Kitabı oku: «Гунилгэн хохтолин», sayfa 6

Yazı tipi:

Ипкарак биде̄ктукви гороко̄н аруран, ве̄сь иллэн энӯдечэ̄н, дылин хоролдёчэ̄н, э̄салин хактырапча̄л, ню̄риктэлин ларгарача̄л³⁵, а̄вунин горот нуӈандукин хуклэ̄дечэ̄н. Аран хэнӈэндукилви илмӣ, мэ̄нми мӯрэлӣ этэ̄синэн, о̄н-кэ ве̄сь дӯннэ хо̄рин³⁶. Аракӯка̄н халгардула̄ви илмӣ, мэ̄нми аят мэдэчилмӣ, аран илитча̄кви гэлэ̄ктэнэ̄рэн.

Сивчэ̄ того дагадӯн тыгэвэ тавран, орорви гэлэ̄ктэллэн. Ама̄ка̄н бакаран, тарил хокторон дагадӯн дулумнӯт оӈкодёчо̄тын. Долболтониллан. Эр асӣ а̄вунми сэммичэ̄ви мэдэрэн, мучуда̄ви дялда̄рэн. Ипкарак ӈэ̄лэнин ӣлтэнчэ̄лэ̄н, тар дӯннэлэ̄ дагамаран. А̄вунми бакакса̄, аят эр дӯннэвэ ичэттэн: агӣ хэрэкэл агӣлдук хуӈту бичэ̄н. Дёнчадяча̄н – э̄ласа-да ӈӣ-дэ эдӯ эчэ̄н сокоривра, авады̄л-да дарпил³⁷ а̄чир, холоктол³⁸ урикичил дагадӯ эчэ̄тын ичэврэ. Ичэтмӣ-кэ са̄бэл³⁹ тыӈарипты чука монӈӣвча̄, сиӈилгэн ӣдӯ-вэл эмэ̄нмувчэ̄. Ипкарак о̄кин-да мэ̄ндӯви имурэнмэ ӣмтывунэви эксэктэдеӈкин. Нуӈан тар имурэнмэ улдаксадӯ нэ̄рэн, ады̄ка̄рвэ сэктэкэ̄рвэ сэӈкирэдук эр дӯннэвэ харгилдук ӣмтырэн. Эр иты̄ва о̄кса̄, хима̄т орордула̄ви мучӯстан.

Урикӣт дагадӯн нуӈанман эды̄н Тыргауль арча̄ран, ӈинакир эмэдерӣвэ̄н мэдэвкэ̄нэ, бубгиллэ⁴⁰. Эды̄ви ханӈуктандӯн э̄ва-да энэ гунэ, Ипкарак а̄киттула̄, энэ мэдэрэ, бурурэн, о̄н а̄рэн долбонӣва – тырганӣва, он-кэ толкинтӯдяча̄н: эне̄кэ̄ви айда̄н э̄ридечэ̄н. Эӈнэкэ̄р маннӣл о̄ча̄л, ве̄стулӣ мӯрэлӣ ичэтмӣ чулама о̄ча̄. Тыргауль Ипкаракнун тар лӯчала̄ купестулэ̄ албара ӈэнэдемӣ.

Тырганӣлӣ Ипкарак нэ̄кулэ̄ тугэрӣптылвэ саводалва⁴¹ суруврэн, саӈа̄навча̄л, хэрэкэлвэ-дэ идэгэлвэ, о̄макталва уллидэ̄ви, ня̄н суруврэн.

ДЮГАНӢДӮ

Агӣдӯ дюга илэл хава̄лтын кэтэ бивкӣл.

Сагды̄л илэл о̄мактава дӯннэвэ урикӣтъевэр бакавкӣл, нулгимӣл, ӈӣ-вэл кэргэндук хара̄нма о̄вкӣл, сагды̄л илэл самӈӣрва илавкӣл. Хутэлтын мӯе эмэвувкӣл. Дагадӯ бирака̄н бира-гу бисикин, ая бивкӣ. Олго̄кин дюганӣдӯ, куӈа̄ка̄рдӯ мӯе бакамӣ, кэсэ бивкӣ. Ю̄ктэе бакамӣ, чопкоё о̄кса̄л, мӯ дялупта̄н ала̄чиӈнара. Калакача̄рвэр, каларвар дялувукса̄л, мӯвэ одё̄дёнол, ма̄рилдулӣ агландулӣ-да бикӣттулэ̄ эксэвкӣл.

