Kitabı oku: «Гунилгэн хохтолин», sayfa 3

Yazı tipi:

Сигука̄н
(нимӈака̄н)

Эр городӯ бичэ̄н. Хэгды агӣдӯ хуна̄тка̄н индечэ̄н, гэрбин Сигука̄н.

Нуӈан бикичин со̄ ая, ӈэ̄ри бичэ̄н. Дю̄н мэ̄римэмэ, чулама авлака̄ндӯ бичэ̄н. Мэ̄нин Сигука̄н со̄ гудей хуна̄тка̄н: ню̄риктэлин алтамал, э̄халин чуламал, дэрэкэ̄нин багдама, ме̄ванин бэрэм. Сигука̄н гиркичӣ бичэ̄н: улукӣ, улгукӣчэ̄н, некэ̄, токӣтка̄н, туксакӣ, хе̄лакӣ, хорокӣ, орон. Нуӈартын инэӈӣтыкин эвӣдевкӣл, хавалдявкӣл, хуӈтулдӯ бэйӈэ̄лдӯ бэлэтчэвкӣл. Умнэ̄ бэйӈэ̄л бумӯллэ. Тэ̄лӣ Сигука̄н диктэвэ тэвлэнэ̄чэ̄н. Тар диктэвэ депмӣ – авгарадяӈа̄тын гунчэ̄л. Сигука̄н орондӯви угучала̄ран, ӈэнэхинэн. Хоктон горо бичэ̄н. Алапчу диктэ сигӣдӯ, агӣ чагида̄дӯн, балдыдяча̄н.

Тар агӣдӯ хуӈту хуна̄тка̄н Бе̄гака̄н дю̄тадяча̄н. Нуӈан гиркилин бичэ̄тын: сулакӣ, иргичӣ, се̄ка̄лан, тура̄кӣ, кукты. Нуӈартын бикӣчитын сигима, коӈномо агӣдӯ бичэ̄н. Бе̄гака̄н са̄ча̄н, о̄кин Сигука̄н тэвлэнэ̄деӈэ̄н. Бе̄гака̄н Сигука̄нма дявада̄ви, мэ̄ндӯви эмэндэ̄ви дялда̄ран. Тэ̄лӣ нуӈан дю̄н, коӈномо агӣдӯ бидерӣ, ӈэ̄ри о̄дяӈа̄н. Бе̄гака̄н сигӣ се̄кталдӯн дыкэнэн, Сигука̄нма ала̄чиллан.

Сигука̄н ороннунми диктэвэ тэвлэрэн, дю̄ла̄ви мучӯллан. Нуӈартын сигӣ агилӣн ӈэнэдечэ̄тын. Сигука̄н оронин Бе̄гака̄н дыкэнчэдерӣвэн мэдэрэн, хуӈту хоктолӣ дыӈнӣмэрэн, Сигука̄нмэ айран. Нуӈартын дю̄ла̄вар мучӯра, диктэт бэйӈэ̄лвэ улӣрэ. Бэйӈэкэ̄р хима̄т авгарара. Сигука̄н агӣдӯн ня̄н сэвдепчу, инемӯпчу о̄ран. Эрдэлэ̄-дэ̄т нуӈартын аят бидерэ.

Ӈӣ аява хуӈтулдӯ о̄вкӣ – тар аят бивкӣ!

Дукуран Данилова Мария, 17 анӈанӣчӣ,
Иеӈнэдӯ Нерюнгринскай райондӯ Саха Республикадӯ бидерӣ,
11 класстӯ Г.М. Василевич гэрбивэн
гэрбитэдерӣ школадӯ алагӯвдярӣ

Таткӣттӯ «Арктика»

Дорово, Арктика! О̄н биденни?
Бӣ аят бидем, минэ гэлэ̄линни?
Анӈанӣл ӣлтэнэ, бӣ тара са̄дем.
Таткӣт минӈӣ, бӣ синэ ая̄вдем.

