
Federigo
Vuie mme sapite pe scuitato… Avite capito?
Donn'Emilia
(sorpresa e confusa)
E pecché?..
(Risuona un alto grido nella 5.ª Sezione: «Ah! Figlio mio!.. Figlio mio!..»
Subito dopo, una scampanellata. Mormorio animato. Esclamazioni. La folla esce dalla 5.ª Sezione, parlando a voce alta).
SCENA SETTIMA
Assunta Spina è tra le prime a uscire dalla Sezione. È stravolta, atterrita. Si preme la mano sinistra sulla benda e la tien ferma alla guancia. Agitando l'altra mano, a donna Emilia che le si fa incontro, con voce rauca:
Assunta
Duie anne! Duie anne!.. (si batte con la palma della destra in fronte).
Donn'Emilia
(spaventata)
Overo!?..
(Arrivano curiosi da destra e sinistra. Quasi contemporaneamente a Assunta escono dalla Sezione Donna Concetta, Furturella, Filomena, Ernestina, Tittariello, Tina e Pesce, che si affollano alla porta per vedere uscire Michele. Controscena di tutti. Gli uscieri Sgueglia e Torelli seguitano a scrivere. Michele esce subito tra due carabinieri e una guardia di Publica Sicurezza, ammanettato. I carabinieri si fanno largo tra la folla).Voce di usciereFuori! Fuori! Uscite!Concetta(cercando di avvicinarsi a Michele)Michè! Michè!..
Voce di usciere
Fuori! Fuori! Uscite!
Concetta
(cercando di avvicinarsi a Michele)
Michè! Michè!..
Un carabiniere
(scostandola e sospingendo Michele)
Avanti!
(Michele Boccadifuoco passa tra i carabinieri, movendo verso la destra. La folla lo segue mormorando. Concetta singhiozza, trascinandosi a stento dietro di lui)
Concetta
(vede Assunta, si fa largo tra le femmine che la sorreggono e, con le braccia levate, le urla):
Mm'è subbissato a nu figlio!
(Le donne la trascinano via per la destra. Viano tutti per la destra. Il mormorio diminuisce a poco a poco)
SCENA OTTAVA
Assunta, Ernestina, gli uscieri, Tina, donn'Emilia, Pesce, Federigo. La folla continua a passare, in silenzio.
Assunta
(sul davanti, come trasognata, a Ernestina che le sta vicino)
Ernestì!.. Duie anne! Duie anne!
Ernestina
(colpita anche lei)
E chi ss' 'o crereva?
Assunta
(come tra se stessa)
Duie anne!
(Un silenzio. Don Federigo s'è appoggiato col dosso alla tavola di Sgueglia. Donn'Emilia, Tina e Pesce fanno gruppo in fondo. Assunta e Ernestina stanno accanto alla tavola di Torelli)
Ernestina
(a Assunta)
Jammuncenne…
Assunta
Mme tremmeno 'e ggamme… (s'appoggia con la mano al tavolo di Torelli).
Ernestina
Vulite vévere?
Assunta
No…
Ernestina
E assettateve… (le offre una seggiola. Assunta siede. Donn'Emilia si fa avanti, muta, spiaciuta. Assunta leva gli occhi e la guarda).
Assunta
(a donn'Emilia)
Duie anne, 'onn'Emì! Avite ntiso?..
Donn'Emilia
Ma vedite! E quanno maie pe na tagliata 'e faccia se so' ddate duie anne!..
Assunta
Era ricidivo, 'onn' 'Emì! E l'hanno carculate pure chille ati dduie ferimente che facette! (scuote la testa dolorosamente).
Donn'Emilia
Overo? Gué, ma ccà ncoppa nun se scordeno 'e niente!
(Un silenzio)
Assunta
Pe duie anne nun 'o veco cchiù! (china la testa fra le mani).
Federigo
(addossato al tavolo di Sgueglia, guardando Assunta)
Macché!
Assunta
(leva la testa e lo guarda)
Federigo
(facendosi una sigaretta, tranquillamente)
Se resta a Napoli siete sempre padronissima di vederlo almeno due volte al mese.
Ernestina
(a Assunta)
Avite ntiso?.. (a Federigo). Overo neh signó?
Assunta
(continua a guardare Federigo)
Ma pecchè? Nn' 'o ponno pure mannà fore?
Federigo
(continuando a farsi la sigaretta)
Eh! Molto probabilmente.
Ernestina
E addo' nn' 'o ponno mannà?
Federigo
Che so? A Capua, a Salerno, al carcere d'Avellino. Secondo. (accende la sigaretta e contempla Assunta, sottocchi).
Assunta
(scuote la testa, con gli occhi a terra, come meditando, sgomentata)
Federigo
(dopo un silenzio e senza guardare Assunta)
Salvo… qualche impegno. Per mezzo del quale potrebbe restare anche a Napoli…
Ernestina
(toccando il gomito a Assunta che guarda Federigo)
(Avite ntiso?)
Assunta
(a Federigo, ansiosa)
Po' resta' a Napule?
Federigo
(guardandola)
Dipende. (Assunta si leva. Egli le si accosta, lento. Sottovoce). Tutto se po' fa. (Un silenzio). Tutto si può accomodare. (più sottovoce). Io pozzo accuncià fatte pure cchiù gruosse 'e chisto.
Assunta
(dubiosa, fisandolo)
E vuie… chi site?
Federigo
(grazioso)
Un vostro ammiratore.
Torelli
(scrivendo, dal suo tavolo)
(Ntránchete!)
Assunta
(senza comprendere)
Chi site?..
(Donn'Emilia si avvicina, curiosa)
Federigo
Un amico di donn'Emilia.