Урикӣттӯ гулувур дегдэдерэ. Бэел хара̄ндӯ се̄раӈилва о̄дяра, аса̄л по̄талва, саводалва аюсчара. Дю̄явар иливукса̄л, чайтывкӣл, девувкӣл. Э̄кун биӈнэрэн, тара девуӈнэрэ. Девмӣ этэксэ̄, куӈака̄р ня̄н-да̄т бэлэлиӈнэрэ. Сэктэлэ хара̄ндула̄ эмэвуӈнэрэ, аса̄тка̄р эниннунмэр хара̄нма сэктэдеӈнэрэ. Бэел бэеткэ̄рнун дю̄ва иливуӈнара. Аса̄л дюкча̄ оёлӣн тыксава элбэӈнэрэ. Тадук куӈака̄р о̄вувча̄ла̄ о̄мактала̄ дю̄ла̄ тэты̄лвэ, хуллалва, идыгэ̄лвэ, тыгэлвэ дюгӯӈнэрэ. Дю̄ до̄дӯн аят упкатва нэ̄вкӣл. Тадӯ аят мучуктэт ӈо̄дяран! Тадук орорво ты̄нивкӣл. Долболтоно орор тыма̄ннэдала̄н оӈконо̄вкӣл.

Энты̄лтын девгэ̄е ирӣвкӣл, кэргэнмэр улӣвкӣл. Энэл хэлӣнчэрэ амтылтын улгучэ̄мэ̄чивкӣл: о̄н эсӣ тырга ӈэнэчэ̄н, о̄н нулгирэ, э̄ва ичэрэ, до̄лдыра. Куӈака̄р э̄салтын сомисилла, а̄малла, дэрӯрэ – нулгимӣ хэгды хава̄.

Элэ нэлкинӣдӯ о̄кин нямӣл до̄чӣл бивкӣл, во̄тадӯ дявӯчаӈкитын. Нямӣл хэрэкэдӯ во̄тадӯ, хэрэкэл орор ге̄дӯ.

Нулгидемӣл, дюлэлӣ амӣ нёравкӣ, тадук аса̄л, аса̄тка̄р, атырка̄р, этыркэ̄р элгэвурдивэр бодовкӣл. Удялӣтын орорво, сэсинмэ бэел, омолгил, хуркэ̄кэ̄р илбэвкӣл.

Каӈкит⁴² нулгидевкэ̄, ве̄к ӈа̄тчэнэл⁴³: «Уку, кук!» Гороло̄ сурумӣ, кэӈгилэ̄рди коӈалбудянал⁴⁴, сэсинмэ ала̄чилиӈнара. Сагды̄л бэел са̄ӈнэрэ э̄ма орондӯ ко̄ӈа̄ктэлэ⁴⁵ локомӣ. Гилгэлдӯ сэлэмэлвэ хэгдылвэ, тарил эпкӣл гороло дю̄лдук месо̄ра⁴⁶. Ко̄ӈа̄ктэл чучундук биӈкитын, тарит игин, кэӈгинин, игдымэр бивкӣ, сэлэмэдук о̄вча̄ симулат дылганин бивкӣ. Мо̄дук ка̄ӈа̄ллэвэ⁴⁷ о̄ӈкитын. Амаскӣпты̄л коӈа̄ктэл хэрэкэл бичэ̄тын, тарилва одё̄деӈкитын. Церковнаил ня̄н биӈкитын, купилэ̄н гэрбиӈкитын.

Орорво тасчамӣ ургэпчу. Агидӯ аглан, мо̄саг, сигика̄гил, ма̄рил супирэл-дэ бивкӣл. Нулгисилмӣ, дӯннэвэ са̄рӣл илэл умунупивувкӣл. Тадӯ гулдымэ̄чивкӣл ӣлэ̄, о̄кин, э̄ма хоктолӣ нулгимӣ ая бидеӈэ̄н.