Аяткӯл алагӯмнӣл эдӯ хавалдяра,
Минӈӣл иргимнӣл тадӯ эмэ̄нмурэ.
Кэтэвэ аява сӯ миндӯ о̄рас,
Бакадям хоктови, сӯ тара нуӈнӣрэс.
Таткӣт «Арктика» мунэвэ ая̄вувкӣ,
Мундӯ аяткӯ дю̄явун о̄вкӣ.
Таргачӣн таткӣт ӣдӯ-дэ а̄чин,
Ме̄ванми бӣ эдӯ эмэ̄нчэ̄в.

Мэ̄нӈӣвэр дю̄вар экэллу омӈоро,
Хутэлдӯвэр талӣ улгучэ̄ндекэллу.
Элэ эр таткӣттӯ омӣ бисин,
Бугды̄т гундем: «Эдӯ кэргэнми минӈӣ!».

Дукуран Каянович Кирилл, 17 анӈанӣчӣ,
бикӣттӯ Нируӈнадӯ Саха Республикадӯ бидерӣ,
11 класстӯ таткӣттӯ «Арктика» алагӯвдярӣ

Энӣ

Эр тӯрэ̄нмэ куӈака̄ндукви
Ме̄вандӯви дявӯчадям.
Эр тӯрэ̄нмэ эрэгэр⁷ бӣ,
Инемуденэ, синдӯ гундем.

Энинми минӈӣ ая̄врӣв,
Горово сӣ миннун бидекэл.
Со̄мат синэвэ ая̄вдем,
Дӯннэлӣ аят ӈэнэдекэл!

Энекэду

Ӈӣ митту кутуя бувкӣ,
Одёдёно мунэвэ бидевкӣ?
Ӈӣ митту урӯнэ бӯвки,
Ая̄вденэ мунэвэ̄ индевкӣ?
«Сӣ – мунӈи ӈэ̄рӣ гарпа!» —
Умнэ̄кэ̄н-нун тыкэ гундерэв, —
«Сӣ мунӈи ая̄ткӯ энекэ̄вун,
Синэвэ бӯ со̄т ая̄вдерэв!
Сомат а я̄т тара са̄кэл!».

Эдӣгэ̄н дӯннэв

Мэ̄нӈидӯкви дю̄дукви
Бӣ городӯ биде̄м.
Хунӈэл эдӯ эчэл хӯнӈэ̄дерэ,
Хола̄ӈэ эдӯ эчэ ӈэ̄ридерэ.

Иӈин дӯннэв нямаван дёнилим,
Салгина эрӣдэви гэлэ̄лим.
Эдӣгэ̄н дӯннэви би ичэглэ̄дем,
Биралӣ дюла̄ви дэгиглэ̄дем.

Эдигэ̄нду урэлэ туктыдеӈэв,
Бира̄ви ая̄вденэ ичэтчэӈэв,
Мэргэ̄нмӣ эдӯ сокорӣвдяӈан,
Ме̄вандув со ая эдӯ о̄лдяӈан.

Дукуран Саввина Альбина, 16 анӈанӣчӣ
бикӣттӯ Нируӈнадӯ Саха Республикадӯ бидерӣ,
10 класстӯ таткӣттӯ «Арктика» алагӯвдярӣ

Дюгар улгур

Минӈӣ амака̄в о̄кин-да гундеӈкин:

– Сӣксэ дю̄ла̄ мӯвэ, мо̄ва ӣвувкэ. Чипича̄л ичэтчэрэ! Чипича̄л омӣлва ӈэнэвдерэ.

Дюга, я̄ӈдулӣ нулгиденэл, кэтэвэ-кэтэвэ дёлодук о̄вувча̄лва са̄малкӣлва ичэчэ̄вун. Тарил со̄ гороптыл бичэ̄тын. Эр са̄малкӣл хоктолво ичэвкэ̄нивкӣл, эвэнкӣл, я̄ӈдулӣ ӈэнэденэл, эдэ̄тын кэ̄йрэ. Тадӯ о̄кин-да тамнакса бивкӣ.