Donn'Emilia
(sorpresa e seccata)
(Puozze passà nu guaio!)
Federigo
(facendo segno a Donn'Emilia)
'Onn'Emì?..
Donn'Emilia
(accostandosi, interdetta)
Già… ce cunuscimmo… Uh! 'A tanto tiempo!..
Federigo
(battendole lievemente e familiarmente sulla spalla)
'Onn'Emilia mme sape piccerillo… 'Onn'Emì, 'o primmo figlio ca faccio quanno mme nzoro (con intenzione) mme ll'avite piglià vuie!
Donn'Emilia
Onore e piacere! (Puozz'essere acciso! Chillo nne tene dduie!)
Assunta
(sottovoce a donn'Emilia, mentre Federigo s'accosta a Tina e ad Epaminonda e si mette a parlare con costoro)
(Chi è stu giovene?)
Donn'Emilia
(sottovoce)
(È n'impiegato 'e ccà ncoppa).
Assunta
(c. s.)
(Avite ntiso c'ha ditto?)
Donn'Emilia
(c. s.)
(No… 'a verità…) (vedendo che Federigo si riavvicina) Neh, Tina! Ce ne vulimmo i'?
Tina
(a cui Pesce continua a far l'asino)
Mo, mammà! Voglio vedè comme fenesce 'a causa 'e chillo cafone!
Donn'Emilia
Tu qua cafone! Jammuncenne!..
Voce di usciere
(dalla 8.ª Sezione)
Aniello Battaglia!
Voce nella folla
Presente!
(Un prete entra nella 8.ª Sezione)
Pesce
(a Donn'Emilia)
Sentite, io aspetto un amico. Fra dieci minuti, se permettete, sarò libero e mi procurerò il piacere d'accompagnarvi.
Donn'Emilia
Ma voi dove abitate?
(Restano a parlare in fondo)
Federigo
(si avvicina rapidamente a Assunta e le dice piano e subito)
Volete che m'incarichi io di ottenere che il… vostro amico… resti a Napoli?
Assunta
(commossa)
Vuie overo dicite?
Federigo
Volete?
Assunta
(c. s.)
E che ce vo?.. Che v'aggia dà?
(Il dialogo segue rapido e basso. Torelli, di volta in volta, presta orecchio, lasciando di scrivere)
Federigo
Niente.
Assunta
(sorpresa, incredula)
Comme? Niente? (Un silenzio) Ce vonno 'e denare, 'o ssaccio… (risoluta) Ma io mme mpigno ll'oro, mme mpigno 'e rusette, faccio nu debbeto… Nun ce penzate!.. Dicite!.. Quanto ce vo? (lo afferra pel braccio).
Federigo
(dolcemente)
Vi ho detto che non occorre.
(Campanello dalla 5.ª Sezione. La folla vi accorre, entra o si ferma davanti alla porta)
Assunta
(a Federigo, quasi tremante, sottovoce)
Sentite… E dicite!.. Parlate!.. Nun ce vonno 'e mezze?.. (Federigo fa spallucce) No?.. E vuie mm' 'o facite pe senza niente?
Federigo
Pe senza niente.
Assunta
Vuie facite restá a Michele a Napule?
Federigo
Sì.
Assunta
(dubiosa, tornando a pigliarlo pel braccio)
E si nn' 'o manneno fora?
Federigo
(fa segno, con gli occhi e col capo, di no)
Assunta
(incalzando)
E… nun vulite… niente?
Federigo
(la guarda, con intenzione. Assunta pare indecisa sempre e dubiosa. Lo guarda. Guarda Torelli che sorride. Torna a fisare Federigo. Comprende)
Ah!.. (con gli occhi spalancati guarda Federigo. Sorride, amaramente. Gli mette la mano sul braccio).
Assunta
'O ssapite… Grazie.
Federigo
Grazie 'e che?
Assunta
(sorridendo, amara, ironica e dominandosi)
Grazie, grazie… Sperammo ca resta a Napule. (siede al tavolo di Torelli).
Federigo
(fa un gesto di disappunto. Poi, freddamente, con indifferenza)
Come volete.
Torelli
(tra se, rimettendosi a scrivere)
(Palla corta!)
(Federigo si rimette a sedere alla tavola di Sgueglia, che è come assorto e si tiene la testa fra le mani. Di volta in volta e sottocchi Federigo guarda Assunta, che pare non voglia incontrarsi col suo sguardo. Donn'Emilia, Tina e Pesce discorrono più in fondo)
Federigo
(scherzando con un quadrello che è sul tavolo di Sgueglia, a costui)
Che se dice, 'on Diodà?
Sgueglia
(seccato, levando la testa)
E che s'ha dda dì?.. Uffa!..
Federigo
State 'e malumore?
Sgueglia
(tentennando il capo)
Eh! Caro don Federigo! Vedete, io sto qua… ma 'a capa mia sta a n'ata parte. Mia moglie è uscita di conti da sette giorni.
Federigo
Bravo!
Sgueglia
Bravo, ove'?
Federigo
E che paura avete?
Sgueglia
Comme, che paura avete? Chella po' figlià 'a nu mumento 'a n'ato!
Federigo
Be'?
Sgueglia
E chi ll'assiste?
Federigo
Già. Avete ragione. Guai del matrimonio. Sapete chi è veramente libero, felice, padrone di sè stesso? (con intenzione, e guardando Assunta, sott'occhi) Chi nun è nzurato.
Sgueglia
E lo dite a me?!..
Assunta
(a Ernestina)
Mme pare c'aggio ntiso 'a voce 'e Tittariello…
Ernestina
'O vedite lloco!