Этэе̄чимнӣлду ня̄н ургэпчу хавалмӣ. Удӯндӯ орор дюкча̄ла̄ самӈӣрдула̄ эвкӣл эмэрэ. Саӈӯнду⁴⁸ хунмиктэл, манмактал, иргактал-да ады̄кӯр бивкӣл. Болонӣдӯ орор дэгинӈэктэлвэ гэлэ̄ктэливкӣл. Саӈӯндӯ палаткалдула̄ ады̄кӯр орор, гилгэ̄л, татыгавча̄л дулумнул нямӣл, турукэе девдэ̄вэр эмэӈнэрэ. Куӈака̄р ӈа̄лэлдуквар турукэе бӯвкӣл. Орор турукэвэ чивувкӣл, куӈака̄р орорво, эӈнэкэ̄рвэ ала̄нчэвкӣл. Сэвденивчу тар бивкӣ!

Асӣ хава̄н агӣдӯ ня̄н кэтэ. Нуӈартын тыма̄ннэ ӯнэмэмэ дылача̄вэ арча̄дянал, иливкӣл, самӈӣрва, дюлкӯтчэнэл, илавкӣл, девгэе ирӣвкӣл, тэты̄е улливкӣл, нямӣсалва сиривкӣл, хутэлвэр ичэчивкӣл. Гунмӣ тэде̄т – асӣ агӣдӯ ве̄спа ӣнмэ ӈа̄лэлдӯви дявӯчадяран.

Куӈакар ня̄н агӣдӯ бэлэчивкӣл. Энинтын гундевкӣ: «Кэ, нэкэ̄кэр⁴⁹ тэгэкэллу, гороё эӈнэрэ хукулэ̄рэ, сунэ хэрэкэл илэл хэкимнэдерэ». Хутэлтын иливкӣл, хуллалвар тулискӣ ло̄ва̄ндӯ⁵⁰ эдынмувдэ̄тын локовкӣл. Аятмар хава̄ – эӈнэкэ̄рвэ, нямӣлва дявамӣ. Хэрэкэлвэ орорво амака̄ дяваӈнаран, хэрэкэл гэлӯр бивкӣл, тарилва куӈака̄р дяваӈнара.

Куӈака̄р самӈӣр дагадӯтын эвӣдеӈнэрэ, эӈнэкэ̄рвэ, самӈӣрва ичэтчэнэл. Тадук девуксэ̄л, эниннунмэр нямӣлва сириливкӣл. Куӈака̄р бэлэчиӈнэрэ нуӈардӯтын. Мачарача̄ва нямӣва⁵¹ ве̄спан укумнӣвэн эӈнэрэ сирра, эмэ̄ниӈнэрэ, амаргӯт эӈнэкэ̄нин укудэ̄н. Укумнӣвэ угундӯ нэ̄вкӣл, тыминин чайнун умивкӣл, ко̄рчикъе о̄вкӣл. Укумнӣвэ диктэнун девмӣ алапчутмар.

Орор долболтоно оӈконо̄синивкӣл. Орор сурурэктын, урикӣттӯ чэ̄румэ о̄вки. Тугӣ этэе̄тчэрэктын, тырганӣ илтэнэн.

ТЫМАНӢДӮ

Дюганӣ, ӯнэ тыманӣ. Бирадӯ оллол симутчара. Эе̄ндулӣ лэ̄лбиктэ⁵² чӯкалдулӣн гуткэ̄чэ̄н деринэдерэн⁵³, ӯгэ̄⁵⁴ ӯгэ̄дерэн. Эр аракӯка̄н эдын эдыллэн, чӯка ӯгэ̄дӯ качус-качуналлан, тарит мӯ хэминэллэн⁵⁵. Чипича̄ка̄р, ма̄рилдулӣ дэгӣктэденэл, чипича̄лла. Кукты арунан, тар нимнэнкӣви аюсчаракин, кукэ̄кчэ̄н эсикэ̄кэ̄н дэгчэ̄ элэ̄: «Ӈӣ-кэ эдӯ чӯнмӣлва⁵⁶ дӯннэлэ̄ бурӣтчэрэн?». Аят ичэтмӣ, дягда гарадӯн улукӣ э̄куна-вал бэругэдерэн⁵⁷, тура̄кӣл игды дылганматын до̄лдыкса̄, тала̄ дэгӣллэн.

