Kitabı oku: «Мявму икэн», sayfa 3

Осикат хурамран

 
Хатарси, долбани нянинду,
Өмэн нюн осикат хурамран.
Итми би тар осикату,
Хи ясалбус демкаттам.
 
 
Би хину бакалдами гөндим,
Хину-нюн аяврам эр төрду,
Хи нюн дюгухулис дёмкаттам,
Омңанни тарар тиманидун.
 
 
Би ңэрикэ төрэнму,
Хи эхэнни уталла,
Тарит би хинду хиралникан,
Мэн төрэлби омңарам.
 
 
Адыгал анңани елтэнни,
Тарит мут хиннюн бакалдарап,
Хи мэн түрэлби гөнэнни,
Би тарар эхэм уталла.
 
 
Ями эрэк би долданив,
Эникэн хуглэр дэссим,
Илэ хэррэн тар анңанив,
Аяври икэв манун.
 
 
Ями ханинму дуррэн,
Эр елтэнчэ демкандук,
Тар нэлкэни бинидук,
Эңич мэргэму хоңран.
Мявму икэн.
 
 
Аике-да инэңи,
Городокла илаттан,
Нэрике-да эр бини,
Өрэлдэрив дёмкаттам.
 
 
Хоя айу ханикан,
Кэнелидук дысутли,
Нөлтэнчэми итникэн,
Мяванчаму икэли.
 

Амңамта анңани!

 
Амңамта анңанив алаттап,
Көтлэн ңьөнмирэр бэкэтчур,
Мэн мэнур хогсич эскэрэп,
Несэч иттэп дюлдэвур.
Тар көтлэн ңонмирэлдуй,
Эр эмни анңанду,
Айу нюн мэндус мэргэндукуй,
Эскэрэм… хутту нюн!
 

«Иңэньгидэ осикат хэрдэлин…»

 
Иңэньгидэ осикат хэрдэлин,
Нөлтэн гарпаңьдин эвирэп,
Нян хэкунюн – гякиндин,
Тэгэттэп, төрэмур мэнур дысуттэп.
 
 
Мут амардадут, хопкилти гулунтан
Нямалкан орарти, ниргэлни огалтан
Ханилти икэлни, унтуннат игэлтэн,
Мут дюлэп томалбу тиндэвур бивэттэп.
 
 
Көсчимңэл бугатан, иңэнгидэт төрэңэт,
Ңөнмирэл бэкэтбэн, хи айди гадинни
Эдэн нюн хиврэ, хи нөстэ тогаңас
Нян би төрэму, дюткий мучусни.
 

Балдача бугу

 
Гуд урэкчэр элгэлин,
Ҥэрин нянинти чулбаҥчин,
Тимҥэ хигилти долитан,
Илаттан, эвэсэл төрлэтэн, билэк.
 
 
Эду адыкун-да бэй тэгэттэн,
Хан ҥөмирэлдук, төр асаклан,
Тачин да бими, адыкун ҥөнмирэт,
Хунҥэлти аниван, кинкич дысуттэп.