Ичэндекӣттӯ хэгды мэ̄римэ-мэ̄римэ⁸, ӈӯӈнэ-ӈӯӈнэ аглан ичэвдерэн. Тартыка̄кӣ упкаттук дӯннэлдук кэтэ хоктоко̄р ӈэнэвдерэ. Амака̄ улгучэ̄ндечэ̄н, нонон эвэнкӣл кэтэкӯр биӈкитын, тала̄ упкат эмэктэӈкитын. Тадӯ бакалдыӈкитын, икэ̄ндеӈкитын. Бӯ тадӯ, дюга нулгиденэл, урикӣтчэчэ̄вун. Минӈӣ нэкунми, дю̄р анӈанӣчӣ бинэ, тадӯ со̄т икэ̄ндечэ̄н.

Дэрэ̄ӈнэдӯ, энинми улгучэ̄ниӈкин, о̄н амуттук итчи⁹ эмэвэ̄тчэчэ̄н – ахӣ багдарӣн, соӈодёно… Палаткалва, куре̄вэ хороливка̄нэн, тыкэ̄-дэ̄т соӈодёно, угискэ̄кӣ сурурэн. Эхиткэ̄н тадӯ ама̄лӈӣл э̄кун-да а̄чин, тадӯ орор мо̄лтыл-нюн манапча̄л.

Дукуран Николаев Виктор, 15 анӈанӣчӣ,
бикӣттӯ Усть-Нюкжадӯ
Тындинскай райондӯ Амурскай областьтӯ бидерӣ,
9 класстӯ алагӯвдярӣ

Синквейн «Эвэды̄ тӯрэ̄н»

Тӯрэ̄н
Ая̄врӣ, аяткӯ.
Алагӯвдяран, этэе̄тчэрэн, бэлэдерэн.
Бӣ мэ̄нӈӣви тӯрэ̄нми со̄т ая̄вдем.
Ӣн.
Минӈӣ эвэды̄ тӯрэ̄н
Минӈӣ тӯрэ̄н со̄ тамура.
Минӈӣ тӯрэ̄н ая̄врӣв.
Тӯрэ̄нми со̄т ая̄вдем.
Тӯрэ̄нми алагӯдям.
Эвэды̄ тӯрэ̄н ха̄лдерэн¹⁰.
Дӯчама, умнэды̄ бинэ.
Минӈӣ тӯрэ̄нми ха̄лдерэн.
Урэды̄, ама̄ды̄¹¹ бинэ.
Эвэды̄л куӈака̄р, таткаллу.
Куӈака̄р, экэллу омӈоро!
Митӈӣ тӯрэ̄н хэгдыткӯ!
Эвэды̄ тӯрэ̄н – а?????!
яткӯ!

Дюга

Бӯ дюга энты̄лнунмэр урэлэ̄ суручэ̄вун. Урэдӯ со̄ хэку бичэ̄н. Бӣ экиннунми бирадӯ элбэскэ̄тчэчэ̄в. Ге̄ тырганӣдӯ со̄т тыгдэдечэ̄н. Бирака̄н со̄т мӯдэ̄чэ̄. Бӯ дю̄дӯвар дыгинмэ тырганӣва тэгэтчэчэ̄вун, тыкэ̄н тыгдэдечэ̄н. Тунӈӣ тырганӣдӯ ме̄лим, дылача̄ ӈэ̄ридечэ̄н. Бӣ со̄т уруним. Упкат бэел тулӣлэ̄ бичэ̄тын. Орор эмэчэ̄л. Со̄ ая бичэ̄н.

Дукуран Николаева Галина, 17 анӈанӣчӣ,
бикӣттӯ Усть-Нюкжадӯ
Тындинскай райондӯ Амурскай областьтӯ бидерӣ,
11 класстӯ алагӯвдярӣ

Куӈа̄ка̄рду

Сигӯ – сигӯка̄н,
Хуларӣка̄н, ӈэ̄рикэ̄н.
Со̄ма гудейкэ̄н,
Аямамат ӈэ̄рикэл.

* * *

Туксу – туксукэ̄н,
Бугалӣ дэгденни,
Тыгдэе эмувденни.
Мунэвэ уладянни.

* * *

Сека̄ – сека̄ла̄н,
Бирала̄ тыкинни,
Мӯвэ уминни,
Тыгдэе эмувунни.