Агӣдук орор, нямӣ эӈнэкэ̄нунми ю̄рэ тадук бираткӣ эврэ. Тымалтанӣдӯ саӈӯпчу бивкӣ, орор гиллэмэвэ, дӯчамава мӯвэ умна̄рэ.

Эдын тамнаксава бурирэн. Амуттӯ мӯдыгӣ⁵⁸ мӯдыгӣткэ̄рнунми ичэвуллэн. Ге̄дӯ амуттӯ, оре̄дянал, умнэ̄ты̄л⁵⁹ дэгӣктэдерэ.

Ме̄лилча̄л хуюкур кулика̄р. Лирбӣрин⁶⁰ сороптун дегиктэллэн. Ӣриктэл, дылача̄ дӯннэвэ нямалгиракин, тутуктэлчэ̄л. Манмактал киӈиндерэ. Дэгиктэллэ ло̄рур⁶¹, аракӯка̄нди, лэпурэлдивэр давсидянал, силэксэ̄вэ ӈэ̄лэтчэнэл, чуктыл алапчӯ чӯксэвэтын умда̄вэр до̄вкӣл.

Тар урэкэ̄ндӯ гулувун дегдэллэн. Тадӯ урикӣт, илэл тыма̄тнэдук хавалилча̄л. Аса̄тка̄ка̄н бираткӣ, аракӯка̄н икэ̄нмэ давла̄денэ, калакача̄ндиви киӈисо̄дяна⁶², эвдерэн. Хоктодӯви гуде̄ипчулвэ чукты̄лва ичэтчэрэн. Мӯдӯ ханянми ичэксэ̄, аса̄тка̄н инемӯсинэн. Инектэллэн сэвде̄нденэ, инектэнин купилэ̄гэчӣн урэстэн. Улта эр инектэнмэн ча̄скӣ-бугаткӣ суруврэн, гороло̄ до̄лдывда̄н. Аса̄тка̄н хаӈнака̄ндиви мӯлӣ таптастан, ӯгэ̄ аса̄тка̄н ханянман муруктэт⁶³ суруврэн …

ДО̄ЛЧАТКАЛ

До̄лчаткал – он минӈӣ эвэды̄ тӯрэ̄н ӣгдыдяран,
О̄н бира оёлӣн дылача̄ ю̄дерэн,
О̄н гиллэндерӣ амут, бираяка̄н чургиндяра,
Улта урэлӣ до̄лдывдяран!
До̄лчаткал, о̄н орордӯ илэл нулгидерэ,
Ко̄ӈа̄ктэ юргиндерэн⁶⁴, эӈнэкэ̄н эӈтэдерэн,
Сапка ӈа̄лэт усэндэ̄вчэ̄ ма̄вут
мӯссэдерӣ орон иелвэн дяваран.

Самӈӣн улукталӣ⁶⁵ ю̄дерэн,
Илэл дылгантын, куӈака̄р инентын
Уӈтувун э̄ривунин до̄лдывдяран,
Улгурил, нимӈака̄р, давла̄вур!
Амаскӣпты̄т икэ̄денэл, аса̄л уллидерэ,
О̄дяӈа̄лвэ гуде̄илвэ унталва,
Кумала̄рвэ, коколлолво,
Элэ уняптӯртын ӈа̄лэлдӯтын киӈидерэ.

Упкат эвэды̄дӯ тӯрэ̄ндӯ бисин.
До̄лчаткал аямамат!
Эмӣ са̄рэ, алагӯвкал, са̄лмӣ ичэдеӈэ̄с —
Хэрэкэ эрӣн синдулэ̄ эмэдеӈэ̄н!

Дукуран Торпушонок Лилия Михайловна,
бикӣттӯ Стрелка-Чунядӯ Красноярскай крайдӯ бидери.