Kitabı oku: «Гунилгэн хохтолин», sayfa 7

Yazı tipi:

Гэрби

– О̄н гэрбис, дылача̄ка̄н гарпан?
– Ариша.
– Минӈӣ гэрбив Степан.
– Э̄да̄ви-ка соӈолинни?
– Гэрбидукис… Тугӣ акинми гэрбитэчэ̄н,
Нуӈанман кусӣн девчэ̄н.
– Экэл соӈоро.
Хуӈту гэрбие гакал.
Дюгэтчэӈэ̄с гэрбиви?
Кэ, сӣнмакэл: Владимир, Николай, Илья…
– Илья аятмар.
– Аса̄тка̄н – Ильядук хуна̄т,
Бэеткэ̄н – Ильядук омолги.
Гудей…
– Кусӣндук мучӯмӣ, гэрбиви дюгэтчэм.
Дӯннэви дысӯттэ̄ви сурурэн,
Инямӯдяна, найдадянэ⁶⁶, ая̄вденэ.
Эчэ мучӯра кусӣндук, сокоривча̄.
Этэ̄н балдыра Ильядук омолги.
Этэ̄н балдыра Ильядук хуна̄т …

О̄макта анӈанӣ

О̄макта анӈанӣ эмэрэн!
Упкат илэл ала̄тчэрэ,
Аяка̄нэ, кутукэ̄нэ
Упкат илэл гэлэ̄дерэ!

О̄макта анӈанӣ эмувдеӈэ̄н
Куӈака̄рдӯ – урувсинэ,
Ӣлмакталдӯ – ая̄вуна.
Сагды̄ка̄рдӯ – дё̄нмукӣтвэ.

О̄макта анӈанӣ эмувдеӈэ̄н
Кутье – бэю̄ктэмнӣлдӯ.
Одё̄врӣ кутуе – аса̄тка̄рдӯ.
Орочӣл бидэ̄тын – эвэнкӣлдӯ!
Тогоко̄нты, эвӣденэ, дегдэдегин!

Иеӈнэ бикӣт

О̄кин до̄лдыча̄в эсим дёнчара,
Городӯ-гу, дагадӯ-гу эвэнкӣл бидерэ.
Мэ̄нӈӣвэр бинӣвэр, мэ̄нӈӣвэр тӯрэ̄нмэр эчэ̄л омӈоро.
Орочӣл, тэгэ̄чӣл итымка̄дерэ.
Ӣдӯ тар бикӣчитын? Ӈӣ са̄рэн?
Гундерэ: “Иеӈнэ”.
О̄н тала̄ исмӣ?
Тугӣ ма̄та̄лнун бидечэ̄вун.
Тӯрэ̄нмэр омӈодёно, ниӈтэлвэр сокордёно.
Амты̄лты удялтын эдынди эдынмувчэ̄л. Омӈовчо̄л…
Тӯрэ̄нми о̄н эдеӈэ̄с омӈоро?
Ӣдӯ тар бикӣчитын? Ӈӣ са̄рэн?
Гундерэ: “Иенгра”. О̄н исмӣ?
Тадӯ бэюмӣмнӣл орорди нулгидерэ.
Тадӯ куӈака̄р самӈӣрва иладяра.
Тадӯ аса̄л о̄салвэ ӣдерэ.
Одё̄врӣл тэткэ̄лвэ уллидерэ.
Бисин – бисин таргачӣн Дӯннэ!
Иеӈнэ бикӣт. Бакам! Исим!
Эдӯ эвэнкӣл эвэды̄тчэрэ.
Эдӯ эвэнкӣл орорво дявӯчадяра.
Эдӯ-тадӯ ко̄ӈа̄ктал киӈгикэ̄ндерэ.
Эдӯ тэткэ̄л чиктычӣл, ирэ̄ксэдук о̄вча̄л гудейкэ̄кэ̄р.
Бисин – бисин таргачӣн Дӯннэ!
Иеӈнэ бикӣт. Бакам! Исим!

О̄н эвэнкӣл чайвэ са̄ча̄тын
(Нимӈака̄н)

Городӯ, со̄т городӯ, Ура̄ӈкай-бэе ӣндечэ̄н-бидечэ̄н, Бэю̄рвэ ва̄дерӣ гэрбичӣ. Урэрдулӣ, биралдулӣ нулгиктэдечэ̄н, бэю̄ктэдечэ̄н. О̄н-ка нулгиктэдеӈэ̄с энэ орорво дявӯчадярэ? О̄н-ка ӈинакина а̄чин бэю̄ктэдеӈэ̄с? Бэю̄рвэ ва̄дерӣ со̄ со̄ниӈ бичэ̄н. Бэю̄рвэ ва̄дерӣ со̄ кутучӣ бичэ̄н. Ӈӣ нуӈандӯн эчэ̄н тэрэ̄рэ. Эмукин, эрӯвэ энэ са̄рэ, бидечэ̄н. Бэю̄нмэ ва̄вкӣ, тогово улӣвкӣ. Тадук акиндӯви туювкӣ, уллэвэ уло̄вкӣ, сэ̄ксэчӣвэ девувкӣ.

О̄кин-мал хоктодӯ лӯчады̄ Со̄ниӈма бакалдыран. Са̄лдыма̄тта.

– О̄н гэрбис? Ӣдук ӈэнэденни? Ӣлэ̄ ӈэнэденни? – Бэю̄рвэ ва̄дерӣ ха̄нӈӯктаран.

– О̄н гэрбис? Ӣдук ӈэнэденни? Ӣлэ̄ ӈэнэденни? – ха̄нӈӯктаран лӯчады̄ Со̄ниӈ.

Са̄лдыма̄тта. Тадук туркулдырэ, мӣрэлдырэ, дылма̄тта. Тырганӣ ӣлтэнэн, долбонӣ ӣлтэнэн. Ӈӣ-дэ эвкӣ давды̄ра.

– Кэ! Дэрумкӣгэт!

Тогово иларэ. Тадук лӯчады̄ Со̄ниӈ Иван гэрбич̄и мӯвэ хую̄врэн, э̄мава-ка чӯкава нэ̄рэн. Бэю̄рвэ ва̄дерӣ амтаттан – со̄ ая. Чинэ̄н⁶⁷ ӣдук-вэл эмэрэн. Со̄ниӈ Иван гунэн: ”Эри чай”. Тадук чӯкава ичэвкэ̄нэн.

”Экэл гунэ. – Бэю̄рвэ ва̄дерӣ со̄ниӈ гунэн. – Упкат эри чӯкавэ са̄дерэ, упкат ичэчэ̄тын.”

Тариптыдук Ура̄ӈкай – бэе эр чайвэ, гэрбиденэ ”Иван-чай,” умилча̄н.

Эдук дюлэ̄скӣ эвэнкӣл эр чайвэ са̄ча̄тын. Чайты̄дяра. Эвэнкӣл са̄ллэ: э̄мата̄нэл чаил бивкӣл. Чӯкавэ “Иван-чай”гунмурӣвэ э̄мата̄нал чӯкалди – чабрецит, суптылэ̄т, ӈоклӣ авданнадин, сиптылэ̄ авданнадин умундӯ нэ̄нэл, —хуювувкӣл.