* * *

Бе̄га – бе̄гака̄н,
Алтама гиркикэ̄н,
Долбонӣ о̄ран,
О̄сиктака̄р ю̄рэ.

* * *

Дюганӣ – дюганӣка̄н,
Хэкуви эмуврэн,
Диктэлвэ анӣран,
Няӈталвэ иривкэ̄нэн.

Иманна тыкчэрэн,
Дӯннэ багдаргаран.
Куӈака̄р урӯндерэ,
Тугэнӣ эмэрэн.

* * *

Тугэнӣ эмэрэн,
Иманна тыкчэрэн.
Ороко̄нми бӣ илбэдем,
Биралӣ ӈэнэдем.

* * *

Эвӣдем, эвӣдем,
Иргикӣттӯ бӣ эвӣдем.
Иеӈнэ, Иеӈнэ,
Сӣ минӈӣ ая̄врӣв бугав.

* * *

Этэе̄чимнӣ инэӈӣн эмэрэн,
Эвэнкӣл бирала̄ эврэ.
Орордивар хуктывдерэ,
Аямат бакалдыдяра.

Булта̄мнӣл

Умнэ̄кэ̄н бӣ, акинми Саша тадук Мукэлэӈэхэ Дярагу нӣрэлдӯн¹² бэю̄ктэдечэ̄вун. Оёло̄ туктыксэ̄л, бэю̄нмэ нӣрэдӯ каравдяча̄вун. Иланӣ чэрӯлӣ тэгэтчэчэ̄вун, нӣрэлэ̄ ичэтчэнэл. Бе̄га иркин бичэ̄н. Эр бе̄гадӯ бэю̄н бургу бивкӣ. Уллэн со̄ма ая, са̄врӣ о̄вкӣ.

Тыкэ̄, нӣрэлэ̄ ичэтчэнэл, аракӯка̄нди улгучэмэ̄тчэчэ̄вун. Тадук бӣ э̄кунма-ка до̄лдым.

«Учуне, – омолгилдӯ гуним. – До̄лчаткаллу аямат, до̄лдыдярас? Ӈӣ-кэ се̄рдиви тымбудерэн¹³, э̄кун тадӯ?»

Акинми а̄вунми луктан, аямат до̄лчачиллан. Мукэлэӈэхэ, э̄халви тэлбэмэксэ̄, ичэчиллэн. Бӣ ӈэ̄лэлим. Хактыраллан. Акинми гунэн: «Ичэнэ̄гэт!» Бӣ гуним: «Э̄кунма хактырадӯ ичэдеӈэ̄т? Ӈэ̄лэвсе̄, отӯла̄вар¹⁴ суругэт. Тэгэлтэнэ ичэнэ̄деӈэ̄т».

Отӯла̄вар эмэксэ̄л, чайты̄дянал, бӣ, инеликсэ̄, элчэ̄ этэрэ бихим. Саша ха̄нӈувкӣ: «Э̄кун инемӯвэн баканни?»

Бӣ гуним: «Сӯ, тыллэс, о̄н бӣ сундӯ гунчэ̄в: ӈӣ-кэ се̄рдиви тымбудерэн». Омолгил элэкэс тӯрэ̄нмэв тыллэ. Ня̄н инеллэ.

Тымӣнин, эрдэ ме̄ликса̄л, тар нӣрэлэ̄ ӈэнэктэрэв. Болгӣкта чагида̄дӯн коӈнорӣн ӈэнэчэ̄. Хэгды бичэ̄ коӈнорӣн. Удян со̄мат аят дӯннэдӯ ичэвдечэ̄н. Болгӣкталдула̄ инӈактан намарача̄. Коӈнорӣн кэтэкӯнди гивэе̄тчэчэ̄¹⁵, тара бӣ до̄лдыча̄ бичэ̄в. Тадук бӯ бирака̄нтыкӣ эвчэ̄вун, тадӯ бэю̄нмэ бултача̄вун.

Дю̄ла̄вэр, уллэчӣл бинэл, эмэрэв.